作者製圖

一場暫名為《試當真一週年現場版》的社會實驗

【文:phk】

香港 YouTube Channel「試當真 Trial & Error」開騷,其實秘密地進行緊一場社會實驗?今次「試當真」貫徹「認真試下、試下認真」嘅風格,同咁多位「認真毛」黎一個「社會實驗」!《試當真一週年現場版》打破傳統,票價全場劃一,實行類似荷蘭式拍賣 (Dutch Auction) 嘅每 24 小時降價,即喺張飛幾錢,由觀眾話事,大家可以等「啱心水先入手」,按「試當真」喺自己心中嘅價值買飛,咁大家又有無諗過呢場「社會實驗」背後嘅心理因素呢?

認真試下、試下認真

係啲咩引起大眾對《試當真一週年現場版》嘅關注?

令《試當真一週年現場版》引起關注嘅最基本原因,固然係開台以黎儲落嘅觀眾群。

「試當真」一直保持 Trial & Error 嘅實驗精神,所以開台以黎都試咗唔少新嘢,單單係打破「一台獨大」傳統嘅「四台聯播」都已經引起唔少迴響,而今次亦都唔例外。今次嘅票價打破以往固定嘅 $480, $680, $880…,而係反傳統式由 10000 到 $10 蚊嘅飛都有,而且每日降價,相信淨係呢份新鮮感,都已經可以引起唔少人嘅關注。

咁點解新鮮感又會引起關注呢?其實我哋嘅認知能力依賴大腦細胞嘅運作,而當大腦細胞面對新鮮嘅刺激時,就會有較強嘅敏感度。換句話講,人會對新鮮嘅嘢更加敏感,而且仲會因為好奇心而更留意新事物。而呢個亦正正係門票開賣第一日朝早,快達票網站系統繁忙嘅原因。不論大家買唔買飛,都會喺好奇心驅使下,抱住「食花生」嘅心態,去睇下「試當真」喺呢個全新賣飛方式下嘅售票狀況,而單單係呢場「社會實驗」嘅序幕,已經證實咗新鮮感引起關注嘅心理。

損失規避 Loss Aversion

雖然票價有機會跌落最低位嘅 $10,但係點解仲會有大把人願意喺遠高於 $10 嘅價位買飛呢?除咗出於對「試當真」表演者嘅支持,其實亦都係因為我哋嘅「損失規避 (Loss Aversion)」心理。喺認知心理學上,人因為損失而產生嘅負面情緒,其實相等於兩倍因為收益而產生嘅正面情緒,換句話講,人對損失嘅厭惡大於對收益嘅追求,所以為咗避免買唔到飛,通常大家都會寧願買貴少少。

錨定效應 Anchoring Effect

望住啲飛嘅價位由 $10000一路下降,你有無覺得好似每過 24 小時都賺咗少少咁?其實基於心理學上嘅「錨定效應 (Anchoring Effect)」,我哋會好重視一開頭得到嘅資訊,仲會以佢作為之後嘅評估標準。所以當 $10000 成為咗我哋嘅參考點嘅時候,就算佢本身高於市價,但每次降價我哋都會覺得慳咗錢,物超所值。所以就算佢依然喺高於市價嘅價位,我哋都會因為同一開頭嘅 $10000 比較而覺得佢平咗。

學「試當真」話齋「其實數據係唔會呃人嘅」,《試當真一週年現場版》開賣第三日,門票價格跌至依然高於市價嘅$2000,總共已經有 78 個人買咗飛。

從眾心理 Conformity

如果網上流傳某個價位會好多人買,你會唔會都喺呢個價位入手?其實喺呢個情況下,無論係咩價位,我哋都會不自覺咁被說服,覺得呢個就係合理價格,然後跟住買,而「跟大隊」嘅行為正正源於我哋嘅「從眾心理 (Conformity)」。其實從眾行為並唔係源於缺乏自信,而係因為我哋覺得其他人對呢個情境嘅認識會比自己更多。所以尤其喺今次買飛,大家都唔確定喺咩價位入手嘅時候,就會透過觀察其他人黎得到資訊,再做決定,而呢個就係心理學上嘅「資訊性從眾 (informational conformity)」。

其實今次「張飛幾錢,由觀眾話事」嘅實驗,喺俾「認真毛」按自己能力支持鍾意嘅創作者、「認真試下 試下幾平」嘅同時,亦都係為咗知道「試當真」喺香港人心目中嘅價值。當然門票嘅價錢唔可以完全代表佢哋嘅價值,但係各位依然可以「自己決定值唔值」,按自己嘅心水支持本地創作者。雖然背後有好多心理因素影響,但始終門票最後會幾時沽清其實都係掌握喺大家手上!

原文刊於 2BeGuru Facebook

作者簡介:phk,00後心理學系本科生,鍾意透過唔同電影嘅世界觀反思大家身處嘅現實社會,亦希望可以喺日常生活遇到嘅大小事入面,研究下唔同行為背後嘅心理。
 
 

編輯推介

    發表意見