一週一牛

早兩個月，主編同我喺國家地理頻道(National Geographic)睇咗由狄卡比奧主持嘅 “Before the Flood”，一套講Global Warming嘅電影。電影中提到「養牛」非常消耗資源：

－美國約有50%嘅地用嚟製造食物，當中70%用嚟養牛；
－養牛嘅過程中製造大量甲烷(Methane)，其中一種溫室氣體；
－估計美國排放嘅溫室氣體中，有10-12%來自養牛。

睇完套戲，主編感受到地球暖化好恐怖，好震撼，但照舊唔熄燈、熄風扇。根據中電嘅耗電排名佢屋企係高能源消費戶，屬最差嗰5%。

基本上，香港人都係咁，講一套、做一套。例如好會珍惜啲有特色嘅嘢－唯一佢哋會珍惜嘅時候，就係啲嘢就嚟無、就嚟執嗰陣。呢啲例子太多，唔詳細講。

為咗改變呢種惡習，我哋諗可唔可以做少少嘢，嘗試幫助解決地球暖化。於是，我同主編喺10月中開始，每星期規定只可以食一餐牛肉，（梁家輝喺寒戰嘅口吻）行動代號係：

「一週一牛」

係一週只食一餐牛，唔係一週食一隻牛。

──────────────────

作為一隻食肉獸，我無咁偉大，亦無咁嘅能耐改為完全食素，暫時只可以定啲無咁進取嘅目標。我嘅計劃係首先食少啲高溫室排放嘅食物（例如牛肉）、減少耗電，慢慢再食少啲肉、買少啲垃圾……再過多幾年就捨身成仁，唔好再活落去，咁就唔會有來自我嘅溫室氣體排放……為環保去到咁盡，我都算偉大。

「一週一牛」進行咗大概兩個月，都算順利。不過有幾件趣事分享下：

－第一、二個星期，其實幾難捱。以前可以中意食牛就食牛，去九記就九記、大利就大利，一下子變成每星期只有一次限額，你會變得好撚重視嗰餐牛，有時見到有牛肉嘅餸都要忍住唔叫。以前食晏會食咖喱牛腩，呢兩個月已經無食過。嗰啲乜嘢牛腩河、牛肉面、黑椒牛仔骨（以前外賣必叫），已經斷絕咗關係，無再來往；

－有次星期一食完牛，點知隔兩日同朋友食飯，佢話要打邊爐！打邊爐嗰陣，碟肥牛仲要放喺我面前，我屌你老味！！！！望住碟肥牛，近在咫尺，卻又係世上最遙遠嘅距離。最後我都忍得住，一舊都冇食過，淨係望住啲朋友狂吞牛……

－啱啱去東京，成程只係食過一次牛肉。後尾想去Red Rock同吉祥寺食和牛，最後因為一週一牛而打消咗念頭；

－有次同某網媒仆街老闆食飯，諗住去相熟嘅餐廳鋸扒……但諗起用個quota同個男人去鋸扒好唔抵、好唔浪漫，就轉咗去食意大利粉；

－有次唔覺意買咗個牛肉飯團，一星期食咗兩次牛。因為呢次誤食，我同主編決定邊個誤食就要捐錢畀Green Peace（一定要誤食，唔可以當贖罪卷或者畀錢買機會咁），至今我哋都冇再試過誤破一週一牛呢個戒條。

整體嚟講，我哋都保持到「一週一牛」。

你會問，你哋儲埋一星期食一餐牛，會唔會嗰餐食次勁嘅，倒頭來究竟食多咗定食少咗牛？

我好肯定咁答你：食少咗。

你一餐食嘅牛，食極都係有限；但你一星期咁多餐，唔覺意真係可以餐餐都有牛。更加重要嘅係，自從開始呢個一星期一牛之後，我同主編有兩三個星期係完全無食過牛，個限額無得累積，個個星期清，我哋都係由得個限額無咗，唔會特登星期六晚走去食牛。

自問都已經係個物慾幾低嘅人：無車，出入都搭地鐵；住嘅地方又細，三個LED燈夠照晒全個studio flat；唐老鴨精品都開始少買（啱啱去）；平時啲垃圾都唔會分類，因為根本無垃圾……又無子無孫，啲子孫都去晒啲AV女優度，老老實實，地球暖化關我撚事……

短期嚟講，雖然送到去餐廳同街市嘅牛已經死撚咗，所排放嘅溫室氣體、食唔食佢都已成定局（唔食好似仲令地球同牛牛嘅犧牲顯得好無謂……）；但長遠嚟講，我同主編每年夾夾埋埋應該食到一隻牛掛，地球會因為我哋而養少一隻牛。古語有云，勿以善小而不為。而家慳咗一隻牛嘅溫室氣體，算做咗件好事。唔奢望上天堂咧（你上天堂會見到林鄭、梁美芬同689，呢啲天堂上唔上都罷），希望他朝落到地獄，閻王同牛頭馬面大哥可以偶爾提供一餐牛肉ShabuShabu啦。咁搞「一週一牛」變咗件投資項目，哈哈哈哈哈哈。

新年，新氣象，嘗試踏出一少步改變世界，「一週一牛」應該會繼續。最後，

約我食飯，千祈唔好再約食牛或者打邊爐……

（圖：打邊爐事發當日，放喺我面前嘅牛肉。）

──────────────────
不要問，只要like，仆街史兄的專頁同IG。

史兄Facebook專頁

史兄IG

Project HK 專頁
──────────────────