2021729

    「令人驕傲嘅人民…」亞美尼亞革命領袖正係記者出身

    帕希尼揚即興號召群眾往共和廣場集會,成就亞美尼亞共和國成立以來最大型集會。

    6.16 港台應景地首播一齣記錄片《無人是孤島》,講述亞美尼亞點樣和平革命民主轉型。反對派領袖正係記者出身,警察不斷踢館,喺記錄片可以睇到佢點樣抱住部電腦唔俾警察搶。2008 年嘅民主運動失敗,政權開槍鎮壓,佢都隨之入獄但冇放棄,出嚟後成為民主運動領導。

    十年後嘅 2018 年,亞美尼亞嘅獨裁者想學普京,喺「總統」與「總理」之間華麗轉身,避開連任限制,操控選舉繼續掌權,本來順順利利。但反對派領袖唔甘心,發起一場環繞全國嘅毅行,開始時得幾丁友(同隻狗),點知行到首都已經有成千上萬嘅人陪住佢行。反對派領袖同群眾一齊突破封鎖線,跟住嘅場面大家好熟悉,警察又放催淚彈。

    之後反對派領袖發起「和你塞」,最經典一幕就係佢身先士卒坐喺架旅遊巴前面,呼籲群眾響應。個巴士司機屌反對派領袖,「我理得你係邊個」、「我仲有屋企人要養」、「唔好搞到我」、「搵過第二個」……大家都見慣見熟。

    反對派領袖答:「一千個對唔住……但所有嘢會改變。」司機話:「冇嘢會改變。」反對派領袖勸司機:「好多嘢都會變。」

    政權梗撚係又出防暴警又放催淚彈……大家都慣唔使重覆。但「冇大台」嘅群眾繼續上街癱瘓交通,獨裁者迫於無奈要見吓反對派領袖。

    依齣紀錄片另一精彩之處,就係政權嘅嘴臉:「非法」、「暴徒」、「冇談判,冇對話」、「勒索合法政府」……又再似曾相識,同依度一撚樣。

    跟住政權當然捉鳩咗反對派領袖,但好快放番。唔係因為亞美尼亞嘅政權比較好心,係佢地背後冇另一個政權撐腰。

    最後獨裁者辭職,民眾迫爆全國最大嘅廣場,反對派領袖終於喺煲底,梳,喺廣場喊出心裡面等咗幾十年嘅口號:

    「令人驕傲嘅亞美尼亞人民,你哋贏咗喇!」

     

    作者 Facebook

    相關文章

      發表意見