我係薯條控

我係薯條控

為咗食好味嘅薯條,我可以去到好盡!

2021/1/3 - 11:17

今日薯條睇真 D(第一百三十七集)

作者攝

作者攝

嚟到 2021 年啦!第一件事當然要搵間好嘅餐廳,嘆下好味嘅薯條先!呢間位於土瓜灣嘅餐廳薯毛毛一直都有 mark 低,但係都總係搵唔到機會試,今次就特登過嚟試下先!

呢間餐廳同大坑嘅 Pheromone 有啲似,同樣係一個價錢,但前菜到甜品一樣都有得食,近期無得開晚市之下,所以,佢地都揀咗開午市,不如就由一開始慢慢咁講下呢餐飯係點啦!

佢地嘅前菜可以分為蒜蓉包、36 個月熟成火腿(可以加 $68 換做 48 個月熟成火腿)、餐湯同埋沙律。蒜蓉包同沙律都正常,36 個月熟成火腿帶少少鹹,啱啱好令到你有少少開胃,如果有飲酒就會啱啱好,不得不提佢地當日嘅磨菇湯,埋落唔大碗但都幾足料同好飲。

廣告

至於薯條呢,每次都係新鮮炸出嚟,份量嚟講都夠兩個人食,上面灑咗 honey barbecue sauce,望落去都已經知道係夠哂惹味,薯條夠熱,外脆內軟,薯肉亦都夠,仲要可以俾大家 refill,食返兩 round 係常識吧?如果真係要挑剔,茄汁份量一開始可以俾多少少,同埋有多啲醬嘅選擇就更加好啦!

當日嘅主菜係美國嘅封門柳,薯毛毛覺得都整得相當唔錯,用咗慢煮處理之餘,食落去肉味都好重,而且個份量係夠食,絕對係對得住價錢呀!如果唔想食牛嘅朋友,係可以加錢試下豬 / 羊 / 鴨,甚至係海鮮㗎!

最後當日嘅甜品係焦糖芝士蛋糕,細細件,但又唔會太甜,加埋杯咖啡,啱啱好令到你食完好滿足嘅一餐。當然啦,呢個份量以午餐計真係太豐富,食完真係行返半個鐘當做運動先得呀!

評分:
薯條 Size 🍟:幼薯條
價錢 💰:N/A
賣相 📷:4 / 5(1-2 人份量,睇你有幾大食)
薯條質素 🌟:5 / 5(夠熱,內脆外軟,薯肉夠,整體相當好)
醬汁 / 調味 🍯:4.5 / 5(Barbecue sauce 夠惹味,醬汁有多啲花款會更好)
性價比 💸:4.5 / 5(任食喎,挑戰你個胃啦)
總分 💯:18 / 20

選擇性質:兩個人撐檯腳 / 朋友聚舊

呢間餐廳細細間,全個場加埋得 22 個位,喺宜家二人限聚令,仲要無晚市之下都仲堅持開舖,真係好唔容易!所以,大家有機會嘅話絕對值得支持一下佢地呀!同埋,聽聞佢地係有得食廚師發辦,希望遲下搵機會再嚟試下!今日講到呢度先,下星期見!

餐廳:Forkers
地址:土瓜灣鴻光街 5 號

 

想睇 MeWe 版?Click 呢度啦
想睇返之前嘅推介?Click 呢度啦

#Forkers
#香港 #九龍 #九龍半島 #土瓜灣 #鴻光街
#薯條 #Fries #FrenchFries
#薯毛毛 #薯條控
#我係薯條控 #今日薯條睇真D

作者 Facebook