立場新聞 Stand News

撐侵還撐侵,做咗功課先

2020/6/13 — 15:24

特朗普

特朗普

見到有人話奧巴馬任內冇解決種族問題所以冇資格講 BLM ,然後又拉去「左膠得把口」下省數百字。奧巴馬當然做咗好多嘢針對種族平權,無論係警權本身,定係經濟政策同社會保障,問題係之後俾當撈侵推翻哂,你要怪就唔該怪咗當撈侵先。呢啲新聞隨手 Google 就一大堆。

Politico: Trump rolling back Obama efforts on racial bias
WJLA: George Floyd's death highlights Trump's reversal of Obama-era police reforms
Washington Post: Obama huddles with politicians, police and activists on racial bias
Guardian: Jeff Sessions could weaken police reforms on excessive force and racial bias

撐侵還撐侵,功課要做足。近來忽然多咗好多「美國 KOL」,將自己響香港對「左膠」的憎恨夾硬套落美國政治度嚟撐侵,但係啲理據亂哂大龍,講一忽又唔講一忽,識睇嘅觸目驚心。例如佢哋會大篇幅同你講拜登個仔好可疑,但係當撈侵本人每一日都收緊 ICBC 錢完全違反 emolument clause 佢哋又隻字不提;佢哋又會話奧巴馬養大中國,然而 TPP 本身就係因為奧巴馬見到中國唔守 WTO 規矩而另起的大台,而 TPP 又係當撈侵取消嘅。類似的 cherry picking 撐侵法,數之不盡……睇見呢啲冇頭冇尾嘅美國評論,只係夾硬將香港網民對「左」同「右」嘅情緒塞落美國度,真係唔知好嬲定好笑,就好似睇到外國有人讚林鄭咁樣,只可以說句「距離產生美」……

廣告

當撈侵把口的確係成日鬧中國,但唔好見佢大聲就覺得可以靠哂佢;佢出賣過嘅人數都數唔哂,由庫爾德人到佢自己競選主任不等,佢眼中只有自己利益,冇必要當佢神咁拜。真係打國際線的手足亦好明白 bipartisanship 的道理,先唔講民主黨 Pelosi 呢個鐵膽,就連共和黨入面都分門分派,最撐香港的共和黨議員好多本身都唔係侵粉嚟㗎,淨係 Ted Cruz 對侵的怨恨已經有排講。

至於拜登定侵當選對香港有利?呢條問題直頭問錯方向。要問嘅係邊個當選會點影響美國本身,因為今日美國已經七勞八傷,如果美國自己都唔掂,仲點得閒救香港?先唔講當勞侵對美國民主制度的破壞,淨係佢個減稅案已經搞到美國本土元氣大損,貧富懸殊大幅增加,聯邦赤字欠債爆升,再咁樣落去點同中共鬥?

廣告

 

(標題為編輯所擬)

作者 Facebook

發表意見