靜啦。那些要觀眾收聲嘅電影 — 《禁室殺戮》《無聲絕境》

《禁室殺戮2》入面殺人唔眨眼嘅盲翁,同《無聲絕境》入面嘅外星怪獸有咩分別?就係佢哋都好適合擺係戲院入面,睇下仲有無人敢唔熄電話入場。

雖然呢個只係一個 Bad Joke,但相信每一位喜歡睇大銀幕嘅戲迷,都曾經內心交戰過一千次,到底每當有人係戲院高談闊論兼Check電話嗰陣,應唔應該出手制止呢?

除咗大家聽到耳熟能詳,百老滙嗰首「唔該熄咗你個電話啦」嘅名曲,其實電影工作者都有為維持電影院嘅寧靜而作出努力同嘗試(至少間接地發揮作用)。好似《無聲絕境》、《禁室殺戮》呢類型嘅「滅聲」電影,大玩「無聲勝有聲」嘅緊張驚憟元素,縱使唔係啲咩新發明,但最緊要奏效嘛。

《禁室殺戮》《無聲絕境》兩套戲貴為近年創意先行,兼刀仔鋸大樹嘅新作,巧合地近期雙雙迎來新嘅續集,大家又覺得有無打「破續集總是爛」嘅魔咒呢?

其實,「一出聲就死」呢條橋唔算新,係以往嘅《異形》《侏羅紀公園》中都經常用到(尤其係小朋友角色)。如果要分析點解《禁室殺戮》《無聲絕境》係成功做出一個「滅聲」電影系列,很大程度上係因為電影音效同配樂都好徹底地配合「無聲」呢個主題,講求的是一種極致克制嘅氛圍處理。

要跑要走佬嗰時,當然可以打鑼打鼓;但應該安靜嘅時候,就要靜到連一支針跌落地都清楚聽到,從而令人感官在「虛無」之中異常放大,呼吸都要就住就住,產生如坐針氈嘅焦慮感,從而全情投入至電影嘅情緒過山車之中。

《無聲絕境》續集落咗畫就唔講喇。 《禁室殺戮》續集即將上映,新一集繼續由好打得嘅盲翁撐起成個「靜局」,不過今次唔同上集嘅係,盲翁唔係面譜化嘅壞人,舖陳出嚟反而有幾分「主角格」(Protagonist),亦正亦邪,方便觀眾融入盲翁嘅視角。

但如果大家是衝著第一集所營造出來嘅緊張氣氛而入場,好可能會失望。事關今集一啲都唔靜,血腥鏡頭升級,但就失去咗第一集嗰種 Don't you dare to breathe 嘅驚憟感,或者同導演野心有關,又或係當盲翁做主角,寂靜就係對我方有利嘅因素,唔再驚嚇,觀眾亦會因而肆無忌憚。

指標係,優先場當日有幾個觀眾喺唔同距離講嘢都唔係聽得好清楚內容,雖然以戲論戲嚟講,當中有幾幕唔敢出聲嘅長鏡頭都調度得精巧緊湊,最後一個場景更令人諗起《blade runner 2049》嘅色彩運用,以娛樂片嚟講絕對唔差。但如果你同我一樣,期待一套唔簡單,甚至對觀眾有教育意義嘅電影嘅話,《禁室殺戮2》就顯有啲可惜了。

 

作者網誌

編輯推介

    發表意見