立場新聞 Stand News

中印開戰,無可避免?(節錄)

2020/10/12 — 13:25

中印邊境局勢緊張,9 月 初印度調動軍隊往邊境地區。 (Photo by Muzamil Mattoo/NurPhoto via Getty Images)

中印邊境局勢緊張,9 月 初印度調動軍隊往邊境地區。 (Photo by Muzamil Mattoo/NurPhoto via Getty Images)

地緣政治嘅嘢,真係唔好抄人功課啦, 好易出事呀。

話說有人好天真咁樣諗:既然大國崛起, 開多條路俾自己行下,都好應該吖?而睇番個世界地圖,咁人哋之前大國崛起,都一樣係咁,點解人哋可以, 我又唔可以呢?

係嘅係嘅,你最叻。不過你行路踩親邊個,你自己諗過啦吓。你自己認為行得正企得正,不過人哋係地頭蟲,又未必同你一樣諗法嘛。咁話時話,打開本世界地圖,又真係小學雞都識睇嘅。大家可以對比下呢幾份「工作紙」:

廣告

19 世紀,大英帝國、法蘭西帝國合資公司開闢「蘇彝士運河」。1859 年開工,1869 年完工。連接地中海同紅海。從此歐亞航道唔使經非洲好望角,可以直接出印度洋。東西海洋航運效益大增。由倫敦到印度孟買,航程由 19800 公里縮減到 11600 公里。距離短咗 40%。

廣告

19 世紀英國係全球霸權。而呢條運河就更加如虎添翼;大英帝國更加得益於印度次大陸地盤,自然又再錦上添花。至於軍事用途,就更加明顯。大英帝國可以做得成日不落國,可以全球快速調兵,自然唔使多解釋。英帝在印度大建鐵路,亦都同呢個新航道互相配合。早在 1853 年,英帝已經在印度計劃建成覆蓋全境嘅大型鐵路網絡。其後在 1880 年逐步完成。

圖片來源: https://bit.ly/3lGkdJz

圖片來源: https://bit.ly/3lGkdJz

到二十世紀, 輪到美帝崛起。又有另一份工作紙。

1881 年法國公司動手開闢巴拿馬運河。原本諗住食過番尋味,不過由於技術難度超高,結果放棄。1904 年改由美帝接手。1914 年開通。從此美國控制咗大西洋同太平洋航道。兩大洋航道由超過二萬公里 (比較南美合恩角航道) ,縮減到唔夠九千公里。美國本土亦都早已經建設好接通兩岸嘅鐵路,1865 年通車。因此二十世紀美國發大財。

順帶一提,工程其中一個難度係「黃熱病」同「瘧疾」等等熱帶傳染病,導致大量工人死傷。美國佬除咗工程技術,連防疫技術都順手解決埋。 

二十世紀係美帝天下, 自然又唔使多解釋啦。咁到廿一世紀,又會點呢?有人就話:應該都輪到亞洲威番一次啦啩?於是乎,有人提出咗一個大計, 就係「一帶一路」,名義上係重新建構「自古以來」嘅絲綢之路,不過又要有啲廿一世紀新噱頭。於是乎就有以下嘅現象出現。

早在帝俄時代,羅刹人經已建設好「西伯利亞鐵路」。東起「符拉迪沃斯托克」 (原名海參崴), 西接莫斯科。從此歐亞大陸直接由現代鐵路接通, 再冇需要由駱駝隊翻山越嶺行「絲綢之路」。

圖片來源: https://bit.ly/36T5yqc

圖片來源: https://bit.ly/36T5yqc

至於「海上絲綢之路」,係傳說中由鄭和使用嘅「西洋」航道,不過由於明朝很古怪地將海圖搞到死無全屍,無從核實,再加上明清兩朝厲行海禁,中國自己斷自己財路,冇乜嘢可以評論。但只要留意上面提到,19 世紀由英法列強所開啟的新海上航道,其實所謂海上絲綢之路,都已經冇必要重劃一次。

既然冇嘢可以創新, 咁點樣先至可以「揚中國之威」呢?於是乎就出現咗一個「一帶一路」嘅鴻圖大計。呢個大計,當然唔能夠照抄「西伯利亞鐵路」同埋「蘇彝士運河」原本嘅佈局啦。於是就變劃成咁樣:

圖片來源: 團結香港基金, https://bit.ly/3iSaca6

圖片來源: 團結香港基金, https://bit.ly/3iSaca6

北面嘅「中蒙俄經濟走廊」,其實都係接通西伯利亞鐵路,只係經由蒙古中途插入。至於滿州里一段,又早在帝俄時期嘅「中東鐵路」已經建成,當年佔據遼東之後開發嘅,唔係新嘢。既然要創新,於是乎就有另一條新嘅鐵路,貫穿中亞地區、繞過西伯利亞,經哈薩克入歐洲。不過歐洲段都依然係經莫斯科。

咁點算?咁梗係逢山開路啦。於是就再提出更大膽嘅方案:中亞經濟走廊。嚴格嚟講,唔係交通優先、而係石油優先。最先投建嘅,係油氣管道。之後先至係鐵路公路建設。路線經吉爾吉斯、哈薩克,接通伊朗同土耳其。

至於海路,除咗舊路之外,加碼起咗兩個新嘅向西出海口:1) 由雲南經緬甸到孟加拉灣、2) 新疆經巴基斯坦到阿拉伯海。緬甸就交低咗「皎漂港」由中國公司建設。已經準備好由昆明鐵路接駁安排。巴基斯坦就將「瓜達爾港」交咗俾中國「獨家營運」,而接通新疆喀什嘅公路亦都建設完成。至於原有嘅海路,印度南面就「充公」咗斯里蘭卡港口「漢班托塔港」(又係借錢冇得還之類)。

由天朝上國嘅角度睇,如果運作順利,咁梗係「高枕無憂」啦。因為中歐貿易,可以完全唔使經現有通道。而尤其重要,係戰略石油輸入,唔會再受制馬六甲海峽或者帝俄控制範圍嘛。不過咁嘅安排,又要睇過踩正邊個先喎。你又估下印度點睇?

西面嘅巴基斯坦係世仇,由巴基斯坦控制咗向西嘅阿拉伯海航道?你死定我亡先? 東面緬甸軍政府從來唔係朋友,而家俾你直通昆明?當年第二次世界大戰,英美聯軍就係用呢條路線支援國軍打日本仔,而家如果戰略方向掉番轉,即係想點?成個印度西岸孟加拉灣隨時可以見到解放軍?

全文載於作者 Patreon

發表意見