人在中環 - CK

人在中環 - CK

我係一隻又笨又固執嘅豺狼。著有《人在中年》。

2020/1/15 - 10:11

中年之後,發覺美滿婚姻往往少之又少

一如呢大半年嘅日常,新聞多到呢。

政治環境係大氣候,人人都避唔到。不過大氣候以外,像我呢亭中年人,自身要面對嘅困難總係多蘿蘿。人到中年,總係有啲屎要食,問題係,睇你食中邊款咁解。

聽得最多,必定係婚姻問題。年過四十之後,大家好似輪住出事咁款。其次,係疾病;金錢問題,出乎意料地排喺前面兩個之後。

廣告

老婆有個有錢 friend 同佢講,話好羨慕老婆同我有段幸福嘅婚姻。如果可以「交換」的話,佢換乜都肯制。咁老婆話,唔係你想換乜就換乜㗎喎,淨係換啲好,呢個動作就叫做「購買」啦。要換嘅,就全套咁換。咁老婆身體唔好有長期病,若然要換,咁換埋呢樣走,制唔制先?

初初知道老婆有病嘅時候,我其實都講過類似嘅嘢 … 即係只要換返佢嘅健康返嚟,我換乜都制。不過當你拍心口話乜都肯換嘅時候,喺你腦袋裡面全部都係啲財富事業之類嘅嘢,while 身外物其實係 easy choice,但若然要換走你嘅婚姻,肯唔肯制先?

病冇錯係不幸,但老婆話,婚姻出事同病,兩者真係被逼要揀,其實都係揀後者。病,有藥食,有 treatment。病情會有舒緩嘅時候,辛苦亦不至於係每分每秒。婚姻出事,until 離婚一刻,每分每秒都係痛同受罪,而且舒緩 / 改善嘅機會極之渺茫。但即使婚姻無可挽救,人總係有千百款理由叫自己繼續困在同一個困境之中。結果係痛到永遠。

個身痛同個心痛,我都相信後者應該更難頂。

中年之後,發覺美滿婚姻往往少之又少。我朋友數量都唔算少,但去到呢個年紀依然婚姻美滿嘅,十隻手指數得晒。而呢十隻手指裡面,竟然多過半數係冇小朋友的 …

#人到中年
#港豬煩惱
#講少日政治