立場新聞 Stand News

【橫空出世 直落地獄】國產動畫《木蘭》導演壯語﹕中國的木蘭要中國人拍 負評如潮上映三日即撤檔

2020/10/12 — 18:34

原來除咗迪士尼出品嘅《花木蘭》之外,仲有一套國產動畫《木蘭:橫空出世》。迪士尼《花木蘭》被全球杯葛,至於呢套《木蘭:橫空出世》嘅命運就係——橫空出世,直落地獄。

《木蘭:橫空出世》本月 3 日於大陸院線上映,點知第二日劇組就發聲明宣布於 10 月 6 日起撤檔,新上映檔期待定。換言之,《木蘭:橫空出世》上映三日後就同大家講bye bye 了。唔知佢係咪史上檔期最短嘅電影呢?

呢套橫空出世嘅《木蘭》原本大打愛國牌,導演廖光華一個月前更發文表示對作品信心滿滿,稱「看完迪士尼木蘭,我們比以前更自信,中國的木蘭真的是要中國人來拍,這次兩個花木蘭雖說相隔不到一個月上映,但我們講的故事算是贏定了」。贏定了,真係好自信,但廖導有冇諗過仲有攬炒呢個可能呢?廖導,阿叔話你知,現實同幻想之間係好大差距的。

廣告

網絡圖片

網絡圖片

廣告

《木蘭:橫空出世》上映後劣評如潮,大陸網站豆瓣的電影欄目中,此片評分只有 3.2,一千多則大陸網民短評,清一色「一星」劣評,包括「还是刘亦菲的花木兰好看」、「说它是烂片都侮辱了烂这个字!」、「糟糕的建模,糟糕的台词,糟糕的剧情」等等。人人狠批,毫不留情。大家咁激動,應該係因為期望越高,失望越大。好似大叔咁對套嘢零興趣,連佢幾時「橫空出世」都唔知的,都係當笑話一則。

不過,網民們點解會睇呢套嘢,大叔也是不解,睇到以下呢段劇情簡介,點解仲會有人浪費人生寶貴嘅一個幾鐘,去睇呢套《木蘭:橫空出世》呢?難道愛國愛黨的各位深信,中國出品,必屬佳品?不過,呢套國產「真木蘭」,某程度都反映咗「真中國」嘅 :)

《木蘭:橫空出世》講述木蘭從小懷抱女俠夢想,可在替父從軍後屢次遭受打擊,咬牙堅持下面對愛情和友情種種,最終真正理解了“俠之大者,爲國爲民”含義的故事。 

《木蘭:橫空出世》電影海報 

《木蘭:橫空出世》電影海報

發表意見