立場新聞 Stand News

【德國薩安州選】CDU 贏咗地方選舉對九月國會選舉嘅啓示

2021/6/7 — 23:07

資料圖片,來源:Freepik

資料圖片,來源:Freepik

1. 選前調查係以為 AfD(另類選擇黨)有可能會跑出甚至力壓 CDU(基督教民主聯盟)成為第一大黨,但最後 AfD 同 Linke(左翼黨)係輸多咗。簡單咁睇,其實係有 AfD 同 Linke 嘅票流去 CDU 度。咁呢度就真係 CDU 同 AfD 切割做得好,加上遊離派「含淚效應」(CDU 雖然做得衰但 AfD 應該仲衰過佢),好多人被 AfD 跑出嘅預測恐嚇,轉投 CDU。呢樣嘢我估計九月國會大選都有可能會發生。

2. 疫情係執政黨嘅民意放大器,CDU 舊年歐洲爆疫情嘅時候,見到意大利嘅慘況,然後德國人止到少少血,執政黨民望就升。依家疫情好轉少少,其實都對 CDU 有助力。依家睇返條數,我估計九月疫情應該都唔會太差,所以 CDU 可能都未必會輸哂。

3. 州政府選舉其實真係好睇市長民望。薩安州我唔熟,但係巴符州選得出綠黨市長其實真係克舒曼(有譯克瑞特許曼,太長啦)太有個人魅力,聽過身邊有人講唔鍾意綠黨但「Ich liebe einfach den Mann」,另外上網好多人話佢「唯一唔離地唔係綠膠嘅綠黨人」……所以如果哈瑟夫做得好的話,就一定關事。放大嚟睇,CDU 選擇咗拉錫做總理候選人,其實都真係一個非常差嘅選擇。畢竟唔鍾意總理候選人都真係無咩可能真係純支持政綱而選呢個政黨。

廣告

4. 綠黨民望升咗一輪,呢排光環消失,薩安州選舉無咩收穫,依家我覺得綠黨在野攞咗環保光環咁耐,短暫跑出就開始畀人用放大鏡睇,被鬧天下烏鴉一樣黑。呢種失去光環嘅現象我估計去到大選之前都只會有增無減。

所以都係嗰句,從香港人角度嚟講,當然好想綠黨黃黨上位,但係實在有太多暗湧,黑黨會唔會真係過埋九月之後就無得分豬肉,我仍然係好保持觀望態度。

廣告

 

作者 Facebook

發表意見