【影評】《荷里活有個耆福黨》:仲識笑就有福了

羅拔迪尼路(78歲)摩根費曼(84歲)湯美李鍾斯(75歲)三人加埋超過二百幾歲,人生閱歷多到足足夠講兩世紀。雖然三位老爺子近年都相繼減產,但仍然不時都見到他們的客串演出,以彩蛋形式驚喜亮相。最近上映的新戲《荷里活有個耆福黨》找來他們三位擔綱演出,而且更是由頭帶到尾的主角,故事大玩老套到爆嘅「戲中戲」,幾位老戲骨在戲中浮誇演出,玩盡電影圈搵錢生態,是自嘲還是諷刺?無咁複雜,老頑童胡鬧一場,過足戲癮就夠好笑了!

隨著同一代電影人相繼老去,我們可以看到有不少電影都會起用睽違多年的資深演員,運用演員自身的經歷來建構角色,為戲內戲外增添質感和故事性。常見的做法是「老少配」,陽光配遲暮,資深帶青澀,激發出兩代影人之間的微妙關係,自然而生的化學作用,最近的《殺出個黃昏》正是如此。

《荷里活有個耆福黨》在配搭上反其道而行,用幾位老將來湊成一台戲,老餅就老餅,倒是有點《猛火爆》(Red)嘅影子,只是今次唔玩退役特工,徹頭徹尾平民化。

故事講述霉到谷底的荷里活監製Max(羅拔迪尼路 飾)江郎才盡,新戲又唔生性唔賣座,無法償還巨債給黑幫金主方雷(摩根費曼 飾),於是想到「做場戲」,表面上找來過氣動作巨星拍部新戲兼 Comeback stage 復出,其實是想暗中「獅鳥」演員,扮成拍攝意外以詐取鉅額保險金。

到此,電影界朋友應該會打冷震,事關每次出親 Crew 求神拜佛都唔想出事,《荷里活有個耆福黨》卻要出事先可以成事。萬萬沒想到平時最唔想出現嘅嘢,當你苦心經營嘅時候又會死都唔出嚟;又,當你以前好想拍好一套戲打出名堂卻總是屢屢碰壁,當你唔想拍好套戲,最後卻又好諷刺地成就經典,開創票房高峰。問你死未?

《荷里活有個耆福黨》片長143分鐘,節奏明快,塞滿笑彈,好多笑位粗暴直白,情節推進亦可以用「兒戲」來形容(亦是笑位之一),有幾分睇緊《寶貝智多星》(Home alone)嗰種90年代笑片嘅懷舊風味!

但再好笑,也不及那種人生的荒謬性可笑。無論是黑幫收數佬作為電影投資者,抑或無料過氣監製最後出來收割成果,我們都可以看到造物弄人,戲如人生,拼命生存追不上命運安排。最後滾滾墜落於黃土,本是狼狽不堪的一幕,吐吐口中的沙石,猛然又是一條好漢。滑稽可笑,但笑中會有淚有體會,咁就係人生。

年老本是嚴肅而沉重的議題,講家庭、講理想、講孤獨,講英雄遲暮、風光不再,我們都看過很多很多。但誰說老去便總是愁眉苦臉?《荷里活有個耆福黨》中湯美李鍾斯原本是想吞槍自盡的,以一個很牛仔的姿態離去,卻因為電影而重拾人生熱情,多番虎口脫險,終演活了一位七十高齡的老牛仔。

他的二次成長,正正來自嶄新的挑戰與壓力,外力的阻撓與苦難。曲折離奇,最終總是無心插柳,皆大歡喜。我們有選擇,可以選擇相信電影中的魔幻寫實,害你變成幫緊你,絕處會逢生。一息尚存,留一口氣,仲識笑,或許便是學有所成之氣度。

 

作者網誌

編輯推介

    發表意見