立場新聞 Stand News

今時今日,咁嘅經濟結構係唔得嘅

2020/8/3 — 11:12

圖片來源:publicdomainpictures.net

圖片來源:publicdomainpictures.net

【文:local9up】

依幾年香港經濟可以話一邊倒靠「自由行」,發展到一個地步係遠遠超過需求。政府高官所講嘅「自由行」經濟貢獻,都剩係指對地產商嘅小數人,而大多數嘅市民只有覺得騷擾,租金物價上升,影響日常生活。可以話「自由行」只有一小撮人得益,成本卻由社會攤分,同時超過社會可以負荷。政府政策搞到香港經濟結構好似必須依靠大陸先得,忘記咗本土經濟。

武漢肺炎爆發咗後,靠「自由行」生存嘅鋪頭就即時面對危機或者執笠,好多人都失業。而幾個月前香港出現「搶米」情況,被形容為「failed state」,似乎一有事起上嚟,身為國際大都市嘅香港經濟就一蹶不振。係咁嘅情況下係一個好機會重新審視,我哋要一個點嘅香港。會唔會回歸本源,試吓喺香港搵第二種生活方式?發展與生活可以平衡到?

廣告

香港當初嘅本源就係農業。係英國嚟香港之前,本地多數嘅居民都係過住農村生活。即使到 1950 年代,香港仍然稻田處處,新界好多地方都以產米為主。農業一度極盛,田園風光勁靚,以前唔駛去台灣或日本,留係香港都有好多靚景俾你打卡。

仲有唔講唔知元朗嘅絲苗白米同齊眉米都係國際名牌!曾經遠銷歐洲、美國等地,威過泰國米! 依家我哋成日食外國米,其實以前住係其他國家嘅人鍾意食香港米。

廣告

後來香港經濟開始轉型,又碰上新市鎮發展,令種植稻米變得愈來愈少,好多轉咗去種蔬菜或其他經濟作物。不過就算係咁,香港各區都曾經各自有出產過出名嘅蔬菜,例如打報嶺雷公鑿苦瓜、馬屎埔水蔥、粉嶺華山荷塘芥蘭、錦田蕃茄、屯門管欖菜心、荃灣川龍西洋菜、東涌紅頭旱蔥、大帽山香蕉等等。

農業可能未必搵到好多錢,但就可以幫助到居民渡過危機。1967 年香港發生受中共文革影響嘅六七暴動,大陸分銷商一度唔肯銷售食物嚟香港。當時好彩有本地農業供應食物,幫手捱過依次難關。嗰次真係自己地方自己救!另外,值得一提 1980 年代,香港有百幾名市民食咗由中國大陸引入嘅蔬菜中毒而入院,外來食物安全響起警號,但之後就無因此增加返本地蔬菜自給率,反而跌到近年得返 2%。其實穩定嘅糧食自給率可以解決政治問題同有助社會民生。

依家嘅本地農業被政府忽視,政府同地產商可以話係幕後黑手。因為一方面政府任由大陸蔬菜傾銷到本地,蔬菜價格被壓到好低,農民生計得唔到保障,好多人都唔願意入行,最終導致大量荒田出現;而好多農夫為咗增加收入,可能寧願將農田改為貨櫃場等其他用途;另一方面,地產商就大量囤積土地,最終導致香港農業近乎玩完。

農業係社會根本,當一個地方竟然可以幾乎無農業,係咪應該思考吓發生咗咩問題。最諷刺嘅係香港社會忽視農業,但就好多人去購買標榜本地食材嘅日本、韓國同台灣農產品。希望大家記得香港都曾經出產過靚米靚蔬菜!

不過好彩嘅係香港依幾年多咗好多人去守住香港僅餘嘅農業,土地正義聯盟就係 Facebook / IG 建立咗「Green Objects 本地農產及農業活動分享區」幫本地農夫推銷農產品同介紹本地農業,如果大家真係有興趣支持返本地嘢,可以去望望。同時都希望大家唔好等斷糧先嚟後悔香港無農業。

作者 Facebook

發表意見