由中島步飾演的後藤夕輝,影射日本歌手近藤真彥。(電影《梅艷芳》劇照)

為《梅艷芳》補遺

【文:霸氣哥】

*** 注意,有劇透 ***

套戲唔講太多,前面好大段都係流水式回帶,變得有啲蜻蜓點水,不過睇返 60s 尾香港赤暴後準備起飛,80s 大放異彩,90s 至 00 後盛極而衰,相信比其個人傳奇更令人感慨……

順帶一提,又要咁講,所謂「樂壇盛世」,其實當時好多廣東歌都係改編自日文/英文歌,可以話佔七成,我哋以往只係擅長「加工業」。

雖然大包圍,當中仍然有缺漏,這裡只補充一下,除咗 89 同何韻詩,掌摑事件更欠了後面一大段腥風血雨(明白,因為係黑幕,涉及新/K 火併,最後兩邊各自死咗兩個大佬,賠一大筆錢先解決,阿梅的確係畀人擺上枱,當年非常轟動,但阿梅本人好似從來冇承認有「掌摑事件」,所以亦唔存在上電視解畫),不過,更想說梅艷芳贏新秀時,並不如戲中所說一鳴驚人,震撼大眾,反而深刻記得,如哥哥一樣,最初都一樣有大把人「反梅」,而且比「反張」更激烈,不外乎話佢似,甚至係「撈女/舞女」,食煙飲酒講粗口(今日當然已非常非常平常),私生活混亂,曾經有傳言話佢長年著長袖衫,係因手臂有紋身(最後不攻自破,當然今日紋身都非常平常)……更離譜係話佢同啲徒弟搞埋一齊,又墮過胎之類……當然,今日對女藝人嘅口賤亦冇乜點變。不過更佩服當年一班幕後團隊,尤其林振強,索性就將佢打造成「壞女孩」,變做「香港麥當娜」,於是體制/家長/老師/道德 L 很憎厭,港台亦禁播,但大受年輕人歡迎!

如果將呢部分拍多啲,其實先反映到個時代衝擊,同埋阿梅 career 對個時代嘅意義,而家只輕描淡寫。講真,點可以冇林振強嘅出現。

而哥哥同阿梅亦非相識於無綫(當年個「線」字係咁寫),早喺麗的時已相識,阿梅兩姊妹當時有做老臨,參演過哥哥主演嘅電視劇,好似係《甜甜廿四味》同《對對糊》(後者兩姊妹重好多戲份),今日上網都有得睇返,佢哋當時應該已相約一齊夜蒲……

影射近藤真彥嗰段都缺咗最重要嗰部分:中森明菜。當時近藤應該未撇明菜,其實係三角戀,阿梅知道自己原來係第三者之後先抽身。如果部戲如實拍,相信阿梅嘅心理矛盾可以更大,因為係搶咗自己偶像個男朋友……而近藤對明菜、對女人有幾 PK,後尾大家有眼睇。

男朋友亦欠咗後嚟嘅趙文卓。

不過世人都只會記得想要記得嘅歷史。算。

最後大家只會記得佢係表演天才、義氣仔女,但最後搵唔到「好男人」,結唔到婚,一世遺憾……完。

另一方面,有一啲對部戲嘅批評亦不公,例如話暗示哥哥利用阿梅友情喺《胭脂扣》加戲份,睇返關錦鵬所述,最初套戲男主角亦非哥哥,而係鄭少秋,即係花心老官嫖𡃁妹,十二少戲份亦非常少,主要集中喺現代「鬼尋人」,不過秋官冇檔期,係阿梅主動爭取要哥哥,甚至提交換條件,哥哥嚟嘉禾拍《胭脂扣》,佢去新藝城拍《開心勿語》(當然後者水平差好遠,矮仔做導演),亦的確爭取為哥哥加戲,所以套戲描述正確,係啲人錯讀為哥哥自己爭取加戲。

往事,並不如煙。

編輯推介

    發表意見