假才子

假才子

比較政治碩士學歷、傳媒工作者。取名「假才子」是因為潮流興才子才女,但又沒有人承認自己是假大空的偽才子才女,所以先行澄清。文章內容不好就還請見諒,畢竟我不是個正牌才子。

2020/11/5 - 17:29

侵侵講過的都係真理、已 FC?

資料圖片,來源:特朗普 Facebook

資料圖片,來源:特朗普 Facebook

11 月 3 日 Facebook post 網民留言:

問:「誠心請教一下,除咗嘴賤,侵侵有咩落實咗嘅政策係傷害美國民主社會?或者會唔會做過一個過去 4 年嘅施政分析」

答:「好大工程。Anyway 個人覺得最傷唔係實際政策,係佢的分化言論,大量大話同陰謀論,同不斷口頭攻擊美國的民主制度,成日講到佢贏唔到就係制度被人操控云云。民主同獨裁的最大分別,係民主自由法治,但依個仲要建基於願賭服輸,有和平的政權移交,大家相信透過制度改變。政策爭論係無問題,但如果連對國家根本制度都無共識,依個國家好難維持落去。當大家唔相信選舉制度,要點樣先可以爭取改變?武力。美國內戰咪就係奴隸制州份不滿林肯贏咗大選囉。」

前日回網民時講咗,侵侵對美國最傷係攻擊民主制度。至少依家成功令隔咗成個太平洋的香港川粉認為自己比美國人更了解美國選舉、美國黑暗過大陸、成個民主黨連佩洛西都係收中共錢(下刪 N 例)。

蛇齋餅粽、車人去票站、教人點投票,依啲都只係感覺上唔符合民主原則,但法律上只算係走漏洞,因為一日係佢在票站入面係自己投嗰張票,都係合法選票。

廣告

但依家講緊假票,仲要幾廿萬,係完全唔同層次。大陸完全唔會有假票,因為大陸咩都係中共控制,睇吓螞蟻被一隻手指捽死(唔知 00 後知唔知依個出處)就知。但依家講緊美國。

首先票站同開票中心肯定有侵侵陣營的監察員,佢地咁多錢同義工點會冇人。跟住有 1.4 億人參與咗投票過程,當中近半係侵侵支持者。有大量傳媒係撐侵(冇撐拜登咁多,但都係多,除非你真係信連 Fox 都係川黑)。上千萬公務員,就算多數支持民主黨,都總有共和黨的,同埋就算民主黨都唔等於接受造假。法官在侵侵任期內變咗保守派佔多。

所以如果真係有幾廿萬張假票,點會愁搵唔到人證物證?但依家除咗引述侵侵陣營單方面話有問題,同有支持者鼓譟,保守派傳媒,我睇咗 Fox、Breitbart、New York Post 都係冇任何爆料有假票。所以,唔好太早當係已 FC 咁。我唔係話肯定冇任何問題,只係話有幾廿萬票咁大範圍造假係好難。

同埋我前日、噚日都講咗好多次,搖擺州未點到最後係唔知。搖擺州本來就係侵侵上屆贏好少,密芝根講緊係只贏 0.2%,絕對有機會今屆被翻盤。大城市、郵寄票、提早票係好有機會遲開,令拜登的票在後尾多返,因為大城市都係民主黨票倉,同埋民主黨人先會相信疫情唔係 flu 驚投票時人多。我亦都一路講,未有一邊儲夠 270 張選舉人票唔好話分勝負。依啲都係可以客觀得出的理解,唔係偏幫。

所以我依家亦都唔會話拜登已贏,因為內華達仲好近,但夠 270 張選舉人票的機會係有的。同埋拜登仍然有機會贏佐治亞 / 賓州 / 北卡,雖然後者機會冇內華達咁大。

總之簡單一句。唔好當侵侵講的都係真理已 FC。佢都有 vested interest 為自己講好話同造勢。如果你真係侵侵講乜都信,何不信中國病毒只係 flu?

 

(標題為編輯所擬)

作者 Facebook