立場新聞 Stand News

評論《幻愛》的評論:你有幾愛惜香港電影人?

2020/7/10 — 18:22

圖片素材來源:《幻愛》劇照

圖片素材來源:《幻愛》劇照

見不少人在評論《幻愛》,我嫌唔夠嘈,我想再嘈啲……因為近排啲相關評論睇到我目瞪口呆。

首先,我係用睇愛情片方向去睇,我份人本身難以被愛情片觸動嘅。但戲裡面有一個位的確觸動我 - 就係人究竟要幾盡,面對有幾極端嘅事,先會卸下自己嘅防衞,向對方赤裸(心靈上呀)。而兩位其實唔係懼怕對方嘅過去,而係惶恐自己嘅過去會傷害到對方,或者真係有啲「精神病」先做到。吖?齣戲不正是講關於情愛的精神病嗎?

你話好好好睇,未算,但ok嘅,如果硬要比較同期港產片,我比較鍾意《金都》多啲啲啲添。主要原因,係我覺得《金都》導演,顧慮少啲,包袱少啲,做緊啲佢應付到嘅事情。但《幻愛》導演周冠威,我覺得佢顧慮多咗,否則唔會有啲無謂配角去解說背後種種。如我之前所講,我相信呢位導演留白嘅能力,多啲留白,齣戲短啲,會好好睇。而家的確有坐旅遊巴去西貢嘅感覺,有機會路面不平,或令人暈車浪,但程車嘅風景係ok, 要去嘅地點都怡人。

廣告

導演嘅包袱,可能係介懷觀眾明白不明白,而觀眾都大機會有包袱,就係《自焚者》呢三隻字。不論在初上映時,大家高呼黃色導演就要支持的呼籲,到後來大批失望而回嘅一眾文化人,評論就越變兩極。但令我惆悵嘅係,不論讚或彈,啲評論都無助導演更進一步。讚嗰班,的確自我合理化咗戲中唔通順嘅位,但呢啲位是導演尋找進步空間嘅方向。彈嗰班,佢哋好多篇評論都令我有「喂,你想點呀?」嘅感覺,有一部分評論關於女性自身同父系社會乜乜乜。我唔詳細評論,但若你認為拉倒父系社會嘅方法,係以建立一個母系社會嘅方式進行。對唔住,你行開啦,你真係煩得嚟又無建設性。另一種評論係,感覺跟《自焚者》震憾程度落差大,你預期導演可以做更多,於是說了一堆似是而非的批評,我又心諗「喂,你想佢點呀又。」會唔會係你放得《十年》太高,看得《自焚者》太重呢?

而當呢啲評論面世,惹來一班人來反駁時,評論者就會留一句無敵說話:「唔!都知大家都有唔同意見,真係好喇,樂見大家咁熱烈討論港產片。」

廣告

我不如覆你一句:「我頂你個肺呀?」

《幻愛》、《金都》甚至《叔‧叔》, 其實都值得去有一啲像樣一些嘅分析同評論。香港已經咁,香港電影去到死咗化骨嘅程度,請問仲花得起幾多時間作無謂嘅討論同分析?你篇評論又其實幾幫到位導演,去做下一齣更理想嘅作品?還是,你覺得佢哋無potential?

有朋友專愛看舊港產片,她說過往的垃圾港產片何其多,一部經典隨時滿片沙石像地盤,但以前的觀眾包容度高很多。 近年的港產片,即使有沙石,但絕對談不上爛,甚至比以前的好得多,但總是有人拿那些少沙石嫌三嫌四。我認同,但不只現在和以前的港產片相比,很多評論人對外語片異常有厚度,過往一年有多少外語片都搞到我不明不白,他們會說這是想像空間。放在港產片的話,就叫漏洞喇。

我記得睇完呢高登三寶後,都係「呀」一聲離場,然後覺得香港有呢啲「新」導演真好。唔係話佢哋已經一步登天,但至少唔再係一池死水,大概因為經歷呢一年啦,呢㮔感覺我睇《淪落人》後都無。

而你有幾愛惜香港電影,幾愛惜香港電影人?一篇評論有無愛,係好易睇得出㗎。所以唔該,為自己嘅評論負多啲責任呀。

 

p.s. 如果你想體驗咩叫地獄,去睇《死因無可疑》啦。

發表意見