立場新聞 Stand News

陳木勝的怒火街頭

2020/8/31 — 15:01

電影《衝鋒隊:怒火街頭》劇照

電影《衝鋒隊:怒火街頭》劇照

陳木勝病逝,除了重溫《危城》,早兩日我發現 Netflix 有《衝鋒隊:怒火街頭》,而我只係睇過一次,唔記得哂,於是立即翻睇一次。

久違了的警匪片,那場啟發自西片《Heat》(盜火線)的街頭槍戰,令這套戲成為陳木勝的 signature 之一。片中那個關 Sir 同劉青雲飾演的朱華標之間的衝突,其實就係《保持通話》張兆輝和張家輝的原型吧!

片中警察,個個正氣澟然。衝動如劉青雲,處處為市民着想,即使在追悍匪「教授」(于榮光),見到有個大肚婆瞓咗喺度,毫不猶豫先去救佢,而唔係不顧係女人係老人定係細路,一棍就扑落去,向住塊面直射胡椒噴霧,見到佢哋受傷唔畀急救,遲遲唔 call 救護車,甚至知道有大肚婆畀白衣人打,仍然走出嚟指鹿為馬維護暴徒。

廣告

今日身為愛國政協的陳小春,飾演那個十分重視紀律的警員,滿口都是「我哋係警察,最重要係紀律而唔係個人主義,我哋要顧住警隊嘅形象……」,再睇返現實,邊隊係最無紀律嘅紀律部隊,大家心照。

係,套戲裏面架 Car 2 成隊都違反命令,毫無紀律,但佢哋違反紀律係為咗撲滅罪行,今日現實那些違反紀律嘅係為咗撲滅香港嘅未來。

廣告

片中還有個配角吳鎮宇,當時佢休班去飲酒,點知撞正罪案,鍥而不捨去追賊而送命。在後來的《保持通話》,張家輝追查古天樂單案嘅時候,是個休班警,陪老婆買緊餸。

休班警,唔係去犯案,係去破案!

2019 年同樣的怒火街頭,角色調轉了,一切都不一樣。

看着看着,或者大家都在暗罵:陳木勝把警察寫得太好了,簡直脫離現實,是要洗白嗎?他們根本就是一班……

慢着,我一路看也一路閃過這種想法,但看到最後一幕,守住石崗軍營的,不是解放軍,是英軍,我恍然大悟:陳木勝沒有刻意把警察寫得太好,片中那群警察,仍然叫「香港皇家警察」啊!

8 月 31 日,不妨上 Netflix 重溫這套戲,觀後感正如監警會主席梁定邦為其寫的報告作結:有咩結論見仁見智,各取所需:

(1) 你可以當作懷緬港英八十年代後的警察風姿;(2) 你也可以當片中警察是黑警 — 片中被打傷打死的警察超過 100 個,而其中一個操刀的,是黃秋生!

 

作者 Facebook

發表意見