立場新聞 Stand News

博爾頓新書洩密,迫特朗普對華策略走上不歸路

2020/6/20 — 18:32

美國前國家安全顧問博爾頓(圖右)(圖片來源:Chip Somodevilla / Getty Images)

美國前國家安全顧問博爾頓(圖右)(圖片來源:Chip Somodevilla / Getty Images)

1. 美國白宮前國安顧問博爾頓(John Bolton)出新書揭露當年特朗普嘅眾多內幕。雖然講嘅已經係一年之前嘅事,但係喺美國大選仲有唔夠半年,全世界經歷咗武漢肺炎一役後,中美之關係跌至冰點,全球圍堵中共之勢已成,喺呢個時候爆出嚟嘅內幕其實有核彈級嘅威力,可惜呢單新聞喺香港並無被廣泛流傳。

2. 新書入面透露,特朗普喺去年 G20 峰會入面主動向習近平要求多購買美國農產品,以助選情;不顧 8964 天安門大屠殺;同時表達佢不願意介入香港嘅示威運動,美國本土都有人權問題,「But he (Trump) added, “I don’t want to get involved,” and, “We have human rights problems, too.”」甚至讚揚中共喺新彊設立「再教育營」係正確嘅做法,應該繼續推行「Trump said that Xi should go ahead with building the camps, which Trump thought was exactly the right thing to do」,引嚟極大迴響。

3. 特朗普對於博爾頓新書嘅指控同平時回應傳媒一樣,一句「fake news」指佢抵毁抹黑(喺呢方面特朗普同中國外交部,以至林鄭、香港警察都好相似),但係與此同時,特朗普都用盡方法嘗試阻止繼續出書,又指佢作為白宮嘅前國安顧問,聽到嘅所見所聞理應係最高機密,唔應該出書賺錢。呢兩個反應其實係互相矛盾,既然係 fake news,咁又點會係洩密呢?

廣告

4. 雖然唔排除博爾頓喺新書入面加鹽加醋谷銷量,但係入面描述好多關於特朗普嘅言行都係非常符合佢作為一個利益至上嘅「生意人」形象:只看重自己利益、貿易協議,人權、民主、自由呢啲普世價值從來唔係佢嘅考慮因素。

5. 諗番起五月二十九日,特朗普喺白宮就香港問題發表嘅演說,措詞強硬,高舉香港嘅人權、自由,要履行中英聯合聲明嘅承諾,言詞懇切,完全唔似一個生意人會講嘅嘢,對照番博爾頓嘅指控,就知道特朗普作為一個政客,除咗利益,背後係無真正嘅價值觀。

廣告

6. 無論博爾頓講嘅嘢有幾多成真,至少有一點係無庸置疑:特朗普將十一月總統大選連任放喺佢第一以及唯一目標,其餘嘅都係路線、手法、策略。

7. 當日拉攏習近平達成貿易協議係為咗討好美國本土農民嘅策略,唔批評中共對港、對彊、以至天安門大屠殺嘅方針亦係策略,目的都係為咗總統大選連任。喺永續權力方面,特朗普同習近平兩人並無分別,差別只係中共係獨裁國家,美國係民主國家。

8. 一年後,時移世易,斗轉星移,中美關係再唔係單單停留喺貿易戰嘅階段,特朗普要連任亦唔係一份貿易協議同為當地農民買大豆就可以解決。一場武漢肺炎,禍起自中共隱瞞、世衞包庇,美國深受其害,確診人數冠絕全球,死亡數字超過一戰時期犧牲的美國人;經濟陷入困境,失業率預計由歷史低位攀升至高達兩成美國人失業,美國救市資金以十萬億美元起跳,幾百億嘅大豆協議突然間變得毫不重要。

9. 加上適逢黑人被警暴謀殺一事,激發全國動亂,特朗普嘅民望大受打擊,民調顯示佢嘅民望低於拜登約十個百分點;連特朗普嘅票倉基督教福音派支持度亦大幅下滑,由 80% 跌至 62%,特朗普連任陷入重大危機。問題係,既然連任係特朗普目前唯一考慮,佢對中共會採取咩路線?喺博爾頓新書爆大鑊之後又有咩影響?

10. 要證明博爾頓嘅指控失實,最好嘅方法就係事實上對中共極為強硬,主動干涉香港、新彊、台灣問題,用人權、自由等原因制裁中共。呢條係特朗普喺十一月大選前唯一可以走嘅路,博爾頓嘅新書更加迫使特朗普再無退路。

11. 近日局勢發展亦都證明美國對中共越趨強硬,走向脫勾一途:美中夏威夷會面無果;特朗普簽署《新彊人權法案》,制裁中共官員;特朗普糾正萊特希澤的說法,與中國全面脫勾仍然係選項之一

12. 香港國安法立法在即,給予美國以及西方各國插手香港事務嘅最佳切入點:中共違反國際條約《中英聯合聲明》及《基本法》;美國領頭,將英國、五眼聯盟、日本、歐洲等各國綑綁,繼英國明確表態後,連一向態度曖昧嘅歐洲議會亦都通過決議,明確反對中共就港區國安法立法,宜家特朗普要轉身縮沙亦已太遲,只有一直硬著頭皮走落去。

13. 宜家離十一月只係得番五個幾月,大變在即,特朗普要對華出招亦係呢幾個月嘅事。更加值得注意嘅係,若果特朗普真係成功連任的話,佢唯一最大嘅制肘已經不存在,嗰陣佢對華嘅策略又會係點呢?若果一旦拜登獲勝,民主黨主政嘅美國政府又會點對中共呢?This is the question.

發表意見