立場新聞 Stand News

樂滿夏灣拿:是金子總會發光

2021/1/25 — 13:39

Buena Vista Social Club (1999) 劇照

Buena Vista Social Club (1999) 劇照

【文:招文軒】

嗯嗯睇完都會覺得哦原來溫雲達絲就係咁。同之前睇《德州巴黎》一樣,《樂滿夏灣拿》都係嗰隻個人化情緒化路線,向內挖掘,我呢啲唔係點感性嘅人就會覺得咁耐冇講過啲咩太特別嘅嘢,佢好似冇乜 point,可能佢只係樸素地紀錄而展出,令你知道有班人點好點好,就係個 point。

而但係呢班老到成精嘅古巴音樂人又真係有料到。睇到佢哋嗰隻工多藝熟爐火純青,一出聲就超壓場,想講我無啦啦我居然都會眼濕濕。歲力洗禮下佢哋可以咁生猛精靈,我覺得係因為佢哋有寄托有世藝,搵到起個世界安身立命嘅位。有真正 passion 嘅人,就係咁幸福囉。

廣告

片中簡簡單單以兩次表演為軸,旁逸斜出串起隊 band 各成員嘅夫子自道,點大,屋企點,老婆仔女,玩雙陸點叻,隨街同人唱成一片,起一圈 ballerina 幼苗中間彈鋼琴,盛。擺底樂器佢哋都係典型嘅拉丁人,你知啦嗰種大大聲熱熱鬧鬧,幾歲都咁風騷,但又傳統又神心,咁。但樂園一拎得返起,佢哋照又用音樂,屌返起成個場。

片中睇到佢老人家活國寶嘅好,但人在新時代一度嘅門庭冷落一句帶過,於是冇那一抑嚟儲力,少左久違地終於又有得上台表演嘅戲劇效果。國寶們人生浮沈背後嘅種種政治社經因素,亦都只約化為因為未建交打唔通嘅長途電話,同埋一隊企起玻璃櫥窗後面嘅偉人公仔。

廣告

紀錄片拍嘅嘢,就係所謂真嘅,發生左而過去左嘅,人同埋事同地。好多成員拍完出完騷都走埋,令到件事係更加有嗰種懷舊嘅光彩。宜家嘅古巴開放日久,恐怕片中嗰種衰老嘅純真而生活化,又會有所變化。個情形同深水埗有啲似,佢是金子總會發光,個地方同佢個文化有人識欣賞你會鄧佢開心,但潮流後個生態會係點,泡沫之中維唔維持到本真,就等你放長雙眼睇下頭。

同大學啲 exchange 美國鬼仔鬼妹吹水,我通常會話我想去古巴。係出於真心,亦都係明古巴係佢哋美國人嘅後花園,床前嘅白月光,心口粒朱砂痣。佢哋係有鋪癮而我都係。計返轉頭,喺啲 chill 爆舊樓同海明威同老爺車進入意識之前,我對古巴嘅第一印象,就係 Buena Vista Social Club 嘅醇厚華麗。

作者簡介: 躺著觀影,坐著打字,經營 ig 帳戶@weiredeyeforfilms。  

發表意見