立場新聞 Stand News

記者註冊制度,要進來了

2020/9/22 — 13:55

警方寄咗封信畀四個傳媒協會,前面全部廢話唔講了。重點係:

本地媒體,要登記咗 GIS(即係政府嘅新聞發布系統),警方先當你係傳媒。

然後 GIS 要新聞處批。有幾個條件嘅,例如人手配置,每日出幾多條新聞之類。

廣告

簡單總結係,記者註冊制度,來了。

坦白講本身 GIS 嘅要求,對一個傳媒機構來講唔難做到。不過喺公民媒體、網絡媒體年代,就顯得過時。舉個例子,獨立記者基本上無可能滿足人手配置。

廣告

不過以往香港,公民記者、獨立記者同小型網媒,基於編採方向未必需要用到 GIS,大家算係相安無事,反正香港政府落後於世界都唔係新事。

但而家警察用 GIS 做資格審查,就萬萬不可。

記者註冊制度,邊個好想要,大家心照。但基於政府之前仲係要裝出一副符合普世價值嘅樣子,扮哂嘢放下風又收番。

而果然,最有「魄力」去「排除萬難」嘅,都係香港警察,由佢哋去做開路先鋒。

仲用上一個懶係「內政」,你吹佢唔脹嘅方法,改警察通例。

所以,呢個政權過去一年學到嘅嘢,唔係從善如流,唔係自省吾身,更唔係尊重制度。佢只係明白咗,擺明車馬去改會畀人反,所以就用已有權力,走捷徑避審查去郁。

唔使面對公眾唔使解話,扮晒嘢出封信知會一聲,話會聽你哋意見。收工。

做咗第一步,之後每步都好簡單。

今日搞校媒網媒,聽日搞有登記網媒,你點知佢唔會又無啦啦話,「報道偏頗」嘅唔再續 GIS?然後求其響新聞處搵兩個 D4,安個「傳媒事務統籌主任」嘅名畀佢,就可以DQ?

唔會?2016 之前你有無諗過,會有人無得報名參選?

行家們,我哋真係唔可以有「偏安江南」嘅諗法。

咁多位師兄弟姐妹,真係要 assemble 啦,再唔出聲由佢踩上嚟,呢行就 end game 㗎啦。

發表意見