立場新聞 Stand News

抗共係兩黨共識,邊個做總統影響唔大?

2020/11/8 — 9:47

拜登(Joe Biden)、賀錦麗(Kamala Harris)(圖片來源:拜登 Facebook)

拜登(Joe Biden)、賀錦麗(Kamala Harris)(圖片來源:拜登 Facebook)

呢兩日見到大家開始話現時「圍中」係美國共和、民主兩黨共識,香港議題喺參眾兩院得到 bipartisan(跨黨派)嘅支持,所以邊個做總統好似影響唔大?

但其實邊個做總統緊要㗎

無錯而家「抗共」係參眾兩院朝野共識,但始終兩院只係立法機關,負責提出並通過議案,最後執行法案嘅工作依然係由行政機關話事。就例如舊年通過嘅 Hong Kong Human Rights & Democracy Act 同 Hong Kong Autonomy Act 咁,參議員眾議員人權組織等等可以提出建議、可以靠媒體群眾比壓力政府,但最後都係要由 State Department 等等嘅政府行政部門草擬制裁名單、決定幾時落實制裁。

廣告

所以邊個黨執政邊個做總統都係緊要的

咁 Biden 做總統係咪好大鑊啊?唔係。

廣告

各種政治原因好多學者專家都有解釋過我就唔獻醜了(建議睇吓孔誥烽教授呢個星期寫嘅文)。

另外就係 Biden 提名嘅所有內閣成員(除咗 Vice President 之外)都要通過參議院確認,所以如果共和黨可以繼續控制 Senate 嘅話都真係唔使太擔心會有「太左」嘅親中人物入閣成為國務卿、國防部長、National Security Advisor 等等。

咁香港人點自處

其實今次選舉期間都有唔少國會幕僚都 PM 我討論過「香港人點解咁支持 Trump」呢個現象,更加講過「fake news」同主流媒體涉嫌干預美國大選呢件事。

相信不論係我定其他有參與國際線嘅同道都有好好地向佢地解釋,慶幸佢地都理解。但點都好,即使唔係美國人都好,都當然可以討論美國政治、可以有自己支持嘅政黨或者政治人物,但散播假新聞以及試圖干預選舉絕對係禁區。

Never leave our decency and dignity behind.

無論如何政權輪替。國際連結都係要繼續做。

既然擔心 Biden administration 會改變對華政策、會唔再支持香港、台灣、Uyghurs、Tibetans,就出多分力幫手,喺香港嘅就玩多啲 Twitter;喺外國就多啲參與 rallies、同左鄰右里同事朋友解釋吓香港嘅抗爭運動。

如果可以維持熱度,如果群眾壓力夠大,就算一個總統點親中都好,都唔可以令香港議題「消失」。

總而言之就係影響一定有  但未到想像中咁差

最後就係雖然美國係 superpower、係「自由世界嘅領袖」,但單靠美國一己之力都無可能成功「圍中」。

多啲關注英國、加拿大、澳洲等等其他會願意一齊帶頭抗共嘅國家、了解吓當地嘅政治;多啲聯繫其他小國,往往呢啲比較細嘅國家反而會因為歷史等等因素更加支持香港;多啲支持台灣、泰國、Belarus 等等正經歷 revolution 嘅國家,we are stronger together.

最後最後,飲水坐直,讀書運動,命運自主。

 

#利申唔是左膠 #利申無投共 #利申有票

作者 Facebook

發表意見