《Error自肥企画》大結局 (Viutv截圖)

《Error 自肥企画》結局末段對白紀錄:一個人唔會成功 但如果每一個人都盡力嘅話

編按:Viutv 綜藝節目《Error 自肥企画》大結局 — 「電視?為什麼?」昨晚(21 日)播出,節目最後一節中有約八分鐘的短劇;以下為最後一節全節對白內容。

【字幕:電視?為什麼?
時間、西曆 2021 年。太多疑問,太少答案的年代,對於 Error 來說《自肥企画》似是完成了,但還在尋找拍攝的理由。由於受播映時間、預算所限,因此以「新世紀」的前衛方式去補完 — 某些答案。】

Dee:呢度,係邊度呀?節目係咪已經完咗喇?
肥仔:係娛樂完成,但係播映時段未終結嘅世界。
193:係熄電視之後嘅世界。
保錡:呢個世界曾經存在,但一日有互聯網,佢都唔會再嚟臨。

(Dee拿起電話)

肥仔:只要你而家一拎起電話,呢個電視播出嘅所有嘢,就會了無意義,係咪要咁做?
(193、保錡站在Dee身後)
193:可唔可以陪多我一陣?可唔可以比我陪吓你?
保錡:你有冇嘢想問?
Dee:點解,點解要拍節目?點解要駕駛Error?

【字幕:拍節目、何故】

193:首先要問,點解你要拍節目?
Dee:因為公司要我拍節目。
肥仔:公司有好多Artistes,經理人亦都可以幫你推job。
Dee:因為自肥,話到明係自肥,唔拍咪好傻囉。
保錡:唔係!
Dee:因為我驚呀!我駕駛Error,係因為我驚呀!唔拍節目,根本搵唔到自己!

【字幕:Error、是甚麼】

肥仔:只要駕駛Error,就可以搵到自己嘅價值架喇咩?
Dee:係,只要駕駛Error,大家會comment,會like會share,我覺得駕駛Error,大家會了解我多啲。係好自肥,咁樣有咩唔啱喎!
保錡:努力迎合期望,唔會填滿你嘅空虛,大家唔係一直,都好希望Error出擊㗎咩?係咁㗎啦!
193:呢個係你說服自己嘅答案。
保錡:Error嘅本質係咩呀?
Dee:呃.....吓?

【字幕:ERROR】

193:Error係香港跳唱團體, 成員有梁業、何啟華、郭嘉駿、吳保錡。
Dee: 呢幾個人睇落有啲陌生,就算我喺入面都有咁嘅感覺。點解嘅?
肥仔:呢啲片段,係片段嘅存在,缺乏前文後理。
193:但好多人都會自行整理出立體嘅人格,投射落去。
保錡: 你根本唔識我。立體嘅人格唔係真人相處,你整合唔到,你根本唔識我。
193: 鏡頭面前,有時我哋只係一組剪接出嚟嘅符號。
肥仔:Error都係符號,係一種意義嘅載體。 蛇蟲鼠蟻屎尿屁,整蠱挑戰大懲罰,都係一種意義嘅載體。
Dee:係.....係咩意義呀?
保錡:係娛樂。

【字幕:娛樂、何故】

肥仔: 娛樂嘅目的同意義,單純就係娛樂本身,係「amusement」, 喺陪伴、係安慰。
保錡: 呢個係艱難嘅時代。
肥仔: Error隱喻緊世界其實唔係有咁多制肘。
Dee:但現實太多制肘。
肥仔:隱喻緊世界其實唔係有咁多痛楚。
Dee:但每日都痛不欲生!
193:最痛嘅時候,都可以不按牌理咁歡笑,係Error發放嘅意義,係呢時代大家都需要嘅能力。
保錡:都係你需要嘅能力, 你都係大家嘅一份子。
193: 駕駛Error。
保錡:駕駛Error。
肥仔:駕駛Error啦。
Dee:但.....但其實我唔一定要駕駛Error㗎, 我做網絡紅人都可以娛樂大家㗎, 我有養貓、我識跳舞、我可以拍搞笑短片, 或者我可以用其他媒體,將意義用文字講出嚟,大家都係理性㗎,會明白㗎! 我唔需要Error、唔需要電視!

【字幕:電視、為甚麼】

肥仔:因為所有嘢都係娛樂。
Dee:我唔認同! 媒體每一日都有報導重要嘅事情呀!
肥仔:關你乜事呀?
Dee: 唔係咁㗎,個世界仲係好有意義㗎!
193: 所有嘅新聞、所有你接收到,之後唔能夠令你作出現實反應,又或者唔容許你作出現實反應嘅資訊, 社交媒體嘅圖、片。
肥仔:都係娛樂。
保錡: 你坐喺office、坐喺地鐵、瞓喺張床度,有咩貴賓到訪、有咩災禍、邊個性開放、邊個多咗個噴水池
193:全部缺乏前文後理,了無意義,係片段化,泛濫、無用嘅麻醉藥。
保錡:擘大你雙眼。
Dee: 唔係咁㗎!
保錡:擘大你雙眼!

《Error自肥企画》大結局 (Viutv截圖)

(Dee捂耳尖叫)

肥仔:片段化嘅零碎娛樂,令大家習慣覺得 ,任何意念可以喺幾分鐘,或者幾十秒之內表達。
193:但意念其實唔係咁。
保錡:慢慢所有人都唔能夠再有專注力,承載重大意念。
肥仔: 雖然娛樂本身係電視存在嘅目的, 但而家反而變成對抗零碎娛樂嘅武器。
193: Viu嘅戰鬥、Error嘅戰鬥,係用節目凝聚同埋補完專注力。
Dee:戰鬥?
保錡:重要嘅戰鬥,未必係今日。
Dee:啊,我想問講咗咁耐,係咪因為唔夠預算、唔夠時間製作一個精彩嘅大結局?
193:絕對唔係。
保錡:你嘅睇法反映咗你嘅高度。
Dee:答我呀! 你哋係咪搞緊gag呀?
肥仔: 如果剛才嘅解說,對你嚟講了無意義,咁就係。如果講咁多嘢,都係為咗表達製作組爆budget、拍唔哂、剪唔切。呢一個戲劇轉折,提供到娛樂咩?
193:非常好嘅娛樂。
保錡:但我會推到所有意義!
肥仔: 如果觀眾未準備好戰鬥,嚴肅謹慎嘅警醒有咩為?
Dee: 哈, 好彩你哋搞緊gag嘅啫,幾驚你哋講認真嘢呀。
肥仔(搖頭):佢未準備好。

【字幕:大家都去了哪裡?】

Shirley Sham:唔好逃避你見到嘅嘢,即使有幾咁無力,都要張開眼睛活著。
Dee:美女郊遊遊?
Shirley Chan:唔好畀戰鬥既定嘅符號所規限,每日自肥,總會得到力量!要耐心靜候!
Marco:要戰勝荒謬,首先要接受荒謬嘅必然性。
George:文明總會勝利,係信念!
Dee:大海男兒?
Phoebus:相信一種價值,因為價值係由我哋主觀去定義。 只要你相信,佢永遠都會存在。
Dee:越嚟越多唔識嘅人出現咗呀!
肥仔:佢哋全部都唔係坐以待斃嘅人。
保錡:就算你唔完美。
Marco:就算有人漠視你!
Dee:唔好逃避!
Phoebus:就算所有事都唔順利,都要記住自己能夠貢獻到嘅嘢,唔好否定你當初相信嘅價值。
Dee: 唔好逃避!
Shirley Sham:每次懷疑嘅時候都問一次自己,點解會喺度,喺度又係做乜嘢。
Shirley Chan: 如果未搵到答案,咁就再試一次,唔好停止嘗試。
Dee:唔好逃避!
Dee:我明喇!
Dee:Error並唔係唯一戰鬥緊嘅人,只要一日仲留喺呢片土地上,每一個人都用自己嘅方式,喺自己嘅崗位戰鬥,一個人唔會成功,但如果每一個人都盡力嘅話,每一個人都盡力嘅話!
(眾人鼓掌)
Dee:(大家)


【字幕:多謝大家,恭喜Error自肥成功】

眾人:好!!


【字幕:終結(以有限)開始(製無限)】

Error歡呼
193:知我哋咩料啦!
保錡:有你有我!
肥仔:出擊啦Error!
Dee:嗯!


【主題曲播放】

(喺呢個夜闌人靜嘅夜晚,viutv呢度有位好勤力嘅導演,仲喺度度緊嘢!導演!)
Mike導:係
(咁夜搞咩?)
Mike導:我哋準備緊聽日嘅拍攝,聽日就係我哋節目嘅第三日拍攝,咁呀,你覺得點呀最近拍得?
(你好尷尬!)
Mike導:我想講,我哋而家拍緊嘅嘢,其實係,我自己覺得係一啲好奇怪嘅嘢嚟嘅。 我唔係太肯定出到街,(觀眾)會係有啲咩嘅反應,我覺得 一係就係會好爆好特別嘅存在,一係就好x尷尬嘅嘢, 我覺得我哋係行緊呢一個方向,我諗拍多幾日,會個方向定少少。但至少拍左頭3集。係啦,我哋係做緊呢啲嘢。
( 最緊要知自己拍緊啲啫,係咪話?)
Mike導:都知嘅,我會覺得呢一個節目會係一個會對而家香港嘅電視業,帶嚟少少衝擊嘅,少少。
(龐大衝擊得唔得呢?)
Mike導:龐大嘅衝擊...「好x難睇,咁x差嘅節目」「咁尷尬嘅節目」!
(可能係,你講到我都好驚㖭)
Mike導:唔知呀,ok呀,但我覺得,至少有一樣嘢好正嘅就係,我覺得我哋係行緊一啲好特別嘅路,呢啲特別嘅路,淨係我哋先至會去行,係囉。
(係,唔緊要啦,橫掂成日都瀨嘢㗎啦)
Mike導:係啦。執完道具未呀?我想問你。
(聽日拍咩呀?)
Mike導:我X呀!
(拜拜)

【字幕:全篇完】

編輯推介

    發表意見