立場新聞 Stand News

廣東話新歌 challenge

2020/3/27 — 19:41

唔知係咪最近大家喺屋企悶,四圍挑機challenge人,ig story 撳極都有,原來已經攻佔埋 facebook。被朋友tag:要推薦三首近期最愛嘅廣東歌
如果我冇會錯意,係推薦三首新歌,對嗎?

1)我們的基因/謝安琪
我知,謝安琪新歌《再度》出咗,《我們的基因》舊喇!(放過我啦)比起《再度》,《我》比較啱我口味。《我》係講17歲蒲銘心遇上董折,兩人嘅故事就這樣開始。兩人往後嘅關係/婚姻如何苦澀,其實我無特別探究。但係《我》出嘅時候我睇過個文案,話蒲銘心細細個睇書學扮成一個自閉症嘅人,唔鍾意社交,唔鍾意講嘢,或者外人會覺得佢好奇怪,但偏偏董折明白。

年少亦從未任過性 極沒人性
未共你驚世駭俗難認命
剛好你闖進來 手牽手出走到邊境
我們的基因不必鑒證

非常少女心事的歌,17歲的蒲銘心的視覺。轉個角度,可能對照17歲的董折,聽聽《勇悍 · 17》更有趣。btw,《我》個MV都幾失望(可能我本身好大期望)

廣告

2)找到一個人/曾樂彤
Hard sell?沒有,我一日聽十次。我可是跟好朋友就著呢首歌有過很長的對話。《找到一個人》是一首情人節period出的歌,老實說,我本身聽歌名,一點期待都沒有,以為又是那些我愛你你愛我的情歌(呃,嗰排好多呢類的情歌呢)。點知首播,原來是送給單身朋友的,而且包含了很多思考 ── 我應該如何面對一段健康的關係呢?

過往的傷口/不信任/孤單/絕望/相處/寛恕/經歷/希冀感/盼望
通通都是在重新開始一段愛情之前,自己必須處理元素,假若自己無法渡過,又如何算得上準備好重新開始? 

廣告

來日你 總找到一個人 傳來微溫 總找到一個人
仍然誠懇 不要讓你希冀感給軟禁 心可死都可再生
來日你 總找到一個人 同行餘生 總找到一個人
一直靠近 溶掉你今次那不甘 重拾你當初的信任 再等共震

3)水刑物語/Jer 柳應廷
首歌啱啱出嘅時候,我即刻share咗俾朋友:「嘩,首歌好好,MV都好好」。見另有文章講 Mirror,但係入面講《水刑物語》的篇幅比較少。其實《水》值得更大篇幅,唔駛講都知 Mirror 走偶像少女萬人迷路線,但Jer 呢首歌比起隊友的新歌更驚喜,非常出到佢聲線嘅優點。《水》唔一定係情歌,相反係以個人情緒處理為主題。MV好襯Jer 的形象,好適合佢,隱約帶著林宥嘉的影子。

聲線領我再往前游
上升身軀找到缺口
你敞開了白晝
一笑引我再次回眸
岸邊伸出這一對手
再不需要獨奏

平時日常,我好少聽啲熱血夢想類的歌,歌單本來就是好私密的東西,陪自己經歷孤單的,供給自己最需要嘅情緒力量。同時,我又好鍾意聽廣東歌,自己語言,更容易入心。最近見到有朋友分享自己的「我最喜愛廣東歌」,得閒的話我又想講多啲。

發表意見