立場新聞 Stand News

香港 Youtube 界的新嘗試

2021/4/22 — 12:03

【文:愛・香港流行文化】

喺 20/4 晚,四個 Youtube channel 做咗個大型聯播 show,每個 channel 先主持一個 live,緊接播佢地剪既片。依個可以話係香港 Youtube 界歷來最大型既合作,而合作形式都好創新,所以我想講吓睇完之後既感受同有咩地方需要改善。

首先,我覺得佢地拍既四條片都好出色,各自保留到自己風格之外,仲因為有其他 channel 既演員加入產生咗唔少新鮮感。你好少見到小薯茄既片咁唔「兒童節目」,但係又保持到帶出正面訊息既作風;Arm channel 既片拍得靚得嚟又多咗好多笑位。四條片之間有曬起承轉合,比到觀眾睇到一個完整故事,而我覺得熊仔頭壓軸出場既片係最有意思,由點解想拍片,到唔同 channel 面對緊既問題,到最後帶出四台合作可以為香港 Youtube 界,甚至為整個傳媒界帶嚟新風氣,繼而同全世畀既創作者競爭。依個遠大既展望雖然看似不切實際,但正正可以香港 Youtube 界帶嚟新既動力。

廣告

然而,個 live 可以話唔係太理想,其實個 live 概念唔錯,由唔同 channel 主持,再討論啱啱播既片,再加上成班人一齊參與一晚既節目,理應係一個可以睇到鏡頭後佢地真性情,又會好有火花既環節。不過有啲可惜就係佢地做 live 既經驗始終唔係好足夠,而且我相信佢地為咗有更真實既即時反應而無做好多綵排,所以有好多位都唔夠流暢,內容又唔係好吸引,而且流程上我覺得應該播咗片先做 live,搞到第一部分 arm channel 無咩野可以講,比到觀眾有種想拖時間既感覺,唔同成員之間既火花又無想像中咁好,特別係睇完條高質片再睇個 live 就會有啲失望。不過依種模式其實都係第一次實行,有不足係在所難免,如果下次再有類似既活動,相信佢地可以做得更好。

由近日既 chill club 年度推介榜到四台聯播,可以見到香港唔同媒體都作出緊新嘗試,希望令香港既流行文化再次受到世界關注。當中難免會有好多困難同批評,但依啲正正係推動進步既動力。喺依個充滿壓力同悲傷既城市,流行文化好似廣東歌同 Youtube 片係唔少香港市民舒壓既最好方法,所以我好希望唔同單位都可以越做越好,繼續為香港人帶嚟多元化既娛樂。

廣告

作者簡介:一個鐘意香港流行文化既後生仔,得閒會寫吓文用大眾既角度講吓廣東歌、香港既電視節目同電影,希望未來有多啲香港人留意香港流行文化。

Instagram Page / Facebook Page

 

 

發表意見