立場新聞 Stand News

書展取消重點在於政府制度,不是舉辦日期

2020/11/24 — 11:05

作者製圖

作者製圖

稍為理解出版社經營就知道,書展取消,代表幾多行政概念失當。

作為今年出書嘅作者之一,我都有少少嘢想講。

我會出一本關於社交媒體理論嘅工具書,不過相信都要押後。

廣告

其實,書展延期於對出版社同作者影響有幾大,相信都唔需要再講。

坊間好多朋友表示,書展有人群聚集風險,而家第四波爆發好大機會發生。所以要取消好合理。

廣告

其實,唔係幾時舉行,延唔延期嘅問題。

重點係,如果為整體社會利益著想先取消書展,咁點解中國回港又可以有免檢疫界別。

風險係相對,我哋日日戴罩焗到生暗瘡(我就爆咗好多),減低到部份傳染機會;但TVB台慶就無罩上演,警察影相就開心不設防。

咁,風險相抵,加埋邊境制度放病毒入關,我哋咁努力,係為咗等你Relax?

書展問題點解錯焦點,因為重點唔喺日期,同舉唔舉行。

係如果取消,政府會做啲咩補助出版社吖嘛,係咪?

同餐廳限聚一樣,1.5米距離代表枱數會少,人客都少。每枱人數限制,更加直接影響餐廳收入。

得閒就4人,得閒又6人,咁即係點,收入跟住你心情起起跌跌,然後又爆第N波,全世界等運到估邊一行停業?

你停,但有一個合適補助制度,咁坊間怨氣都無咁大。但,你無吖嘛。

次次要市民去忍,去承受,然後你把關不力,制度有問題,又要大家小心疫情,唔好做生意。

有無做過生意,好多企業都係賺特定季節同日子嘅錢,出版社有幾多成收入集中喺書展,你知唔知,呢個世界上,有樣嘢叫現金流。唔係七月唔開改十二月就補到,中間五個月係咪都要出糧畀租金。

你有補助就話啫,你無,咁叫大家體諒,點體諒,你教我?

有咩就要市民埋單商界埋單。我作為生意人,唔出書唔會賺少好多,但出版社呢?

其實真係好白癡,下年七月先搞,我當搞到啦,呢一年人工租金印刷費,邊個畀?兩年書展變一年,咁作者要唔要搵多一倍?製作印刷費用係咪又會累積。

呢個先係問題,本身個現金流就係靠書展,一年一年咁運作。

而家無補助下叫人停,點會無怨氣?

淨係第四波恐慌,我已經無咗好多生意,好多Project開咗頭要十二月做,而家都半天吊。

政府有無制度去幫商界?靠保就業?你講笑?

呢個先係問題,唔需要鬧書商自私、餐廳自私,重點係邊個迫人自私?

就係出香港人糧嘅政府,叫人唔好成日講錢。

你話幾自私。

作者製圖

作者製圖

作者Facebook 
 

發表意見