立場新聞 Stand News

香港樂壇未死

2021/2/8 — 12:38

《樂壇已死》MV

《樂壇已死》MV

【文:香港流行文化愛好者】

每年樂壇頒獎禮之後,都總會有好多人出嚟話廣東歌樂壇已死,拎獎既歌手佢地聽都未聽過,無人會再聽廣東歌等等,但係近年越嚟越多人出嚟反駁依啲批評,近日更加有一班音樂人出咗首《樂壇已死》嚟反諷依班只懂批評既「樂迷」。縱使香港樂壇無 90 年代既咁光輝,但係都仲有好多高質素既作品、有實力既歌手同音樂人、一班忠實既樂迷,香港樂壇絕對未死。

只有情歌?

最多人批評現今香港樂壇既一點,就係近年既廣東歌都係慘情歌,同以前多元化既樂壇無得比。無可否認,情歌係依家香港樂壇佔據最重要既席位,畢竟每個人都總會有佢既感情煩惱,聽情歌正正佢地抒發感受最好既方法,正因為市場有咁大既需求,出情歌會係音樂公司同歌手最穩定可以賺到錢既方法,所以主流既廣東歌都會用情歌做主題。

但係係咪代表香港樂壇只有情歌?絕對唔係,近年有好多歌手都有嘗試唔同類型既作品,由親情友情到社會事件,佢地既 hit rate 未必有主流情歌咁出眾,但係絕對有質素,好似方皓玟既《人話》同林二汶既《最後的信仰》都係講社會事件,但係風格同帶出既信息都好唔同。而近年更加有唔少既歌手唔再用情歌做主打,例如 Serrini 就以比較「騎呢」既風格,配合有趣味既歌詞去吸引聽眾。就算係天皇天后級既歌手,近年都出咗唔少非情歌既作品,好似鄭秀文既《我們都是這樣長大的》、古巨基既《初心》 ,依家既樂壇其實仲係好多元化。

依家啲歌手我都唔識既

上面依句都算係唔少人批評廣東歌既口頭蟬。無可否認,依家當紅既歌手唔少都已經出道起過十年,香港樂壇曾經有幾年係出現過青黃不接既狀況,但係隨著viutv既興起,同埋更多平台比歌手推廣,近年既新人可以話係百花齊放,實力派有林家謙,非主流既有 serrini,偶像組合有 mirror,而 mirror 入面單飛既成員各有風格,由 Anson Lo 跳唱到 Ian 主流情歌,可以話滿足到唔同口味既觀眾。單單講最近兩個星期,都已經有幾個歌手出咗新歌,好似 Mirror 既Edan、Error 既肥仔、造星3 既陳葦璇,林家謙都出咗一首 cover,依幾首作品喺短短幾日之間已經有唔錯既點擊率。Edan 既《E 先生連環不幸事件》更加上咗 YouTube 熱門影片既第一位,可見依家既新人得到唔少樂迷既支持。

咁點解有啲人會覺得香港樂壇無新人?其實係因為佢地好少去聽,每年只係睇頒獎禮結果,甚至仲係靠 TVB 嚟聽新既廣東歌,咁當然會錯過好多優秀既作品。依家大部分歌手都會將佢地既新歌放上 YouTube 同音樂串流平台,又或者 viutv 既 chill club 推介,都係一個好好既平台比香港市民去聽新既廣東歌。

TVB

TVB 係近年比人感覺香港樂壇已死既一大原因。喺八十年代開始,TVB 的確出品過好多出色既劇集歌,好多巨星都係靠佢地既劇集歌入屋,勁歌金曲都曾經係無數樂迷接觸廣東歌既最大渠道。可惜既係自從 tvb 同四大唱片公司鬥翻之後,tvb 劇集歌同勁歌金曲既質素都一落千丈。近年既劇集歌可以話係完全無特色,唱嚟唱去都係嗰幾個佢地旗下既歌手,而且每首歌又好類似,加上全天候不停播,音樂節目又係唱個幾首劇集歌,基本上屋企有開電視既觀眾都聽到有啲煩。好多香港市民,特別係上咗年記既聽眾,就因為咁覺得依家既廣東歌只有依種單一、質素唔高既作品,所以就會有樂壇已死既感覺。

不過 TVB 依家對樂壇既影響力已經日漸下降,從每年勁歌金曲頒獎禮變咗自己公司圍威喂,到自家製既音樂節目越嚟越少人關注,都可以睇到廣東歌既聽眾已經唔再重視 TVB。

總結

比起張國榮、梅艷芳,四大天皇等等歌手當紅既黃金時代,依家既廣東歌的確無受到咁多既關注,畢竟依家好輕易就可以聽到唔同國家既音樂,加上廣東歌既市場唔大,有唔少歌手同音樂人都傾向做國語歌。不過咁樣絕對唔代表廣東歌既質素無以前咁好,更加唔代表廣東歌無佢既價值,予其去不停挑剔廣東歌種種既不是,倒不如去發掘一啲啱你口味既作品。近年,廣東話既地位慢慢被邊緣化,廣東歌喺依個時代更顯重要,如果你想保育廣東話同香港既流行文化,,就由今日開始留意多啲廣東歌啦!

作者簡介:一個鐘意香港流行文化既後生仔,得閒會寫吓文用大眾既角度講吓廣東歌、香港既電視節目同電影,希望未來有多啲香港人留意香港流行文化。

Facebook Page: https://bit.ly/2NWQCji 

Medium:https://hkpopculturelover.medium.com/

廣告
廣告

發表意見