2021728
    圖片素材來源:ViuTV YouTube 圖片

    點樣睇《調教你Mirror》最好睇?

    《調教你Mirror》,睇到第八集,我諗我終於識得欣賞呢個節目。

    如果金魚腦直線思維即時反應,我明白有啲人係會睇到好𤷪。到底第x集講乜?調教咗邊個未?成唔成功?點解啲嘢講講下又唔講?剪到亂晒籠⋯⋯

    睇完第八集,我終於明喇。寧願俾人話支離破碎,都要大致跟番個時序,佢就係要畀你睇呢個係一個continuous process,唔係逐個人的成長歷奇。想個節目好睇,自己要做少少嘢,唔好金魚腦,要將眼前見到嘅嘢放返入整個脈絡度,咁你就會覺得好好睇。

    例如第八集《Mirror的演員自我修養》,重點係唔係調教Anson Lo?定係話畀觀眾知姜濤、Anson Lo同Lokman最有演戲天分?我覺得唔係囉。全集最好睇係佢哋十二個點理解個劇本同出嚟嘅表現幾乎係完全match番佢哋在節目中呈現嘅性格優點同缺陷。

    姜濤亂叉咁嚟但梁祖堯同黃修平又好鍾意,點解呢?我覺得一來佢已經有姜濤光環;二來就算其他嘢佢唔識,對表演佢係有超強直覺,但凡同表演有關,佢啲判斷係啱哂。至於點解佢呢方面有超強直覺?如果有人可以將佢由細到大睇過啲乜做過啲乜全盤紀錄,應該會得出一個結論。但既然做唔到,暫時重係一個謎。

    點解Frankie會咁信任對手?一來佢有同理心啦;二來佢可能長期處於一個「咦,件事棘住咗,係咪我錯呢?睇定啲先」嘅mindset。遇到難題唔會主動想方法解決,等個難題自己消失或由其他人解決,做一場戲梁祖堯會讚你信任對手,放喺日常生活咪係懶散同唔積極囉。

    點解Anson Lo同Jeremy做得特別自然?因為佢哋本身就係有雌雄同體嘅氣質。我好欣賞佢哋兩個都做到女仔嘅特質,但係兩種唔同嘅女仔。Anson Lo係drama queen啲,唔怕你話佢公主病,冚你一巴都夠膽;Jeremy係「其實我就哂你咖喇,係你過分咋」那種passive aggressive(我會選佢係冠軍)。

    Anson Kong繼續不懂得閱讀空氣,黃修平想睇你正經做戲,你係都要搞下笑。

    Tiger同Lokman係好平均好穩陣,基本嘢做得好好,但你唔要求佢就唔會畀啲特別嘢你。在適當崗位佢哋係會發光發熱,但創造力應該不及姜濤、Ian、Anson Lo同Edan幾個。

    最後,最可圈可點一定係Edan,唔係話佢做得特別好,而係佢好聰明,睇到人哋睇唔到嘅角度,呢份觸角唔只做演藝事業,對做人都好有幫助。十二個人看同一個劇本,人人睇到「我哋收咗工咖喇」都係發脾氣,唯有Edan用呢句對白來flirt。一件事去到佢手上,佢會即時睇到最有利自己同時又唔傷害人嘅角度同處理手法,呢項能力唔多唔少解釋咗點解最初花姐搵佢來陪襯,最後佢跑出有solo。製作組應該都睇到呢個重點,專登剪呢段出嚟,等觀眾自己領會。

    事情發生咗,唔一定要直線思維即時反應嘅,可能好多人都無Edan呢份天賦嘅觸角(我無),但都要學下,搵一個最有利自己又唔傷害人嘅角度,逆境波,只可以咁打。

    (Jeremy,你想有solo,希望你都學到呢種靈活實際正向思維啦,鬧情緒陷入低潮passive aggressive,好明顯花姐係唔受。)

    做到定做咗?

    好多人讚感動嘅第三集「冇以前咁開心⋯⋯」,係我睇到最周身唔聚財嘅一集。一邊整麵包一邊俾歌迷點化,成個流程、鏡頭擺位、空間逼狹、節奏、「成熟理性」歌迷失驚無神爆金句、Jer的存在、梁祖堯全程監察粗暴干預,成件事騎呢尷尬到無倫,然後竟然有觀眾會相信聰明絕頂玲瓏剔透的Ian會就此被點化?話睇到好虐心好感動?吓?????

    其實Ian都講得好婉轉:「整麵包好開心,但頭先個重點唔係整麵包。」我即時諗起《無間道》傻強金句「當一個人好唔專心咁做緊嘢而佢又望住你,呢個人就係⋯⋯」

    點解《Error自肥企劃》最後十五分鐘咁感動?因為佢係做到哂先話畀你聽佢過去兩年做咗啲乜。我無睇《大海男兒》,《美女郊遊遊》都只係睇咗幾集,但最後呢兩個節目的主持人行出嚟,我諗番《Error自肥企劃》第一集PIX3L嘅水手服cameo,我係感動到震。一個搞笑節目原來背後有grand narrative,而且佢無大鑼大鼓事先張揚佢有幾多部曲,係做哂做到先話你知佢做咗乜,呢份沉默的堅持係好令人感動。

    相反,「冇以前咁開心⋯⋯」之所以討厭,因為佢係剛剛相反嘅「講咗當做咗,做咗當做到」。乜都唔駛做,講咗就係,聽咗就要頓悟,大家就要感動。感動不應這樣廉價。

    虐待的意義

    《調教你Mirror》頭兩集,十二個Mirror不斷講拍《Mirror Go》令佢哋有幾大心理陰影。我有看《Mirror Go》,係玩得佢哋好慘,但如果佢哋有用腦看《Error自肥企劃》,佢哋應該明白自己有幾幸福。唔係講虐待的程度,而係玩你虐待你的目的。

    拍《Mirror Go》,不論你跳bungee jump又好,俾人整古又好,大懲罰又好,個焦點都係放喺十二個Mirror成員身上,畀觀眾睇你有幾聰明、幾勇敢、幾冷靜、幾可愛;就算你蠢可以好善良,驚青得來好人性化,沉默可以好有貢獻,唔靚仔但好親和好搞笑。除非你個人衰到集全宇宙缺點於一身,只要唔係,你唔駛太用腦,乖乖地俾人玩完虐待完,觀眾係會對你了解多咗及好大機會鍾意你多咗。

    《Error自肥企劃》係完全另一種虐待。Dee Gor俾人彈幾次死亡行星,睇完你會唔會了解Dee Gor多咗?定只係覺得設計死亡行星的人好有創意?

    所以193係睇得最通透,唯一懂得玩「自肥企劃」的Error成員。肥仔同Dee Gor可能本身有實力,反而被舊思維制肘,仍然係諗住點樣做個好item,佢哋絞盡腦汁嘅「自肥企劃」,唔係唔好睇,但係肥咗個節目/團隊,唔係自己。我好愛護肥仔,我希望佢會忘記自己係《全民造星》第四名,keep住歌精舞勁但明白歌精舞勁甚至加埋搞笑都唔夠。命運揀咗你係Error唔係Mirror,唔可以單靠才華賣相勤力聽話謙卑令更多人鍾意你,做Error係要有更破格嘅思維去突出自己。

    花姐的角色衝突

    《調教你Mirror》係好睇,但我覺得個節目某啲設定好有問題。先唔講話拍《Mirror Go》第三輯呃人上賊船二十四小時貼身追蹤要你放低哂戒備因為你隨時可以唔准某啲片段出街呢個唔係整古節目但轉個頭又搵人整古你呢個安排合唔合理,當做得藝人預咗,又可能梁祖堯好有魅力,望你兩眼你就會放低戒備,或者佢哋真係好有團隊精神,為「未來的路」乜都肯,甚至係原來Mirror份約包埋「短時間通知,你就要bare your soul」。

    是但啦,以上種種我都可以「我哋好愛Mirror,好愛大家」做理由隻眼開隻眼閉,畢竟有共識有實證成個過程係令佢哋進步咗(演唱會的成功)。我最唔舒服的地方係如果個過程係講十二個成年人嘅個人成長,同自己同隊友和解,點解可以由另一個人(雖則係好了解好親近嘅人)好似點菜咁「我要調教xx嘅乜乜」,然後梁祖堯就會不問情由執行任務?成個過程好似無人問過被調教嘅人同唔同意自己有呢個缺點,預備被調教到乜嘢程度?調教的最大目的原來係方便花姐管理?我哋睇預告預咗會感動係想睇到十二個我哋鍾意的人嘅個人成長,但原來個end product係花姐會得到一隊容易管理的Mirror,個感動位係咪搞錯咗?

    我絕對相信花姐係好好心地及好能幹,幫咗呢十二個人好多,但佢身為電視製作人/經理人/阿媽上身,三種角色衝突越來越明顯。做個好節目,捧紅一個人/一隊人,定教好一個年輕人,最後佢一定要取捨,現在佢係搖擺不定,一時一樣,或對每個人標準都唔同。

    梁祖堯的真功夫

    梁祖堯係咪好勁?暫時好似未睇到。我只見佢不停請外援(開麵包店嘅高質粉絲、非常認真健身教練、和音大師、麥子樂、幕後工作人員、黃修平、鍾雪,連計劃以外的低質粉絲都可以用來借力打力)幫手,自己就企埋一便,表示看透一切,繼而心理分析。

    其實,暫時我係覺得佢好廢。但我期待下半part佢會使出真功夫。

    編輯推介

      發表意見