人在中環 - CK

人在中環 - CK

我係一隻又笨又固執嘅豺狼。著有《人在中年》。

2021/1/22 - 18:07

一半中,一半唔中

圖片來源:特朗普、拜登 Facebook

圖片來源:特朗普、拜登 Facebook

搞咗兩個幾月,拜登終於登咗基,侵侵最終輸咗了。

大選之前,N 個術數師都為美國總統大選做預測。視乎你睇開啲咩 channel 啦,講到實牙實齒話登 / 侵贏嘅大有人在。好實牙實齒咁㗎喎,但結果最後只會有一個,倘若估兩邊贏嘅大師各有一半,即是,只有一半人會算中,而另一半,會被標籤為「唔準」。

實際上術數師對「算中」有幾大把握呢?早一排我同某個術數師吹開水,咁嘅時間,自然就會問佢估邊個贏啦。佢就話,估登會贏。不過,估㗎咋,把握都係一半半。

廣告

一半半?嘩屌,咁使乜問你呀?我呢啲凡夫俗子都有「一半」把握估得中啦,咁使乜問你呢啲「專業人士」?

術數師話,真係得一半把握㗎咋。你估我哋係特異功能人士,可以搓吓個水晶球就見到聽日六合彩嗰幾個冧把咩。我都係搵呀侵侵個八字,又再搵吓阿拜登個八字,左計右計計吓佢今年行唔行運,又拼吓落去美國個開國八字,睇吓夾落去似唔似樣……大佬呀,嗰啲八字,仲要係上網搵㗎咋,都唔知堅定流。計到一堆嘢啦,然後都係要靠推理。咁,推到個答案出嚟,最後可以有幾大把握呀?

我識你,知你多少背景,依家又見到你真人喺面前,feel 到你個氣場,再加埋平日見得人多嘅經驗去推論,批你出年行唔行運梗係容易準啦。但係,估政治喎,其實大家真係有幾多經驗呀?背後係點我哋知條鐵?我就算計到侵侵行運啦好未?咁行運係應該當選定應該唔當選先?當選咗然後俾人暗殺咗仲算唔算行運?唔當選避過一劫然後影響力可能仲大啲,咁又點計數?政治嘅嘢,背後太多睇唔透嘅嘢,你叫我算,算到都唔知最後個演繹係點啦。點估?

咁你哋又咁 L 實牙實齒……

我想㗎?做我哋呢行,對將來嘅態度可以有「懷疑」㗎咩?識得你耐先同你講真話咋。俾人覺得你有「懷疑」,仲使撈咩。我哋雖然係「專業人士」,但都只係讀書人一個,睇完症之後依書直說咁講你聽。對於將來,我都淨係見到一堆符號㗎咋。你估真係傳說中嘅先知咩。

喂,夠鐘啦,有嘢仲想問就再約 appointment 啦。出面俾錢吖唔該。現金有九折。

 

(標題為編輯所擬)

作者 Facebook