立場新聞 Stand News

中印邊境衝突有幾大鑊?

2020/6/19 — 15:02

圖片來源:Ajai Shukla twitter及CNN影片截圖

圖片來源:Ajai Shukla twitter及CNN影片截圖

1. 星期一晚嘅中印邊境衝突越嚟越多消息,其嚴峻程度比想像中更加大鑊十倍百倍:

2. 嗰晚印軍喺加勒萬河谷巡邏時遇到解放軍,但係按照早前 6 月 6 日雙方達成嘅共識,解放軍應該已經喺嗰度撤走。當印軍前去了解嘅時候,便遭有備而嚟嘅解放軍伏擊,用早有準備、由木棍同鐵釘製成嘅狼牙棒襲擊印軍,其間將一名印度指揮官跌落山峽死亡,其後印軍增援,最終導致至少 20 名印軍陣亡同 43 名解放軍傷亡

3. 喺兩國對戰嚟講,解放軍先不守信約,後不宣而戰,仲用「野蠻武器」Barbarism 伏擊手無寸鐵,只能夠用拳頭同石頭還擊嘅印軍,其後外交部發言人仲要指責印軍先挑釁,強烈譴責印方。

廣告

4. 用番黨媒嘅講法,咁樣嘅戰爭行為係「突破人類道德底線極限」,印方要「報仇」係出師有名的。

5. 事後,印度媒體大肆報道中印衝突,20 名殉國嘅士兵嘅葬體受到高度重視,廣泛被形容為「為國捐軀」嘅英雄,電視上面不停見到死者嘅家屬哭訴接受訪問,加埋嗰張被廣傳嘅狼牙棒照片,圖像影像都有齊,可以想像到印度內部幾咁群情洶湧,誓要報仇雪恨。

廣告

6. 印度內部仲受到武漢肺炎嘅疫情困擾,一早已經將病毒嘅源頭指向中共,喺國際平台上面提出要向中共索償,本身仇中嘅情緒已經甚囂塵上, 宜家再加埋一筆 20 條人命嘅血債,新仇舊恨無處發洩,國內民眾怨憤一致指向中共,燒中國國旗,燒習主席嘅照片,仲有打砸 made in China 嘅產品。

7. 印度政府內部受到疫情困擾,經濟衰退,一定唔會想打仗,但係奈何國內民情洶湧,民族主義高漲,如果政府對華政策表現軟弱,民憤將會喺國內爆發,所以總理穆迪只能夠講:「戰士唔會白白死去(won’t die in vain)」,並迅速提出反制措施,阻止中國電訊商進入印度市場,而目前為止,小米係印度第一大手機牌子,Samsung 第二,杯葛中國貨邊個係最大得益?

8. 相反,中國對今次嘅衝突低調,至今仍未有官方確認解放軍傷亡人數,秘而不宣,只係指責印軍先挑起爭端。殉國嘅解放軍連姓甚名誰都唔知,早就失去道德高地,相比起印度軍民「哀兵必勝」嘅氣勢,大相逕庭。

9. 講軍事實力,印度雖然不及中共,但印度擁有繼解放軍外世界第二大嘅軍隊,同時亦係擁核國,而且長期駐軍高海拔嘅喀什米爾地區,喺中印邊境作戰擁有地理優勢,適應高山氣候明顯優於解放軍。

10. 印度只要應付一條戰線,但係中共就腹背受敵,八方受壓,除咗中印西南邊境,仲有南海爭議,台海局勢緊張,北韓蠢蠢欲動,香港抗爭不止,美國牽頭,連同 G7、五眼聯盟、歐盟正式向中國表示對香港國安法問題關注,仲有北京疫情再現,中國經濟大倒退,失業率急升,貿易戰未完,通訊戰、經濟戰、金融戰又到,咁多個火頭,偉大的習主席撲唔撲得熄?

11. 中國一直都自持住賺取「人口紅利」一躍而成世界第二大經濟體,「十四億人嘅市場」更加係外交部經常掛係口邊,威脅歐洲、澳洲等地嘅最大武器,但係偏偏喺佢旁邊嘅印度,人口同中國相比只係相差幾千萬,人工比中國更平,發展模式同正好複製另一個中國。加上曾經係英國殖民地嘅歷史、同民主嘅政體,無論係語言定係體制都更加容易同西方世界接軌。印度嘅存在就好似中國相生相剋嘅天敵一樣,今次中印衝突結成血債,扶持印度遏抑中國擴張應該會係西方各國必然之路。

發表意見