立場新聞 Stand News

被糟塌的《太平紋身店》

2021/2/6 — 16:50

ViuTV 劇集《太平紋身店》劇照

ViuTV 劇集《太平紋身店》劇照

【文:Dylan 中雷狗】

ViuTV 嘅新劇《太平紋身店》終於完咗,其實我真係好耐好耐都冇追過電視劇,因為我對每一套劇都好 commit,但偏偏香港嘅電視劇就真係每日播一集,密到我 miss 一集都會俾人劇透,所以點好睇都好我都好少夠膽追嚟睇。

但 ViuTV 嘅《太平紋身店》好早之前知道有黃德斌已經好想睇,其實除咗某啲配角演技參差啲令到我有啲出戲之後,整體都算係幾好,但亦都睇到香港電視劇嘅悲哀,因為我喺幾乎每一個細節上面都見到非常大嘅潛力,呢個劇本如果有更多時間、空間、資源去發展嘅話,絕對可以成為一代嘅經典電視劇,可惜始終佢都係畀人糟塌咗,畀呢個香港糟塌咗。

廣告

一套電視劇,其實應該話任何類型嘅連載式故事,最重要就係要有懸念畀人追落去。製造懸念而言最常見當然係用「主線劇情」,就好似柯南嘅黑衣組織線咁,背後主角一定有一個好具深度嘅故事。《太平紋身店》劇本設定上就係類似呢一種美劇式設定,主角背後有啲故事,又會牽連到啲大角色諸如此類。

一個具深度嘅伏線基本上係冇咩可能短時間解決到,所以有睇美劇嘅朋友都見好多時第一季都冇機會真正揭穿到背後嘅大陰謀,甚至乎皮毛都掂唔到,可能最多知道神秘組織嘅名,第二、三季先有第一次嘅決戰,短嘅就第四季開始全季解決主線,長嘅就第四、五季先知道原來局中有局,如此類推。

廣告

但一個劇集亦都係需要有日常路線、單元式故事嚟到支撐,一嚟係塑造角色性格,令到佢更加立體。二嚟係要建立觀眾同角色之間嘅連結。任何戲劇性作品都一樣,一個角色寫嚟有冇用就係睇佢對整體故事有咩貢獻,或者係佢受唔受喜愛,基本上同一隊波一樣,一係就關鍵球員,一係就吉祥物。

亦都正正係因為咁,香港咁多劇集一路以嚟,都好難做出呢類型嘅劇集。外國劇可以準備同播出嘅時間都較為長,變相劇本上有好大嘅空間比佢哋做舖墊,但係香港就係要好急速咁播哂,連畀觀眾消化劇情嘅時間都冇,更遑論可以有長遠電視台計劃去播幾多套或者幾多季電台劇。

所以去到最後,香港嘅劇一係就個故事可能真係好好睇,但大家就會完全唔記得咗個有啲咩角色存在過,角色唔夠立體,唔夠吸引到觀眾,因為全套戲就係為咗呢條主線服務。就好似《天與地》同《心戰》,兩個故事都舖得好好,但我諗大家唯一記得嘅角色名就係家明,所以變成「叫好不叫座」,因為唔會有嗰組 fans group 效應。

所以香港最常拍嘅,就係好似啲日韓劇拍啲情情塔塔,多多感情少少陰謀。因為邊個鍾意邊個,邊個同邊個係老死,邊個想害邊個,觀眾同編劇好容易掌握同處理,跟住落嚟就係寫一啲日常情節等大家記住同愛上啲角色。

今次嘅《太平紋身店》其實係介乎喺兩者之間,佢似乎有一條主線劇情,但去到尾都係每一個角色嘅故事,但中間又會有啲微妙嘅連結。但為咗遷就十五集濃縮形式嘅港劇,逼到每一個故事都要扯到好快節奏,所以亦都出現咗好多故事都係「講」出嚟而唔係「做」出嚟,我相信呢樣未必係編劇導演功力問題,反而係港劇本身嘅特點局限咗佢唔可以做太多具深度嘅舖墊。

大家以前對劇集嘅追求根本唔係咁多,純粹有啲嘢睇吓娛樂吓,所以好普通嘅肥皂劇模式已經滿足到大家。只係隨住時代轉變,大家對劇集同娛樂嘅要求高咗,而且有外國劇集做對比,講劇情舖墊又冇得同歐美劇比,講情塔劇啲角色又唔夠日韓咁有魅力,所以港劇早排先長期被比下去。

香港觀眾食開呢啲 TVB 模式劇集奶水大,自然睇劇就惰於思考,大部份人都係會想睇番啲簡單直接嘅戲。即使編、導、演都可以做到啲更有深度嘅鏡頭,都會因為市場限制放棄咗。就好似池木森嗰集佢着住一件染血嘅衫入去,但佢嘅故事話係焗死佢老婆;Wifi 假死之前,佢老闆特登將個酒樽擺入佢件褸入面。其實係寫得好好嘅小伏筆,但佢最後都係要用對白嚟篤穿佢,嗰種感覺就好似係:「唉,驚你哋睇唔明,加番畀你哋睇啦。」

其實我喺《太平紋身店》入面見到嘅係導演識得運用鏡頭處理細節,編劇懂得處理一啲故事嘅小伏筆,演員亦都好控到場。香港嘅編、導、演配套係絕對足以支撐更具深度模式嘅劇集製作,有部份觀眾亦都準備好睇呢類型嘅劇,欠嘅可能就係一個理想嘅創作環境。


好多人對呢套劇似乎都有好多批評,例如講邊個邊個演員嘅問題,邊個位劇本寫得唔夠好之類。但我好同意一位同好所講,其實呢套劇好多方位試緊好多唔同嘅嘢,如果你當佢係實驗劇場同 cult 片咁睇觀感就 fit 哂。

其中一樣試嘅當然就係題材,早日有位高登作家開 live 打文,講起覺得呢排香港網絡小說冇咩好追,其中一個原因就係啲劇情同概念太似,同埋好明顯大家唔算好鍾意玄幻劇情,畢竟香港就係一個冇幻想、冇夢想嘅地方。

但《太平紋身店》入面偏偏有兩集就用咗科幻題材,穿越時空同靈魂,喺一個咁貼地嘅設定入面好大膽咁插入呢啲元素,係一個好新穎嘅嘗試,畢竟香港觀眾都係好有主見嘅觀眾,好鍾意問點解同話你唔合理之類。

除咗玄幻之外佢哋亦掂咗好多大膽嘅題材,以前香港電視劇講同性戀者已經好踩界,今次有戀屍、劈友、湯家驊等等嘅元素喺入面,除咗大膽之外都冇咩好補充。

我個人嚟講係非常欣賞,而且佢亦都好識得喺呢啲題材上面搵番啲壓到場嘅演員,需知道越玄幻同踩界就越需要啲演員有說服力,我個人覺得尤其上述嗰幾個故事張力係好夠,睇落起碼我相信到呢個故事。

其實佢每一個故事都好有潛力,試諗吓如果呢套係美劇季度型式,每條主線分拆做唔同季數,拍出嚟一定會好睇好多。好簡單,如果成季都係處理白玫嘅事,去到第一季嘅尾先見到佢推文泰出嚟,嗰吓已經好震撼到觀眾,再帶落去可能 Wifi 條線落第二季,多啲時間處理佢嘅音樂心路歷程,個故事一定會好睇過家陣。

主線劇情大家會覺得比較薄嘅原因,係要喺一集之內建立到一個深刻嘅感情線係相當之難嘅事。例如子彈喺軍營被革扯、加入暗殺組織、遇見孟璇愛地天崩地裂、同組織反面,要喺 3/4 集之內拍哂,連去決鬥都係一節內要完,冇任何一個編劇可以喺咁短時間內建立到一條完全令人信服嘅線。而且好明顯編劇好想嘗試將唔同故事線拉埋一齊去主線到,但係最後都係失敗咗,只能夠好似《龍珠》咁每人借啲力量畀 Nana 咁,呢點的確比較可惜。

所以歸根究底就係空間唔夠發揮嘅問題,尤其當你要處理主線人物嘅情感關係嘅時候,一定要多啲「日常劇情」去支撐。太平街嘅街坊,唯一一次唔係處理緊劇情而有日常嘅時間,就係白玫嗰餐飯,之後已經又急急腳返主線,試問咁佢哋又可以點喺觀眾面前建立關係?編、導、演可以喺咁短時間內處理到呢啲劇情令到佢成為呢個成品,我個人係收貨有餘。所以喺呢度都要讚一讚套劇嘅音樂設計,好多快轉場景都係靠音樂去襯托,今次嘅配樂真係選得非常好,抵讚。

主演嘅幾位大部份人嘅發揮都幾好,張松枝、黃德斌呢啲我唔讚太多,大家有眼見。林德信某幾場都做到應該做嘅效果,但始終佢本身講中文唔太好,限制咗佢無論講對白、代入角色同演都好吃力,譚凱倫本身讀對白唔夠抑揚頓挫,亦都係有進步空間。有幾位配角係好到嚇親我,包括牙 Tank 同陳子豐,尤其牙 Joe 嗰集真係好睇到痴線。

結局嚟講……其實呢套片都有好多位本身啲對白都好 cult,少少美劇式幽默嘅感覺,龍妹無啦啦斟完茶裝香畀姜 B,愛嘅反面係反面之類。咁好明顯成套嘢就唔會係白卡強 FF 出嚟,純粹就係話你聽所有故事已經完咗回歸平淡,只不過佢表達方法有啲太鳩咁解。

可能大家見到呢篇點解好似好多都係讚而唔彈,最主要原因就係我始終都係當佢係實驗劇場咁睇,研究佢有咩可取嘅地方,同埋我真係好投入去睇呢套戲。現世嘅睇劇文化就係大家都鍾意睇到咩,見到有咩特別嘢就去論壇 live post 討論分享見解搵存在感,如果你睇劇每一刻都係為咗搵啲咩係「值得討論」嘅話,你又點可以好投入咁欣賞哂成套劇呢?

所有劇作家、演員都係說書人,佢哋都係希望大家要相信佢哋講嘅故事。但你一開始就冇諗過投入去睇、去信,咁其實佢點講都冇用。

唔同嘅社會環境係會令到唔同地方出產唔同形式嘅劇集,香港家陣呢個環境,究竟可以點創造番啲好睇嘅劇集呢?喺今次《太平紋身店》入面,我睇到嘅係創作人為咗呢樣嘢嘗試同努力。

或者有陣時呢啲創作需要嘅,係多啲欣賞而唔係批評,或者大家可以試吓,多啲學童童同阿冰咁,同其他人講番句,「你做得好好呀。」

 

作者自我簡介:9up、講馬、咩都睇吓。作者 Facebook / MeWe

發表意見