立場專題

立場專題

《立場新聞》專題/特寫

2021/5/9 - 11:27

【特寫】「三年後仲喺度」的鏡粉 與偶像亦遠亦近地結伴

這幾天的 Mirror「 One & All Live 2021」演唱會上,成員王智德(Alton)將 2018 年 Mirror 成軍時的一個連登帖子投映到大銀幕上,憶述當年網民種種毒舌批評,由外表到身形、唱功到成員組合都被踩到體無完膚,無人睇好,而他印象最深是那句:「三年後仲喺度先同我講」。

如今,Mirror 和香港一起走進毫不容易的第三年。他們十二人仍在,他們背後的「鏡粉」(Mirror fans 的簡稱)亦一直相隨,人還越來越多。出道第二場演唱會前夕,網傳頭排座位黃牛飛炒到 5 萬至 13 萬元一張;成員姜濤上月底生日,粉絲買下港九各區街頭大電視、持續一星期的電車廣告「曬馬式慶生」。有人說,香港出現久違、甚至是前所未有的追星熱。

Mirror 成員王智德(Alton)在演唱會上重提舊事,答謝粉絲一路相伴,支持他們走到現在。(圖片來源:連登討論區)

Mirror 成員王智德(Alton)在演唱會上重提舊事,答謝粉絲一路相伴,支持他們走到現在。(圖片來源:連登討論區)

廣告

身為鏡粉某程度上卻是辛酸的,不論演唱會門票、CD、周邊產品都是左撲右撲買不到,彷彿被炒家與主辦單位共同欺凌;這些年跟人說你是鏡粉,除了換來一般對追星族的標籤外,四方八面衝著 Mirror 而來的攻擊,也直接波及粉絲們。

被質疑「哩個乜水?」「咁叫靚仔?」是最低消費,更有不少鏡粉在網上呻,追看 Mirror 節目或新消息時被男伴批評:「又睇哩條死乸型?」「嗰隻核突嘢呀?」說話多難聽都有。為何姜濤承諾要以自己的作品保護自己 fans,因為這些指責,他一樣承受過。鏡仔與鏡粉雖然位置不同,卻分享著某種共同的心情和經驗。

新媒體時代裡,明星與粉絲的關係,早已不再是單向、遠距離地展示某種技藝或形象,而更像通過一系列社交媒體操作去營造一種「零距離」的存在;沒參與進這社群的人,無法體會那種 attachment 從何而來。故此單論外表、唱功、演技,外人永遠無法明白鏡粉為何對他們的偶像如此投入;而很多從未受昔日娛樂產業打動的人,卻可以對 Mirror 忽然「入坑」,從此愛得無法自拔,並且一邊感嘆「咁大個人未試過對任何明星咁瘋狂,我都覺得自己黐咗線」,一邊笑言「有人可以令我咁鍾意,係開心嘅。」

Mirror 演唱會 2021

Mirror 演唱會 2021

在 Mirror 以新曲宣告「浩浩蕩蕩迎來另一新世紀」的這個月裡,《立場新聞》透過訪問多位「鏡粉」、廣東歌愛好者及觀察各 fans club 群組,嘗試理解其中的社群互動,以及追星之於鏡粉們,其實是怎樣的一回事。

* * *

觸得到的偶像

Mirror 作為跳唱組合,初出道時大眾的第一印象就是扮 K-pop 、賣樣的「偽韓團」。然而,韓團成員一般十來歲就做練習生,受訓至少數年才出來表演;Mirror 卻都是由〈全民造星〉選秀節目出身,由素人到出道,歷時不過半年。〈造星〉監製及 Mirror 經理人花姐曾在專訪中形容,Mirror 比較像一個「育成計劃」,成員雖說出道了,歌舞演藝卻仍尚待提升,而粉絲們將見證、甚至直接參與「仔仔」們的成長過程。

90 後的 Louis 過往追開日本偶像女團,因為去年發覺〈全民造星 III〉好看而回頭關注 Mirror,在他眼中,Mirror 的性質其實更接近 AKB48,同樣是經歷選拔、在團隊平台下學習,繼而逐漸發展自己專長的藝能領域。「嗰時就係鍾意觀察佢哋(AKB48)由素人一路行到上舞台上的感覺,特別是紀錄片裡面佢哋喊到不堪的片段。而 Mirror 又係那種由零開始慢慢去讓觀眾注意、上位的過程,雖然對佢哋來講係好辛苦啦,但係好好睇。」

2005 年出道的 AKB48 以打造「大眾接觸得到的偶像」為理念,每張唱片均附送握手會門票,故銷量總是輕易破百萬,也幾乎每天在劇場公演。Mirror 則誕生於社交媒體更成熟的時代,除公眾演出和綜藝節目外,還會透過 IG story、IG live,YouTube Channel,Telegram 群組等自行向粉絲發放資訊並直接互動。Louis 最初喜歡上 Mirror 成員江𤒹生(Anson Kong),就是愛看他的 YouTube Channel,有以烹飪為主題的「Anson KIS’chen」,以 Vlog 分享生活和工作花絮,或者跟觀眾玩些小遊戲等,「都係因為夠近、夠輕鬆,而家個社會咁樣,有時想無聊笑下都好呀,其實啲嘢可能真係好鳩的,拍下佢同 Ian 一齊去超市買餸煮飯、佢餵 Ian 飲湯咁樣,你又覺得幾 sweet 喎。」

(鏡粉為紀念 Mirror 成軍兩週年而剪接的〈One And All〉MV,展現成員兩年間的變化、出道首次演唱會時與粉絲們勾手指的承諾等。)

Mirror Fans Club 主要以 Telegram 群組為資訊發放及聊天平台,十二子的粉絲各有群組,成員帳戶由 3000 幾至近萬人。Mavis 在 Mirror 剛出道就開始追,還記得最初公司是叫十二子經營微博去讓公眾 follow,「好明顯就唔會有香港 fans 專登用微博去睇佢哋啲嘢啦,所以當時就全部 fans 起哄,勁嬲咁,後尾聽到民意訴求先變成開 TG group,而且係加埋佢哋本尊喺入面,因為當時佢哋賣點就是親民。」

Mavis 大學畢業不久,2018 年「入坑」Mirror 之前是追韓團的,在韓國生活了好幾年,最愛 Super Junior 和 Block B,密切關注的都有七、八個團。那時為了拍到好照片經營 fans page,估計前後花了二十萬購買攝影器材和演唱會門票。「但其實睇耐咗呢,你就會發覺好多都係一式一樣,越出越悶囉啲團;唱歌跳舞一定有返咁上下,但好無個人特色。對比 Mirror 12 個人,係 12 個都好有自己風格,我諗係因為哩樣嘢令我繼續睇鏡仔。」

韓星跟粉絲距離很遠,那時她通宵達旦排隊霸位,為的只是一見真人和拍照,談不上互動,偶像最多事後在社交媒體發帖多謝粉絲今日來捧場。「所以一開始追 Mirror 時,發覺佢哋本尊會在 TG group 同你傾偈,我係覺得成件事『吓?』咁囉。」她最喜歡的柳應廷(Jer)早期粉絲數目較少,一直到 2019 年都是幾百人內,感覺就是一群朋友在聚天。

「佢通常都好夜先睇,但真係會追 po 睇晒我哋傾過咩,然後就覆我哋、講吓生活近況咁。比如因為佢成日戴帽,有次我哋討論想知佢啲帽喺邊買,佢就話不如搵日開個 IG Live 講吓我啲帽啦。」不過 fans 和偶像的界限仍是存在,Jer 不會跟他們講工作細節、困難心事之類,「至多都係呻兩句,話今日做嘢好攰咁。」

柳應廷(Jer)以前常在街頭 busking,但無人停下來聽。去年 3 月是他出道後首次再度 busking,疫情下仍有眾多 fans 陪伴,一起舉著燈揮手合唱,是 Mavis 支持柳應廷這兩年半以來的最美回憶。(圖片來源:柳應廷 Facebook 專頁)

柳應廷(Jer)以前常在街頭 busking,但無人停下來聽。去年 3 月是他出道後首次再度 busking,疫情下仍有眾多 fans 陪伴,一起舉著燈揮手合唱,是 Mavis 支持柳應廷這兩年半以來的最美回憶。(圖片來源:柳應廷 Facebook 專頁)

從社交媒體上認識偶像,Louis 並不質疑其真實性,「換轉係一般人相處,就算大家係好朋友,其實我都只係睇到佢俾我睇嗰一面。除非係有負面新聞或者發覺佢真係講大話啦,否則我都會當我睇到嘅佢係真實的。」

而 Mavis 則留意到,當粉絲有密切互動時,會無形中有份塑造了他們的偶像,「例如 Jer 一開始的賣點一定唔係 cute,但見我哋講多咗嘅時候,佢可能心裡都諗:『做乜成日話我 QQ 話我得意啫?』咁佢以前其實好少嘟嘴同 wink,而家就成日嘟嘴啦,IG story 又可能影吓自己單眼咁。又唔係話佢做多咗嘅,要利申先,純粹就會覺得,『死仔,知我哋鍾意睇哩啲就係咁做囉。』」

* * *

瘋狂考古之旅

在各 Telegram 群組裡,不時會見到粉絲討論當初為何喜歡上鏡仔,大家都可以清晰說出最喜歡的某次演出、某個節目片段、以至某個被電到的瞬間;但要真正入坑,很多人都經歷過一段「瘋狂考古」的過程,從頭去了解這個鏡仔的性格、家庭背景、參加〈造星〉以來的蛻變、價值觀等。

各 Fans Clubs 的 YouTube Channel 整理了大量演出和訪問片段、IG live(鏡仔通常會在開  live 時談及較多個人的事情)、懶人包等,舊粉絲會教新人怎樣用 TG 功能去考古鏡仔過往跟大家的對話紀錄,以至分享交流在陳年 Facebook、IG 帖文的發現。很多鏡粉是以短短兩三個星期「由朝到晚狂睇」、「J 到凌晨三、四點」、「睇到俾男友詐型 / 個仔呷醋」的狂熱將大量網上材料看完,「第一次睇 IG live 唔係飛住嚟睇」,鏡仔所說的每個細節和表情都不放過,繼而極速入坑,「從來無諗過自己會咁癲」、「我明,我都係咁」。

藝評人查映嵐(Evelyn)近日成為忠實「姜糖」,每天都在 Facebook 開心分享姜濤或 Mirror 的新聞和趣事;由於她一向被視為才女,對演藝文化作品有要求,部份讀者對於她也陷入「姜濤熱」甚感訝異。「我唔理架喇,我要話俾啲人知,就係有好多人鍾意佢哋囉,佢真係好好囉。」Evelyn 說這話時笑到腰果眼,像個剛陷入初戀的少女。

趁夜深人靜,有點想講講昨天。好耐冇用過個腦諗嘢,可能1999。 1. 不過是幾天前,被問到對於「追星」的感受時,我還在說不肯定自己算不算追星喎。對我來說,「追」是一種很physical、很真實的動作,比如是跑去商場活動舉牌(甚至去通宵霸位...

Posted by 查映嵐 Chachacha on Saturday, 1 May 2021

她因為駕車時有聽叱咤 903,所以姜濤和其他成員的歌一早已聽過,談不上特別注意;是今年三月底推出的新曲〈Warrior〉很回應到時代脈搏,她才開始認真了解 Mirror。對於姜濤的熱愛是很多元素加起來,外貌、性格、唱跳表現等,但最關鍵的是她了解到姜濤這個人背後的故事,包括自小因太肥而被欺凌、沒朋友,極度自卑等,是在這個前題下,而看到姜濤「一上台就 command 晒成個 stage,係爆發咁,佢背後付出咗幾多努力?可以想像。」

過去追開劇、從來沒追星的她最近把劇集都放下,一有空就去考古。以前她最迷的明星是日本演員小栗旬,但不懂日文,也沒有太多途徑認識作品以外的他。姜濤卻有一堆粉絲剪輯的影片合集,其中〈姜濤善良暖心小事不完全記錄〉是她的最愛,「有個場合係佢同龍志權(前 100 毛藝人、〈造星〉參賽者)一齊,唔知問個女仔話要揀邊個贏咁,跟住姜濤就在旁邊打眼色,叫佢揀龍志權,個女仔就真係揀咗,龍志權就好開心咁。同埋佢雖然係 Mirror 最矚目嗰個,但受訪時知道有啲隊友無乜機會講嘢就會特登 tag 佢哋講。〈造星 II〉嗰陣佢又好盡力去幫啲組員。我睇完真係喺度檢討自己,『哇,點解我個人咁衰架呢?』」她說朋友看了都盛讚姜濤:「簡直係香港南丁格爾!」

姜濤

姜濤

* * *

不問成敗的陪伴

鏡粉對鏡仔的情感與其說是崇拜,不如說更像見證其成長、並與之同行的角色。Rachel 今年初成為 Mirror 成員李駿傑(Jeremy)的支持者,90 後的她曾在中學時代追過星,對象是何韻詩;但進大學後生活繁忙,熱情就淡退了。今年初姜濤奪叱咤「我最喜愛男歌手」的爭論引起她注意,為了解 Mirror 才找回第一季〈造星〉來看。起初她也沒特別留意 Jeremy,直到 20 強〈我真的受傷了〉的表演,「那個畫面我係好記得,當時我做緊其他嘢,我一望到係即刻停低咗,真係去欣賞個表演,因為佢係唱得好投入好認真。」

舞台上經常走華麗妖冶風格的 Jeremy,平時卻沉默寡言十分低調,在隊友之間扮演默默照顧人的「暖男」角色;尤其在〈造星〉時期,經常被評判忽略或不被看好,「我真係入坑就應該係佢十強嗰陣個訪問,佢喊住咁講,『點解我唔想做個隱形人,都係要變成個隱形人?』佢真係......成日做咗好多努力都無人睇到,爸爸媽媽又好細個已經唔喺佢身邊,佢一個人住,乜嘢都要自己照顧自己咁。」

「嗰下我就覺得好 sad 囉,好想攬住佢同佢講,『唔好咁啦,其實你做得好好架,我哋睇到架。』」

相比柳應廷、呂爵安(Edan)的粉絲喜歡拿他們開玩笑取樂、經常在 TG group 分享他們形象大崩壞的照片,Jeremy 的群組裡則是非常保護他的氣氛。粉絲們都覺得他性格內向憂鬱,很多人是像 Rachel 那樣,抱著一種「好希望佢知道自己係有人支持同錫佢」的心態而加入;而且 Jeremy 自我要求極高,表演走了一粒音都會非常介意,特地在 TG 或 IG 對歌迷說抱歉,又為著未能出 solo 滿足 fans 期待而深感自責。所以 fans group 裡經常見到充滿愛的打氣留言——「無論如何我哋都會陪住你架!」是不時出現的句子;又會有人說希望他快點拍拖,「搵到個愛錫佢的人」。

「作為佢粉絲你真係會戥佢唔抵的。」Rachel 說,Mirror 出道兩年半,半隊人已單飛出 solo,唱功跳舞都不俗的 Jeremy 卻仍一直未獲安排,很多粉絲怪責 ViuTV 把資源過份集中在個別成員身上而忽略他。早前終於有第一個國際美妝品牌找他代言,廣告片拍得很好看,連續兩三日整個 TG group 樂翻天,粉絲們湧去品牌官方 IG 和 Facebook page 留言道謝,又即時去購買和打卡,「好耐無化妝都一定要買。」「我皮膚敏感,不過買嚟送畀朋友啦。」「真係無諗過會咁開心,好似自己個仔終於得咗咁!」

「我不嬲覺得就算好努力都未必會成功,」Rachel 說,「但我喺佢身上係見到,默默耕耘嗰種態度囉。就算第日佢唔再做星,我都會支持佢,因為我就係欣賞佢嘅性格本身,」

風格另類的李駿傑(Jeremy)隨 Mirror 出道兩年半未有單飛安排,但粉絲人數一直穩步上升。圖為他在 Mirror「 One & All Live 2021」上的個人演出〈Monster〉。

風格另類的李駿傑(Jeremy)隨 Mirror 出道兩年半未有單飛安排,但粉絲人數一直穩步上升。圖為他在 Mirror「 One & All Live 2021」上的個人演出〈Monster〉。

* * *

12 - 1 = 0

樂團成軍,然後鬧不和,爭著單飛、競爭,繼而內訌拆夥,環顧樂壇歷史,好像是十分常見的事。Mirror 出道以來不是未曾經歷歌迷間的爭執分歧,也有報導傳個別成員有芥蒂,或隊伍內分了小圈子等。然而,在 Mirror 的 YouTube 片或 Facebook 留言裡,還是常有粉絲說「12 - 1 = 0」,「希望你哋互相扶持一直走落去」、「我愛你哋十二個,加油呀!」

Louis 覺得 Mirror 與外地其他樂團的分別是,基本上沒有屬於 Mirror 本身的路線和形象,不像別的樂團通常有樂團本身的風格,「Mirror 係 12 個人有 12 種不同風格,可能 Jer 係唱歌、Anson Lo 係跳唱,AK 係典型香港男仔 MK 路線嘅、姜濤係偶像派、Ian 係唱作人咁,佢地各自都有自己想做的事,吸納到唔同的粉絲,Mirror 就咁樣透過唔同人去吸納各種投射,以一個好多元的精神代表緊樂壇,亦都承接咗大眾對香港年輕人、同埋香港文化的期望。」

雖然部份粉絲會覺得自己最喜歡的鏡仔被公司忽略,但 Mirror 作為整體某程度上亦對一些較低調的成員帶來助力。鏡粉好容易因為關注自己的「本命」(最喜歡的一個成員)而順帶看到其他成員,「因為無論綜藝又好,同埋佢哋平時 po 的相和 IG stories,都會擺合照,會互相 tag 或者玩來玩去咁,哩啲細微互動都係我好鍾意睇。」Mavis 會因為其本命 Jer 跟 Edan、Jeremy、Anson Lo 常常一起活動,所以連帶看到他們的動態;Evelyn 則因為見到邱士縉(Stanley )很會照顧姜濤所以對他好感度增加等,無形中都提升了較低調成員的曝光。

Mirror 演唱會 2021

Mirror 演唱會 2021

最喜歡姜濤和 Jer 的大學生 Ben 說,除了聽歌以外,每個成員怎樣在這偶像組合裡去相處、面對和發展自己,這過程可說是他關注 Mirror 時覺得最好看的一點。「Jer 本身傾向係一個純歌手嘅,但佢要 fit in 入去,一齊好瞓身咁玩綜藝、學跳舞。又或者姜濤佢最紅喇,但佢一返到去 Mirror 的節目裡時,都會融入返為一個 Mirror 成員,唔去搶人哋的光芒。然後 Edan 可能都等咗兩年去做唔同嘅嘢,今年就到佢發圍咁。」他說,從未見到某個成員特別急功近利,反而 12 個人都很踏實地,逐步逐步在團體裡面發展。

雖然他非常欣賞 Jer 作為歌手的能力,但他不相信獨立發展就會更好,「好現實咁諗,就算唔做團隊,佢都唔會多咗好多時間或者資源去做更好嘅歌,可能又要做好多嘢令自己生存到。所以其實 keep 到逐個逐個咁出 solo,每人每年出三首歌,又有團歌,我覺得已經好好。」

Mirror 演唱會 2021(立場新聞圖片)

Mirror 演唱會 2021(立場新聞圖片)

* * *

追星帶給他們的

在社會崩壞、政治打壓步步進逼的年頭追星,很容易被視為逃避現實。不過對 Evelyn 來說,反而是 Mirror 和姜濤讓她繼續有動力去做各樣事情。上月 Chill Club 頒獎禮上,姜濤豪言「香港歌手一定可以再次成為亞洲第一」,本來懷疑自己繼續寫藝評在這時代裡還有什麼意義的 Evelyn 聽了頓覺鼓舞,「開始想將自己啲嘢做到最好、最頂尖,攞出去同人 battle 都唔輸蝕......俾全人類知道,香港呢個豆膶咁細嘅地方係幾咁勁抽。」她在 Facebook 記下了當時心情。

因為那句說話由姜濤來說,份量變得不同。「佢本身係一個肥毒,屋企又無錢,又好似無乜天賦,可以話係全香港廣大 loser 嘅一員,佢真係可以好無希望架喎。〈造星〉一開始都唔係諗住要捧佢哋,觀眾都係覺得樂壇已死架喇,只係打算睇人出醜咁。但佢就係通過自己不斷的練習、努力,最終可以企到喺台上面,against all odds 咁做到一啲成績出嚟。我諗而家無論係我自己,或者我身邊的人,都係好需要哩種敘事。」但是否相信姜濤和 Mirror 能做得到?「我覺得好難,但唔係無可能。如果你連哩個諗法都無,就一定做唔到。」

對 90 後的 Anna 而言,最初她喜歡 Edan 只是因為見到他在遊戲節目《膠戰》裡搞笑、或玩 IG 時非常「兒登」的一面,後來才慢慢在各種訪問和 live 中發現他懂得鋼琴和小提琴、以及對自己作品的認真,「佢可以好無偶包咁反晒白眼,亦都可以好似〈E 先生〉咁鋼琴王子 look。」這種反差令她深深入坑。

(零偶像包袱的 Edan 經常自毀形象做各種搞怪演出,為隊友和粉絲們帶來無窮歡樂。)

隨著人氣和工作增加,大部份鏡仔都沒法經常在 TG group 與粉絲互動了,但 Edan 每日早上或中午,總會 send 一個「長輩圖 x 兒登風」的早安 / 午安 sticker 出來跟大家問好,即使忙到像演唱會這幾天都沒遺漏,那是 Anna 和粉絲們都很期待的一刻。每日關注鏡仔的 IG,看看他們今日的工作、去了哪裡、自己個 IG story tag 了他他看了沒有?感覺到他跟自己同步地生活在一起。「之前佢哋拍大叔的愛,日日都好夜收工,跟住好早又開工,真係好辛苦,好佩服佢哋的堅持。咁我人生有時唔如意,都會諗,其實 12 個鏡仔都咁努力工作,我自己都要努力呀,諗嘢唔好咁負面囉。」

Jer 近期已很少再在 TG group 發言,但他的粉絲還是延續當初無話不談的氣氛,可說是 12 個鏡仔群中最熱鬧有愛、話題又最多樣化的一個,不止圍繞著 Jer 或 Mirror,其他流行或獨立音樂、個人生活、食喝玩樂、社會時事都會討論,早前甚至出現大群人一起談論本土文學作家董啟章、陳慧和韓麗珠的奇景。

Mavis 說,追柳應廷以來最大的得著就是認識到一群可以交心的朋友,除了線上討論,線下也會相約聚會。甚至演唱會前交收應援物資,一些較新加入的粉絲取貨後意猶未盡,互相提及網名相認,結果 20 幾人分成幾圈就站在街頭傾了五小時,「係呀,就係講柳應廷講咗五個鐘,成日會無啦啦有哩啲意想不到的傾偈環節出咗嚟。」

「同埋竟然有人同我討論廣東歌囉,唔係討論韓團、唔係討論台灣明星,係討論廣東歌!」儘管她都曾經真心喜歡韓團,也熟悉韓文,但母語的力量就是不一樣,「你聽或者睇到歌詞的感受一定深啲,好容易跟住唱。然後鏡仔啲互動同埋話題,你一定會覺得比睇韓星貼地,所有笑話你都聽得明。」在 Mavis 的學生時代,她感受到跟人講自己聽廣東歌是一件落伍甚至丟架的事,以至最初由追韓星變成追 Mirror,都承受過不少奇異目光,

「但而家問我,我係可以好自豪咁同人哋講,我鍾意哩隊架,你睇佢哋幾勁?帶起咗成個香港樂壇呀。」

Mirror 演唱會 2021(立場新聞資料圖片)

Mirror 演唱會 2021(立場新聞資料圖片)

文/林茵

攝/Nasha Chan