立場新聞 Stand News

香港電視業界無法脫離大台思維

2021/2/16 — 18:03

資料圖片,來源:PublicDomainPictures @ Pixabay

資料圖片,來源:PublicDomainPictures @ Pixabay

一、曾志偉回歸

認真的分析,撇除個人品格操守問題,例如成日遲到同埋下刪 300 項,老爺(編按:曾志偉)當年的確準確地掌握本港影視產業的脈搏,例如八十年代的《最佳拍檔》系列,佢就係導演。《福星》同《追女仔》系列,乃至無厘頭譜系,亦開創咗一代嘅喜劇潮流。電視方面,亞視同無線,佢都有經典嘅作品。

問題係,佢嘅脈絡同佳績,大約就係香港最輝煌嘅三十年。佢曾經係好有港仔嘅風味,大約可以食到大台近年《流行經典 50 年》嘅觀眾口味。

廣告

問題係,新一代對佢毫無感情,甚至反感,而佢嘅個人問題,加上港式滑頭仔本質,亦令佢無法成功打入國內市場。

在本土化及中港融合的夾縫中,我覺得佢嘅作用係壓場,處理內部矛盾,真正嘅操盤手,應該係國內人脈關係較好嘅王祖藍 — 呢個如意算盤,睇落好合情合理,唯一嘅問題,係王祖藍太早離港發展,響香港普及文化圈子唔算根深柢固,唔單止電視無咩經典作品,電影更係無一次成功,一定要靠老爺全心全力支援同把關先有機會救得返。

廣告

當然,我地未見過兩個矮層呢個組合合作管理嘅情況,根本唔會知道效果(唔係仲講 out 到震嘅《獎門人》吓嘛),但單睇牌面,我覺得佢哋嘅組合,只係能夠忠實反映及延續大台及主流娛樂公司近日青黃不接無以為繼及兩面不討好嘅尷尬局面,絕對唔似有能力為本地影視業帶來開創性嘅發展。

後記:

街舞/說唱呢類年輕人嘢,係值得搞嘅,問題係係唔係一定要散播正能量先?如果要走國內模式的話,點解我唔睇國內節目先?

搞喜劇嘅人一定明白,要成功,一定要超級接地氣,而呢方面,我信老爺多過王祖藍,可惜老爺貼嘅地,係廿年前果個已經回不了頭嘅香港地。


二、《戰毒》被清洗

《戰毒》一檔的排陣,本來就是極其錯誤的,ViuTV 亦將為此付出巨大代價。

問題不單係犯下大忌 — 腰斬劇集確係破壞觀眾的追劇常規,但只要贊成的聲音比反對多,陣痛是可以隨時間而過去的。

問題係整個佈陣的思維,甚至購片及製作的理念,本質上就無法針對市場的需要。《戰毒》的問題,大家也談了好多好多,恕我不重複,但緊接的《家務戰場》,及《開運旅神團》,加埋就真係中哂 jackpot!

先談《家務戰場》,笑一班港妹唔識做家務,試問成間屋除咗伯母,邊個會有興趣睇?如果要引宅男或咸濕伯父,去唔到台灣《國光幫》嗰個水平,起碼都要六七成啦……香港人的尺度,不論偽善的觀眾或扭曲的演藝人,可以接受嗎?

同類的情況,亦出現在 11 點檔的《開運團》— ViuTV 來來去去都係嗰幾個囡囡,唔好咁快用盡佢哋啦好唔好?

如果以為用美色包裝 old school 概念嘅節目可以得手,我真心相信曾志偉會拋離 99 條街。

目前 ViuTV 嘅困局,除咗投入唔夠板凳深度不足,其實係唔能夠完全脫離大台思維。電視台嗰種百貨公司模式嘅營運模式,其實已經唔能夠滿足時下用開網店追求自由自主的生活方式。事實上,要用節目塞滿時段,絕不容易。問題係,到底咩係黃金時段?

當年的《晚吹》系列,本小利大,成功地拉開深夜檔的戰場,對手要出經典劇連環播的老招頑抗。《造星》的故事,更加叫人津津樂道。

可惜的是,目前 ViuTV 的所謂「成功」,說到底還是叱咤 903 一樣只能爆出偶一為之嘅大型煙花。ViuTV 到底有無能力為電視業帶來範式轉移?這就要考驗該台的高層是否有洞察力和魄力成功走出新路了!

 

作者 Facebook (1)(2)

發表意見