立場新聞 Stand News

【樂壇未死】去時代廣場公投最愛廣東歌

2021/5/3 — 18:34

430,我等老嘢有眼不識「姜濤灣」,一到百德新街,人山人海到一點。少女手上都拎住個「Keung To」牌,不分年紀嘅女舉起手機影相。追星追到咁熱情,勾起大叔當年廣播道嘅回憶。邊個話香港樂壇已死?你睇,當年四大天王嘅 feel 都返曬嚟。姜濤啊、Mirror 啊、Error 啊,仲好似有咩陳蕾、林家謙。But, I must admit 呢啲唔係「大叔的菜」,上星期五去銅鑼灣唔係為咗姜濤,而係去時代!

她們在影相!姜濤 billboard!

她們在影相!姜濤 billboard!

廣告

時代廣場呢排搞咗個「廣東歌 101」嘅展覽,由 80 年代講起講到千禧後,數返曬香港樂壇嘅經典金曲。我就係趕過去睇首階段 80 年代!80 年代,係阿叔最嚮往嘅年代。嗰陣時成日聽電台,又錄 mixtape 俾女仔。張國榮、陳百強一定走唔甩!梅豔芳、羅文夠妖冶,達明異色得嚟又唱出草簽後嗰種複雜心情!朋友移民臨飛之前,一定點返首《今天應該很高興》送行⋯⋯

考古廣東歌,點少得 Sam Hui?

考古廣東歌,點少得 Sam Hui?

廣告

以前女同學好鍾意抄歌詞,Rubberband 御用詞人 Tim Lui 都唔例外~

以前女同學好鍾意抄歌詞,Rubberband 御用詞人 Tim Lui 都唔例外~

我以為,講 80 年代舊歌都係我呢啲老嘢先會去懷舊、想當年,點知好多後生仔女去!老嘢反而係少數!我去就尋佢老味,但呢啲派台嗰陣,班後生仔女應該未出世,竟然會對呢啲舊嘢有興趣!

好多後生女去睇展覽

好多後生女去睇展覽

行入個展覽,工作人員就好熱情咁介紹,然後俾咗 3 粒鋼珠我,「投票揀你最喜歡嘅廣東歌啦」。香港人,你幾耐無投過票?揸住  3 粒鋼珠,我立即覺得任重道遠。25 個年輕歌手,揀咗佢哋覺得代表 80 年代嘅時代曲。《明星》、《風繼續吹》、《分分鐘需要你》⋯⋯對眼一見到歌名個腦就自動播歌,識貨!不過,大叔最愛都係《似水流年》。

投票啊!香港人!

投票啊!香港人!

嗰種離愁別緒,心好唔紮實嘅感覺,今時今日何嘗唔係呢?仲有鐵達時廣告啊!一句「不在乎天長地久,只在乎曾經擁有」,街知巷聞,深入民心。經典金曲是劃時代的,唱出嚟嘅情懷,兜兜轉轉,幾十年之後又啱駛啱用⋯⋯真係唏噓!

拿拿拿,個展覽唔係一味懷舊㗎!80 年代完咗,佢哋準備緊進入 90 年代,一直會唱到 2010s!雖然我老,但我都好奇,嚟緊我會繼續去睇,keep 住自己 update with Canton Pop!

發表意見