立場新聞 Stand News

【黑人抗爭】美國自然歷史博物館拆羅斯福像 怎可與文革相提並論?

2020/6/27 — 10:48

圖片素材來源:《Night at the Museum》、維基百科

圖片素材來源:《Night at the Museum》、維基百科

美國反種族歧視抗爭一浪接一浪,作為反對警暴、站在雞蛋一方的阿叔,我當然也是支持黑人平權。也係因此,聽到最近有些朋友對美國自然歷史博物館單嘢有批評,話係「全球文革」,阿叔也不吐不快。

邊座係美國自然歷史博物館?呢,紐約嗰座。佢可以話係世界上最重要嘅歷史博物館之一,去紐約旅行嘅人好多都視之為必到景點。2006 年電影 Night at the Museum 個場景,就是嗰度了。

話說坐呢座博物館門前,有個老羅斯福總統雕像 (Equestrian Statue of Theodore Roosevelt)。不過這個雕像旁邊站著兩個人,一個係美洲印第安人,另一個係非裔人。雖然雕像並無醜化呢兩個人,但睇起上來仍然艾有黑人為白人抬轎的感覺。咁嘅像在這波政治浪潮下,自然被批評,被要求拆除。

廣告

紐約市長白思豪都認為呢個雕像有問題,佢聲明話,呢個雕像明確描述非裔和印第安人被征服同種族處於劣勢的形象。老羅斯福嘅曾孫 Theodore Roosevelt IV 亦都贊成。佢聲明話﹕「呢隻騎馬雕像,無反映我曾祖父的政治遺產。是時候把雕像移走,讓美國前進。」就咁,呢個自 1940 年起就企響嗰度嘅雕像,要收皮。

其實好多人一直都覺得呢個像有問題。2017 年,有示威者就曾經向銅像底座潑紅色液體,代表銅像染血。

廣告

而反對聲音來講,則有特朗普,他 22 日在 Twitter 發表評論,話拆像係「荒唐」。

這其實不是今次示威浪潮中,第一件雕像爭議。《立場》都有報,在美國和歐洲多國,都有抗爭民眾將涉種族歧視、殘殺的歷史偉人雕像,破壞或拉倒。有哥倫布雕像被斬頭,有邱吉爾雕像被淋紅油。還有些像,直頭被民眾自己拆落來丟入河。

我個朋友聽到呢啲新聞,唔高興,話係「全球文革」。阿叔平生最憎尐人隨便用兩個標籤,第一係法西斯,第二就係文革。當年文革,毛澤東係掌權嘅,佢發動民眾互相批鬥,害死好多人,當然有問題。但大佬,依家美國邊個掌權?係特朗普。而特朗普係鬧緊黑人搞事,而唔係推動緊黑人抗爭。文革是領袖推動,黑人平權是民眾自發,怎可同日而語?

其實真係唔是好難諗﹕香港抗爭者見到中國國旗,也將它扯下來,對吧。你想像,如果立法會前放個習近平像,這個像能活到今天?唔畀抗爭者五馬分屍丟入維港?將心比己,自己人都係做緊呢啲嘢,唔好轉下頭又來話人嘛。

發表意見