立場新聞 Stand News

Mirror 發明星夢嘅故事,與香港人發夢嘅故事

2021/3/27 — 16:36

圖片素材來源:Mirror《Warrior》MV

圖片素材來源:Mirror《Warrior》MV

Mirror 成軍於 2018。2018 年係一個點樣嘅世界?

後生仔、大學生會爭相「上深圳」飲喜茶食海底撈揼骨,身邊一定有人追《我是歌手》、《中國好聲音》。今時今日大家吹捧嘅林家謙、陳蕾、Serrini,冇人識。新成立嘅 ViuTV,又有幾多人睇?睇《愛回家》輕輕鬆鬆仲好啦。

《全民造星》喺呢個時候出現,大膽話「香港人可以造到自己嘅 star」。而呢一班後生仔,係呢個時候決定發呢一場明星夢。俾人笑、俾人鬧、俾人睇唔起就少不免。

廣告

當然可能有一半真係因為佢地乳臭未乾,咬字唔清音準唔準。但或者更多,係正如姜濤新歌嘅歌詞所講 —「年輕就是錯」。你睇下叱咤,姜濤喺震驚中唱 live 嘅《蒙著嘴說愛你》,不過不失,幾多人話「其實唔差喎」。然後到今日,隔籬台,曾志偉領導嘅「新氣象」,原來都係搵埋唔知邊個呀叔嚟嘲笑、侮辱呢個大家投票揀出嚟嘅「我最喜愛男歌手」。

廣告

香港係一個吃子嘅社會。難聽講句,見高拜見低踩係常態,一班後生仔咁大野心想衝擊香港娛樂圈,自然俾大台俾既得利益者踩台。但唔止來自對台嘅攻勢,同時間,佢地又會受到其他年輕人嘅嘲笑,只因大家鍾意嘅風格唔同。唔鍾意佢地嘅風格,就成日笑佢地「乸型」、「好基」* 大有人在。更加有啲人,大家都係新晉年輕藝人,都寧願幫大台,同個呀叔一齊踩佢地。你睇下馮小姐,一邊喺 IG 話自己係姜粉,一邊喺大台舞台揚言「打到你變薑蓉」

發一個明星夢,好難。有時係實力未夠,有時亦會有對手嘅攻擊,有身邊人嘅矛盾互嘲,更時不時有人倒戈相向。

但至少 Mirror 冇放棄。


三年啦,坦白講佢地之前有幾多首「團歌」係成功?無。《ASAP》、《破鏡》、《一秒間》,除咗佢地本身啲支持者,又有幾多人聽過?

佢地十二個人齊上齊落繼續做落去。

經過三年努力後,佢地一邊捱住身邊人、對手嘅攻擊,一邊默默地各自修練,有人練咬字、有人練唱功、有人練演戲。耕耘三年後,今次搵嚟林夕徒弟林若寜,寫下一句「大不了死,亦不會避。Never give up」,由佢地唱出嚟。

然後,今次唔止中女、後生女支持者,唔止圍爐 group 讚佢地。今朝一早睇連登,平時揶揄佢地最多嘅連登仔,熱門第一個討論就係「Mirror 新歌型撚到」,五千個正評。


2018 年,佢地係一個好冇希望嘅地方開始發一個明星夢。好難,好多阻滯,好多人攻擊,好唔成功。即使到今日,睇下個 MV 得一個景,都知資源幾少,但佢地日漸進步嘅舞技、歌藝、不變嘅熱誠,贏哂大家讚賞。呢個夢,三年之後,佢地開始做到。

發夢從來都咁難,但或者大家,都可以係 Mirror 嘅故事中,睇到香港人嘅故事,應該點樣寫落去。

* 注:基唔應該係一個批評㗎,但佢地係咁嘅意思。

 

作者 Facebook

發表意見