立場新聞 Stand News

疫苗數據導讀:打咗科興,武肺或更嚴重!

2021/1/20 — 14:56

作者製圖

作者製圖

科興疫苗一直遲遲未肯公佈臨床測試完整數據。醜婦終須見家翁,今日巴西審核疫苗後嘅記者會,當局終於公開左科興交比巴西政府嘅數據。我係度簡單同大家導讀幾點重點。

(1) 早前指有效率只有 50.4%,實際可能更差

科興疫苗有效率 95% Confidence Interval (CI95) 係 35-62%。約四千人打疫苗,86 人之後中武肺;另外四千人打安慰劑,167 人中武肺。

廣告

但因為所有研究都無可能100%準確,參與人數多少等其他因素都會影響準確度。用今次試驗呢一萬人中嘅結果,計出黎係 50.4%,都可能有實驗誤差,唔代表疫苗真係50.4% 咁準。

CI95 嘅意思係,按呢一個研究嘅設計同結果,有95%嘅機會,真正嘅有效率會係呢個範圍之內。一個試驗設計得愈好,例如取樣人數愈多,準確度愈高,CI95 範圍就會愈窄。例如輝端疫苗嘅 CI95% 係 90-98%,即係計算埋誤差,最差都有 90%,最高有 98%。

廣告

而科興嘅臨床試驗,結果只係包含左約四千個打左疫苗嘅人嘅數據,同輝端疫苗四萬人大型測試有一段距離。自然,試驗準確度就較低,CI95 就較闊。

簡單講,而家嘅數據,就係因為研究唔夠強,只能夠估估下,有效率?35-62% 之間囉,冇人講得準。

(2) 不良反應 50.8%

某班人發現科興疫苗有效率好低嘅時候,就開始吹噓話佢安全呀。先唔講你乜都唔打最安全,其實科興疫苗又係咪真係咁少副作用呢?

今次報告終於有數據,50.8% 接種者出現各種不良反應。當然,最多嘅係較輕微嘅局部接種處疼痛,但同樣出現頭痛、發燒等其他反應。(確實每種副作用嘅 %,恕我唔識聽葡萄牙文,搵唔到。容後再補充。)

更重要係巴西當局指出,科興疫苗有機會引致一種,輝端或 BioNTech 等 mRNA 疫苗唔會有嘅嚴重不良反應,見下一點。

(3) 打完科興疫苗,武肺更嚴重?

巴西當局指出,科興疫苗係 Inactivated Vaccine,而呢種方法,有機會係冠狀病毒嘅疾病中,引致抗體依賴性增強 (ADE),令你如果萬一打完仲有武肺,個病情會更加嚴重。

ADE 原理大約係因為你打完疫苗後,身體製造左抗體,但呢啲抗體又可能唔夠強完全消滅病毒。當病毒入侵時,病毒同弱抗體結合,病毒冇死到,反而呢啲抗體幫助左佢進入人體細胞,結果病情更加嚴重。

雖然呢次試驗未必可以確切答到,科興疫苗有幾多會出現 ADE。當考慮到科興疫苗有效率咁低,打完疫苗再中武肺係一個絕對可能嘅情況,巴西當局特登提醒大家有呢個風險。

(4) 長者數據極少

上文提到呢個試驗只有疫苗/對照組每邊約 4000 人嘅結果做數據分析。但原來當中 60 歲以上長者人數更加少得可憐。

186 長者打科興,兩個中左武肺。

176 長者打安慰劑(即係冇打疫苗),都係三個中左。

只有一個個案差距。呢一個差距,絕對有機會只係咁啱得咁橋,取樣或其他因素誤差做成嘅分別。

巴西當局亦特登指出,長者有免疫衰老 (Immunosenescence),疫苗嘅有效率係長者身上可能較低,而科興研究中長者人數「非常少」,係科興疫苗一大隱憂。

(5) 科興並無提供關於抗體轉陽率等數據

科興只有提供臨床數據,無提供免疫原性 (Immunogenecity) 等更詳盡科學數據比巴西當局分析。再者,巴西當局指科興疫苗不能引發 Cellular Immunity,而 Cellular Immunity 係長期免疫嘅重要一環,指科興疫苗長遠保護力唔確定。

最後當局指,因為巴西疫情嚴重,病例不斷上升,亦都冇咩其他選擇,所以通過緊急使用科興。但即使通過,佢地強調必須持續監管呢隻疫苗接種後情況。

最後,厚臉皮衷心懇求大家 Share。呢篇打左好耐,用左好多時間翻譯葡萄牙文睇,就係因為呢隻中国疫苗真係愈知得多,愈唔安心。

偏偏政府已經一口氣用估計超過十億香港人嘅公帤,向呢間中國公司買左 750 萬劑。我唔知民意有冇可能迫到政府取消訂單,回水,但至少我要全香港人都知清楚呢隻疫苗嘅不足之處,同埋呢個政府有幾不濟,先要我地等到而家,一支疫苗都未等到,仲要比啲次等貨我地。
請廣傳。

Source:Covid-19: Anvisa avalia uso emergencial de vacinas

截圖導讀:

試驗中長者人數非常少,長者免疫力亦較低。

試驗中長者人數非常少,長者免疫力亦較低。

研究中只有約疫苗/對照各 4000 人數據

研究中只有約疫苗/對照各 4000 人數據

50.8%出現不良反應

50.8%出現不良反應

有效率35-62%

有效率35-62%

未有免疫原性數據,亦無Cellular Immunity

未有免疫原性數據,亦無Cellular Immunity

Inactivated vaccine可能出現ADE

Inactivated vaccine可能出現ADE

因疫情嚴重,批核緊急使用,但需持續監管。

因疫情嚴重,批核緊急使用,但需持續監管。

85人打疫苗後仍感染武肺
 

85人打疫苗後仍感染武肺

發表意見