立場新聞 Stand News

點解咁多人鐘意林家謙?

2021/1/27 — 12:25

【文:香港流行文化愛好者】

相信如果有留意廣東歌既聽眾,近期聽得最多既其中一個歌手一定係林家謙。佢親自唱既作品雖然唔多,但係每一首都受到樂迷既歡迎,成功咁由幕後轉到幕前,不過喺最近既樂壇既頒獎禮入面,好多人覺得佢應該要得到更多既獎項,甚至覺得佢係樂壇既清泉,究竟點解咁多人鐘意佢?嚟緊依篇文我會講吓我既睇法。

林家謙主唱既歌其實唔夠十首,但係佢既風格已經好突出。佢既歌同主流廣東歌一樣,都係以慘情既主題為主,但係唱法同編曲就同主流情歌有好大分別。近年 hit 得起既情歌,多數都係前半段做舖排,之後去到副歌就用比較激昂既音樂同有力既唱法,表達首歌既感情,好似 Dear Jane 既歌好多都係依個模式,而每一首都有高既 hit rate。

廣告

相反,林家謙既歌多數都比較平淡,有啲似 8、90 年代既風格,配上現代既唱法同曲詞,比到聽眾一個好新鮮既感覺,例如《下一位前度》既副歌『若覺得第一位最愉快,為何上一位不釋懷,誰亦在反覆錯愛之旅捱大』,第一段林家謙唱既時候雖然已經比主歌用力,但係都仲係用緊比較輕聲同舒服既唱法,先淡然咁表達首歌既悲情,去到歌既後段佢再一次唱依段,佢就用翻一個比較用力既唱法,表達當中更深既情感,同一首歌已經有兩個層次;《一人之境》既副歌部份『一個人原來都可以盡興,多了人卻還沒多高興,沉默看星,聽到月光呼應』都係相同既唱法,依種演繹令歌詞表達既孤單情感一步步咁昇華,聽眾好容易就可以投入到。

再者,林家謙主唱既歌所採用既詞唔會好似主流既情歌咁簡單直接,又唔會好似非主流既歌咁深奧,喺競爭激烈既情歌市場搵到一條新既路線。例如《時光倒流一句話》既依一段『其實我不必異能大到可扭曲真相改春秋,我只想忘掉你不解這溫柔斷言未接受,能重做時光只需倒流一句話就足夠』歌詞用到既詞同意境都唔算好深,但係聽眾聽幾次都未必可以完全了解到當中既情緒,喺慢慢領會甚至認真咁睇曬啲歌詞先可以充份了解到首歌既情感,睇得出林家謙既歌既歌詞質素都好高,而廣東歌聽眾正正比較著重歌詞,所以佢就吸引到好多香港樂迷既支持。

廣告

除咗歌手既身份,林家謙都係一個作曲作詞人,佢自己既作品全部都有份參與製作,而幫其他歌手作既歌同樣好有質素,由《矛盾一生》到《心之科學》再到近期既《是但求其愛》,一推出已經好受歡迎,好多歌手都等住同佢合作,前途無可限量。佢既才華加上獨特既風格,成功令佢喺短短兩年間吸引咗一班 fans,而佢都慢慢作出新既嘗試,好似《特倫斯夢遊仙境》證明佢連快歌都 carry 到,未來相信佢會比到更多唔同類型既音樂比樂迷。

因為外表唔出眾,林家謙絕對算唔上一炮而紅,甚至有人認為佢係紅歌唔紅人,但係我覺得正因為咁佢可以更加專心創作自己既音樂,靠作品打動人心,事實都證明咗雖然佢只係出道咗兩年左右,但係每一首歌都有好多人欣賞,而且香港樂迷對佢既評價都相當正面。與其拎好多獎項然後比人評頭品足,倒不如比人一種滄海遺珠既感覺,我相信對佢既音樂路更有幫助。

如果到依一刻你都未聽過林家謙既歌,甚至好少聽廣東歌,試吓去聽佢既作品,即使都係情歌,佢既作品絕對會比到你耳目一新既感覺。縱使香港樂壇已經過咗最輝煌既時代,但係都絕對仲有好多值得香港人欣賞既歌手同歌曲。

作者 Medium

作者簡介:一個鐘意香港流行文化既後生仔,得閒會寫吓文用大眾既角度講吓廣東歌、香港既電視節目同電影,希望未來有多啲香港人留意香港流行文化。 

發表意見