立場新聞 Stand News

「香港要同全世界比」嘅志氣

2021/4/21 — 16:46

香港要同世界比。

噚日睇四台聯播,最感動嘅莫過係見到熊仔頭講嘅一番說話。

「香港嗰個網絡影片開始嚟緊,係可以大到佢係代表香港嘅 media。」

廣告

「好囂呀呢一句。」

「但我會希望嘅係,如果香港拎套嘢出去比,係有得打嘅,就係咁簡單。」

廣告

(同乜嘢打?)

「全世界。」

坦白講,如果唔係游學修促成咗香港史無前例嘅 YouTube 四台聯播,由於政治工作太忙,我都已經有一段日子冇㩒入香港 YouTube 嘅台了解香港網絡生態嘅新發展。但噚日我相信令好多人搵返中學時睇 YouTube 嘅嗰種青春同悸動,諗返起嗰時同一班中同睇《男人有話兒》系列嘅回憶。如果唔係四台合作帶嚟嘅震盪同協同效應,我好可能都唔會接觸《小薯茄》同《啱 Channel》嘅片,亦都唔會重新睇返已經好耐冇睇嘅《FH Production》。噚日之後我絕對唔擔心佢哋會裹足不前,相反佢哋一定會越做越好,因為佢哋嘅野心,大家講嘢之間嘅嗰團火好明顯冇熄到。

前一晚姜濤先至要話佢哋年青一輩嘅香港歌手要重新成為亞洲第一,然後噚日呢班熱血青年就話要令香港網片同全世界比。各位香港人,我哋香港有幾耐冇聽過呢啲有志氣嘅說話?當我哋過去聽得最多係政府行出嚟話我哋而家同中國冇得比,香港已經冇優勢,年青人要上大灣區先至可以有競爭力,但有一班人佢哋留守香港,為嘅唔係曉以大義嘅政治理念,而係用返最平常最貼地嘅方法,嬉笑怒罵地,默默打造返香港呢個最好嘅品牌,用行動展現香港嘅價值。

喺呢度我好希望呼籲各位成長喺上世紀六、七十年代,見證過昔日黃金歲月嘅香港人,唔好貴古賤今,嘗試認識同接受新一輩嘅夢想,支持佢哋創造新時代嘅新香港。喺任何時候,只要可以將任何事都做到極致,嗰個就係藝術。佢哋唔會可以拯救香港,但每個人行多一步就可以。

憑佢哋呢個志氣,憑呢份努力,憑佢哋不知天高地厚嘅勇氣,好希望各位香港人可以俾佢哋一個機會。重新證明返,香港唔係已死,佢會用另一個方法活下來。喺幽暗嘅時代,無限嘅花火正在迸發出來,香港人你哋見到未?

希望大家多多支持:FH ProductionArm Channel TV試當真 Trial & ErrorPomato 小薯茄

 

(標題為編輯所擬)

作者 Facebook

發表意見