立場新聞 Stand News

美國大選選情之純數據討論

2020/10/10 — 23:10

圖片來源:作者 Medium

圖片來源:作者 Medium

美國大選投票還有不到一個月截止(對,是截止,不是開始。投緊㗎喇,幾百萬人投咗票㗎喇),是時候對選情作最後推演。以下純數據討論,不過都預咗今時今日的香港,只要唔啱聽就會瞬間變成「假新聞」。點都好,我會詳細寫哂所有推論過程同數據來源出嚟,當立此存照啦。

首先,方法學:我仍然會以民意調查為依歸。坊間有人話不如睇網上賭盤盤口仲準,我唔同意。乜你覺得啲人真金白銀買就會理性啲?你去馬會或者銀行股票機前面行個圈,睇吓啲人係咪真係咁理性?每屆世界杯,有幾多香港人買英格蘭,係經過理性分析先買?咁你話英格蘭個盤口係咪真係反映到佢嘅贏面呢?因此,我認為,睇賭盤,即係,嘥氣。

另一類,叫經濟模型學派,例如睇年頭經濟數據、失業率,中期民望等等。原則上我唔反對呢種路線,但係我建議大家睇的時候小心啲。例如有個 “Primary Model” 話自己 27 次選舉中 25 次,但係你留意返 27 次即係數到 1912 年,連個作者都未出世……實情個模型係 1996 年發明的,而要發明一個模型估得中一啲已經發生咗嘅事,唔係真係咁難。真係難嘅,係估未發生嘅事。自 1996 年以來,佢係錯過 2000 年一次(而呢一次邊個錯都情有可原啦)。話雖如此,1996 年到今日,樣本數目始終有限,我還是有點保留。又,大家都會話特朗普係一個唔正常的總統,咁要用個舊模型去估今屆結果,又再多點保留。

廣告

如是者,唯有睇返民調。呢個時候,一定有人話:「唓,上屆民調咪話希拉利贏,結果咪輸!民調搵笨!」嗱,民調的背後係統計學,而統計學係會講誤差率。唔理誤差率就話民調冇用,等如瞬間變身陳百祥。我哋不如認真睇吓上屆民調的問題響邊。

上屆的民調有四個問題。第一,民調雖然話希拉利贏,但響幾個關鍵州份係響誤差範圍之內,而最後特朗普以極極極輕微票數勝出(密切根係 2,268,839 票對 2,279,543 票,只差 0.23%),嚴格來講民調錯唔哂。相對來講,今次拜登的領先程度高好多,超過哂誤差範圍(下面會介紹)。就算今屆民調以上屆一樣的幅度同方向再錯多一次,佢仍然會響最關鍵的州份勝出。

廣告

第二,上次好多民調公司冇做到教育程度加權。因為高教育程度嘅人會比較肯接受訪問,而佢哋又比較傾向民主黨,所以會高估民主黨的支持。今屆民調已經全部有執返呢樣嘢。

第三,上次有好多游離票,而大多數游離票最後兩日去咗支持特朗普或者第三、第四政黨。今屆游離票少好多,中間選民又唔鍾意特朗普,第三、第四政黨的候選人今屆又好弱,於是呢方面的變數細咗。

第四,支持唔等於投票。各種選民打壓例如 DQ 選民等等可以令到支持者投唔到票,民意得不到反映。呢個問題今屆可能更嚴重,要注意(下面再講)。

另外,唔係每一個民調都可以睇。間唔中會有記者打嚟問「邊個邊個民調話特朗普會贏喎」,我都會同佢講返,「乜乜研究協會嘅民調都會同你講林鄭好受歡迎㗎,外國傳媒信咗咪中伏囉。」當中的關鍵,就係無論香港定外國,唔係每個民調都信得過,亦會有人刻意整啲好有問題的民調出嚟,其實係為咗帶風向。以下所有討論,都係按 538 同 RCP 的整合數據。任何呢兩個網站都睇唔上眼嘅民調,可以不理。想知道一個民調睇唔睇得過,可以參考 538 嘅評級

就目前民調,如果呢一刻截的話,以下係對拜登的樂觀估計。

如果選情唔理想,以下係對拜登的保守估計。

冇錯。即使在保守的估計當中,拜登都會贏。樂觀同保守的分別,在於點睇 FL、NC,同埋 NE-2。

講完結論,我哋一步步由基本盤開始推論。

以下藍色係上屆民主黨贏的州,紅色係目前特朗普領先多過 3 個百分點的州。

上屆民主黨贏的 232 票,可以視為基本過基本的基本盤。特朗普有諗過突襲明尼蘇達 MN,但係以現時的形勢,拜登領先緊 9%,要翻盤實在有點天方夜譚。

如果我們接受民主黨上屆贏的州,今屆都會贏得返,咁成場選舉就只係要睇三個州:賓夕凡尼亞 PA、密切根 MI,同埋威斯康新 WI。拜登只要贏呢三個州,就算其他搖擺州全部輸哂,都已經有 278 票,多過 270 門檻,夠票贏。

咁拜登有幾大機會贏呢三個州呢?我哋逐個睇。首先係賓夕凡尼亞,贏緊 7%。

然後係密切根,贏緊 8%。

最後係威斯康新,贏緊 7%。

注意,7–8% 的領先幅度,已經過哂統計抽樣誤差。就算今屆民調錯到七彩,拜登仍然有好多空間。

寫到呢度,拜登已經夠票。但如果真係好意外!好意外!好意外!拜登無厘頭其中一個州失守呢?仲有亞里桑那 AZ 呢個保險掣。

拜登一直響亞里桑那 AZ 領先緊。幅度唔多,但勝在穩定。

但係我之所以會將亞里桑那分開嚟講,係因為佢同時仲選緊參議員,而民主黨個候選人 Kelly 目前贏到開巷。

而家啲人投票通常都 straight ticket 的了,我推算 Kelly 會益拜登贏埋亞里桑那。

計埋亞里桑那,拜登的票數已經相當穩陣,其他州贏唔贏已經冇所謂,贏就當錦上添花的了。

而拜登又真係仲響其他州有機。例如北卡羅萊納 NC,贏緊 3%。值得注意的係同亞里桑那一樣,北卡今屆都有參議員改選,民主黨個候選人都係領先緊,或者可以益埋拜登。不過呢位候選人最近爆咗單桃色新聞,雖然民調話選民唔介意,但我對北卡的睇法相對審慎。

最後就是 mother of all swing states,佛羅里達 FL 了。目前拜登領先緊 4%。

佛羅里達對於特朗普來講,係許勝不許敗;對拜登來講,贏咗就正,輸咗又未洗死。而目前為止,拜登領先緊。

坊間仲有啲對拜登再樂觀一啲的估計,例如話喬治亞 GA、俄亥俄 OH,同埋愛俄華 IA 都會翻盤。呢啲講到咁遠嘅我就唔討論喇。畢竟反轉嚟諗到好悲觀亦得,政治一日都嫌長,仲有好多事情可以發生,以上只係按呢一刻民情嘅推算。

最後,返去上面提到,民意係一件事,投到落票箱先係真嘅。今屆疫情問題,破紀錄郵寄投票,有好多變數。因為好多人第一次郵寄投票,可能會入錯信封,唔記得貼郵票,填表簽錯名……最後因此而被 DQ 的選票可能數以萬計,打官司都唔知要打幾耐,贏民意都可以變輸選舉。唯一確定的,是除非有一邊贏到開巷,當晚恐怕冇人敢宣佈結果。

最後最後,多口講兩句:越近選舉,越多訪問,越感到香港不同傳媒之間國際新聞處理能力可以差距極遠。身為受訪者,面對有做過功課的記者,會越講越多;面對冇做過功課的,會講到冇癮。而香港處理國際新聞的一般水平,大概和外國記者在香港以為《逃犯條例》「暫緩等於撤回等如取消」咁上下 ,如果不是更差的話。即係好似之鋒 Nathan 周庭等受(唔熟書的)外國記者訪問的時候,經常有笑話,搞到佢哋頭都大埋。反轉頭,你可以想像響香港睇到的美國新聞質數有幾參差。早排仲有記者打嚟話佢老板可能會派佢去美國,臨時臨急傾咗半個鐘,我都為佢擔心。

而好不幸,可能受主觀願望影響,不單止網民,就連香港主流傳媒引用的美國新聞的來源都開始有啲唔對路,用埋哂啲極少眾、連美國人自己都唔會睇的來源。睇呢啲新聞,就好似一個唔響香港的人上網睇「幫港出聲」然後信到十足十,仲要將其他講法一律視為假新聞一樣。有網民咁樣樣,唔奇;專業傳媒呢,請注意了。其實過咗過去一年,大家應該學識咗睇新聞要 fact check,改圖或者冇頭冇尾嘅片都要留神,唔好俾主觀願望代替分析;嚟緊美國大選,都一樣。

 

作者 Medium

發表意見