Knock Off Journal

Knock Off Journal

M,八十後、女、出身草根,香港人。Facebook專頁《Knock Off Journal》的作者。現旅居日本鎌倉湘南海岸。攻博中,不知歸期。

2021/2/26 - 18:30

用人唯庸

立場新聞圖片

立場新聞圖片

背景資料講幾句先。大家應該知道有線電視係永升亞洲嘅,永升亞洲兩個大股東一個係遠東邱德根個仔邱達昌、另一個係同新世界鄭裕彤個仔鄭家純。(打完呢句已經覺得自己完全投錯胎)

永升亞洲入主有線之後,人事變動多到我都唔記得咁多。「打響頭炮」就係新聞部執行董事馮德雄轉任顧問,改由謝燕娜接掌新聞部;再將總監一分為二,由陳興昌和李臻出任新聞總監,李臻升職之後,其原來職位(GM)由空降的鄧明儀接棒。2020 年 8 月,有線解僱三名工程部資深主管,引起大量新聞部員工不滿;2020 年 12 月,有線新聞部裁員 40 人,新聞刺針滅組,此可忍孰不可忍,沒有被裁的新聞部主管亦辭職明志。

有線新聞部四高層翌日發聲明指裁員目的係「根本性的架構重組從而削減成本」,令新聞部「能達致人手和資源共用」,仲承諾「繼續做好有線新聞」喎。裁員後大家見到嘅有線新聞係咪真係有「做好」過先?我唔數喇,因為罄竹難書,大家睇「每日關心四人幫甩線狀況」就知道。

廣告

裁員一事之後被裁或辭職記者都有新路向、新崗位。中國組去咗眾新聞繼續跑中國新聞;好多記者、主播都開 page,楊量傑仲出埋書。昨晚十一點幾連有線前採訪主任林妙茵都開 page,12 個鐘已經有 4000 個 like,最新一篇短評財政預算案嘅文亦有過千 like、300 以上 share。

沒有比較沒有傷害,我就咁講被裁或離職嘅人做得幾好幾好,係對比唔到班新高層係幾廢幾廢。大家有冇留意有線新聞個 page 成日 share 有線生活嘅 post?有線生活不就是李臻好友鄧明儀主理囉。乜佢哋兩個唔係好有「社交媒體」「新媒體」經驗咩?點解有線生活個 page 開咗個幾月都只係得 544 個 like,而最新一個 post 甚至只係得 share 而冇 like 嘅?點解嘅?

又,有線新聞 APP 嘅新聞刺針已經消失咗喇。許方輝,裁員當時你唔係話由港聞記者做埋刺針嗰份嘅咩?陳興昌主理下嘅新聞刺針,出咗兩隻故,一隻係野豬、一隻係黑工,兩隻我之前都出過 post 插到體無完膚,之後就刪 post 下架,然後就沒有以後喇。

大家仲記唔記得永升亞洲入主有線之前,有線大股東係邊個?係九倉。或者係發財立品,其實做電台係賺唔到大錢嘅,有線仲要由 2008 年一直蝕到而家。但係單單一個會最快最新咁傳遞資訊嘅專業新聞台,已經係對社會負緊企業責任。但如果入主根本唔係為咗負企業責任,高薪聘請庸才去慢性毒殺一個新聞頻道、當作獻媚的棋子甚至俾人當係私人遊樂場咁玩(例如請人原來 friend 子就得,唔需要睇能力)。咁你不如直接執柒咗佢,唔好假惺惺、唔好浪費網絡同大氣電波資源喇。

2017 年易手之後,永升持有線寬頻約 54.02% 股份,新世界發展董事會主席及執行董事鄭家純間接持有 24.58% 股份。新世界發展執行副主席兼行政總裁鄭志剛(aka 鄭家純個仔)最近話會疫市請 1000 人,我聽完,I am so s9rry 我真係冇霎時感動,而係即刻諗起有線嘅下場-你知唔知自己其實有份嘅公司請咗 D 咩人?又,炒咗咩人先?

最後,要睇專業時事分析不如睇林妙茵嘅【單向城市論壇】,記得 like page 呀

作者 Facebook