人在中環 - CK

人在中環 - CK

我係一隻又笨又固執嘅豺狼。著有《人在中年》。

2020/3/16 - 15:29

西方防疫集體瞓咗ㅤ自大係會得到教訓

成日都話,自信自大係會得到教訓的。西方社會喺呢次防疫工作上做得有幾差,全世界都有眼見。

大陸最初隱瞞疫情,仲老屈啲吹哨者係造謠,處理手法固然係陰質。但由武漢疫情爆到佢冚到冚唔住,然後城都封埋,足足有個幾兩個月。呢段時間嘅新聞訊息,係好清楚揭示到,疫情一旦失控後,情況可以有幾大鑊。醫療系統癱瘓之後,死亡率可以升高幾多。

咁有個幾兩個月時間去準備,班鬼佬究竟又做過啲咩?除咗笑 9 你班亞洲人 overreact 又戴口罩又搶日用品之外,有啲乜嘢嘅抗疫準備,係喺呢段時間裡面做過?

廣告

眾多西方國家,呢十年八載吸收了大量國內移民,春節假期一過,就自然會有大批人從大陸返番去佢地移咗民去嘅西方國家。如果大陸可以爆成咁,當呢批人返到去佢哋國家之後,哪裡來的自信佢哋嘅國家唔會大爆發?

面對疫症,一直以來我傾向覺得,文明世界做「防疫」會比較好,因為人民普遍 educated。但我諗呢個觀念應該已經過時了。人在文明社會裡,生活安定,而且自信滿滿,最終喪失了對危機嘅敏銳,而且總是過份樂觀得像一個被寵壞了的小孩。然而當疫症在一個地方落地生根,我卻相信獨裁專政的地方,「抗疫」工作可能來得更有效果。在獨裁的世界裡,政府要你收監就收監,要你滅聲就滅聲,唔聽話自我檢疫隔離的話,我逼你來個陰陽相隔都仲得。然而在講人權講自由嘅文明社會,做唔做得出?

西方社會倘若在防疫那一關失守了,病毒落了地爆發之後,抗疫嘅時間恐怕會有排拖了。

最近收到唔少外國朋友 share 出嚟嘅文章,內容好多都係講,呢隻肺炎好狡猾,即使全無病癥一樣可以傳染俾人,大家要小心云云……屌,呢樣嘢我哋講咗兩個月㗎啦喎,你哋之前成班人係咪集體瞓咗?依家先走嚟講話要 social distancing?有冇再遲啲呀?

 

#佛系救國

(標題為編輯所擬)

作者 Facebook