假才子

假才子

比較政治碩士學歷、傳媒工作者。取名「假才子」是因為潮流興才子才女,但又沒有人承認自己是假大空的偽才子才女,所以先行澄清。文章內容不好就還請見諒,畢竟我不是個正牌才子。

2020/5/7 - 12:28

平均 33 歲的芬蘭再出發大聯盟

作者製圖

作者製圖

早兩日(5 月 5 日)開電視睇到香港再出發大聯盟的新聞,真係慘不忍睹。畫面上四件一字排開,老譚(70)、老董(82)、六八九(65)、豬姐(74),學人話齋一陣「生化危機」或「陰陽路」的氣味隔住電視都聞到。香港要靠佢地再出發,真係唔知出發去邊。咁經常睇外國政治新聞的我當然又諗有冇咩外國例子可以拎嚟做對比,靈機一閃,諗起芬蘭。

芬蘭舊年 12 月成立咗一個新執政聯盟同政府,當時引來不少西媒注目,皆因當各聯盟政黨黨魁兼主要官員出嚟見記者時,一排四個全部都係年輕少女(以政界標準而言),就係附圖的:

左一:教育部長、左翼黨代表 Li Andersson(32 歲)
左二:財政部長、中間黨代表 Katri Kulmuni(32 歲)
右二:總理、社民黨代表 Sanna Marin(34 歲)
右一:內政部長、綠黨代表 Maria Ohisalo(34 歲)

廣告

依個「芬蘭再出發大聯盟」(設計對白)平均年齡 33 歲,比起平均 73 歲的香港再出發大聯盟,真係做佢地孫女都得。再想像返老董 + 老譚 + 豬姐 + 六八九個畫面,你話芬蘭係咪真係一股清流,a breath of fresh air。只可以講,人比人比死人。香港係咪陰功,做咩要咁對我地,唔係年輕少女都算啦,仲係成堆借屍還魂,穢土轉生,終南山下,活死人墓。

咁最後又要兜返,我就反對年齡歧視嘅,年紀輕唔一定叻,年紀大亦唔一定差,你睇大馬前首相馬哈迪,一百歲都嚟緊仲係咁精靈。但老董之流真係全港都知係堆填區都唔肯收的廢舊電池,搞咗幾廿年都係只有不斷禍港,仲越禍越大鑊,越墮落越快樂吖嘛。諗落佢地都收咗火㗎啦,咩羅飯、李國蟑之流冇跟埋出嚟,否則就真係群魔亂舞,猛過舊曆 7 月,要問羅蘭你在何處。

 

作者 Medium