立場新聞 Stand News

見證新時代出現 只有我哋可以左右時代發展

2021/1/3 — 10:00

per se mv @中大二號橋

per se mv @中大二號橋

今屆叱吒,我覺得可以理解為舊一個時代完全退下,新一個時代上場嘅分水嶺。再冇依靠 TVB 而出名嘅明星﹙除許廷鏗,但佢拎獎都同 TVB 無關﹚﹑以前見頒獎禮見慣見熟嘅歌星完全冇晒,喺演藝界北移﹑成日講青黃不接嘅年代,今次叱吒係具有指標性。

我細個時(即係三十年前),電視 aka TVB 係捧紅一個歌手嘅最重要途徑。當時大家聽新歌途徑唔係電視就係電台,但要見到個歌星個樣,唯有電視。唱主題曲、拍劇上勁歌金曲、每日播新歌 MV、仲有各大型節目,歌手要紅,好難唔配合 TVB。

但尋晚嘅叱吒,就宣佈咗 TVB 已經同香港樂壇再冇關係。TVB 仍然沉醉喺自己嘅系統入面,要自己旗下(星夢)嘅歌手拍劇唱主題曲再年底勁歌頒個獎,就好似捧紅咗個歌手;但難聽啲講,已經越嚟越似係自己行埋一邊玩手指,其他人 wfc。

廣告

其中一個原因,就係 TVB 拒絕去連結呢個時代,無辦法同巿民大眾同呼同吸,又點會收穫到支持?許廷鏗有《無力感》、林二汶有《最後的信仰》、Rubberband 有《漫長》、Dear Jane 有《銀河修理員》、per se 有《粉粹糖果屋》,仲有今次唔知點解冇得獎的方皓玟有《人話》,都有意地 address 香港人嘅情緒;而 《全民造星》《男排女將》,就講緊 underdogs 點樣努力逆轉命運,真誠之餘,亦同香港人有共鳴。有共鳴,先會有感情,唔通我吸緊催淚彈而你做護旗手我仲會鍾意你咩?

TVB 同一條橋用四十年,唔理呢個世界已經變晒,點解仲會覺得方程式行得通?甚至,TVB 其實喺度浪費緊自己旗下歌手嘅生命。到底上一個靠 TVB 紅嘅歌手係邊個?林峰?我真係諗唔到。好嘅歌手離開 TVB 可能仲可以更有生命,許廷鏗就係好例子。

廣告

我呢個年紀嘅人,其實已經好少會被動地聽新歌(即係後生時你就算唔主動去搵歌聽,都自自然然會聽到),未聽過新歌同新歌手係好正常,講真我都係尋晚先第一次聽姜濤唱歌。不過如果我地成日都話支持香港本地文化、唔想所有藝人都要向北移/舔/跪,倒不如我地主動啲去了解同支持香港本土藝人,電視電影音樂遊戲 youtube 咩都好,俾機會佢地成長同發展。就好似舊建築咁,你喺佢 50 年時就拆咗佢,咁呢個地方就永遠唔會有五百年歷史嘅古蹟。如果我地俾到足夠空間佢地成長,你又點知姜濤十年後唔會成為張國榮、游學修唔係下一個張家輝?唔好忘記,張國榮都曾經喺台上俾人噓俾人睇唔起、張家輝都做過亞視啊。

我地見證緊一個新時代出現,而只有我地先可以左右佢點發展。

發表意見