立場新聞 Stand News

怪胎:你若喜歡怪人

2020/12/23 — 13:38

《怪胎》,I WeirDO (2020) 劇照

《怪胎》,I WeirDO (2020) 劇照

【文: 招文軒】

精神疾病題材我向來係留意。同 <殘影空間> 嘅心理懸疑溝埋怪力亂神相比,<怪胎> 同 <幻愛> 嘅純愛路線無疑係更加近嘅,但我會話 <怪> 係 execute 得更加好更加定。

兼夾佢一聞落成陣 Wes Anderson 味咁囉,我呢亭骨灰級戲迷睇到滿心歡喜。想講睇完戲有得同導演 zoom 住講兩句,有人就直頭問你有冇 reference 過 WA,導演耍手擰頭話冇呀我無冇乜睇佢,齋睇 <布達佩斯大酒店> 咁。餘情無謂再講我明嘅。

廣告

唔理佢啦,嗰種強迫症規整和諧構圖,文青s 睇到扯晒嘅靚靚用色 as narrative device,扭擰奇怪嘅角色設計,仲有搵時尚潮流牌子 collab 嘅營銷秘技,我覺得幾得 WA 真傳咁。嗯嗯即係啱啱識人同人講你睇 <怪胎>,我會 get 到個意思係,你少少 hip 少少怪少少文青,但呢啲邊緣氣質會係 present as 作為一個正常人嘅花邊裝飾。marketing 問題,市場定位問題。

不過啦我自己覺得啦,就會係覺得個尾係有老土左嘅。當然就戲論戲件事就兜得圓嘅件事係完得到,同前面係黐得埋,但我會話我眼見佢個好頭,我會期待個尾會係 wow 啲咁,既然強迫症 as 怪胎ness 係將佢哋連起嘅紅線,會唔會可以令段愛情由頭帶落尾地同嗰種怪胎ness 扣得緊啲?對於你有冇落俗套我會話我都幾奄尖 picky 咁。

廣告

或者個社會點睇強迫症呢樣嘢係我會大做文章嘅位如果比我拍咁。無人天生呢會當衛生係回事。而建基於對病菌嘅了解認識嘅現代醫學現代衛生觀,歷史性咁睇呢套觀念,其實係同西方憑船堅炮利之下嘅強力輸出,先可以喺世界流行起嚟。所以講到尾,衛生係秩序問題,強迫症亦係對嗰隻秩序嘅fetish。

《怪胎》(I WEiRDO,廖明毅導演,2020)

《怪胎》(I WEiRDO,廖明毅導演,2020)

一旦攞到個關係,你又會發現強迫症作為愛情契機有種奇幻嘅一體兩面:混亂世界裡面佢哋嗰種對秩序 fetish,正正係成就段情嘅嗰個點;而愛情帶嚟嘅失序,又時刻挑戰住佢哋對秩序嘅 fetish。開頭靈氣逼人節奏精準嘅相遇相知,正係好在佢有睇頭又能夠玩出別樣花腎有啲諗頭又扣得中,咁。

強迫症眼中嘅衛生,經己同件事含菌量如何毒唔毒得瓜你嘅關係唔大。而係類近恆河水洗滌人心嗰種宗教意義上嘅 concept,洗手打掃淨係心入面嘅垢個結果係 spiritual 嘅咁。反映嘅係現代社會用科學控制所有嘢嘅野心,而野心反映嘅呢,係一個個匱乏焦慮嘅自我。呢種 anxiety 應該係當係新鮮出爐當代特產而視之,即係你同路易十四或者雨林土著講我驚唔衛生我有病會猛咁洗手,人哋睬你都傻。

As 人工嘅產物社會嘅產物,衛生概念自己會因應唔同地方文化環境而變化。香港人或者大陸人睇見鬼佬死人唔肯戴口罩,人傳人惹到肺炎橫行,終於可以加把口做高級啲教育人嘅一方,一場病成個世界秩序喺你覺同唔覺間已經靜雞雞大洗牌。

返去套戲,世界大變之中不變嘅係,戴穩口罩手套勤消毒猛洗手 as body rituals 帶來內心平靜安寧同秩序感,相信苦防疫日久嘅咁多位,都有會心微笑嘅體會。儀式換嚟嘅心理慰藉我會話千金難買。in this sense 嗰種 fetish 可以話係屬於呢個世代每一個人嘅,general 到一個地步騎呢古怪之感已經消散。

作者簡介: 躺著觀影,坐著打字,經營ig帳戶@weiredeyeforfilms。

發表意見