我係薯條控

我係薯條控

為咗食好味嘅薯條,我可以去到好盡!

2020/12/5 - 20:09

今日薯條睇真 D(第一百三十三集)

作者攝

作者攝

話說上年八月尾第一次去呢間扒房後,喺呢年幾之間,由佢地嘅舊舖,到宜家新舖,前後同咗 50 位朋友嚟過,一共食咗 8 次!究竟呢間扒房有幾大吸引力,令到薯毛毛經常騎牛出城去到大坑幫襯佢地?宜家就話俾大家聽啦!

呢間扒房嘅定位係廚師發辦嘅扒房,即係你食啲咩通通都係由老闆話事,啱哂有選擇困難症,又或者想要新鮮感嘅朋友!嚟呢度除咗鋸扒之外,仲有前菜、沙律、餐湯、薯條,同埋甜品!更重要係,以上呢堆嘢食係 free flow!絕對係挑戰大家個胃嘅極限呀!

先講下佢地嘅前菜,沙律望落去唔多特別,但係用咗櫻花蝦呢點係令到成個沙律生色不少,最誇張嗰次係有朋友食咗三轉先肯收手!餐湯就無固定款式,前幾日嚟到終於飲到佢地嘅細蓉湯底,每次嚟到都會飲返兩碗先肯收手,當然,餐湯當然要搭埋蒜蓉包啦!佢地嘅蒜蓉包係自家製,出面食唔到呢種味道!

廣告

佢地搬到新舖之後加入咗餐前小食,今次係傳統米通再搭埋蟹黃醬 mix 日式叉燒,淨係呢幾點大家都應該睇到老闆之一,亦都係呢度嘅大廚震宇嘅創意係點啦!仲有佢地嘅炒蘑菇,望落去唔多特別,但係一眾朋友食完都係讚不絕口。諗返上年薯毛毛第一次嚟呢度食,都仲未食到主菜就知道一定會再返嚟幫襯!

終於要講到最最最重要嘅薯條,究竟佢地嘅薯條嘅最大吸引力喺邊?打個比喻,如果大家細個有食過豬油撈飯,就會明白食佢地嘅薯條嘅感覺喺邊度!呢間扒房既然係賣牛扒做主打,直頭就用埋牛扒嘅油嚟炸薯條!喂!淨係見到呢度都已經知道係屈機級別,玩到咁大仲會唔好食咩?!薯條咬落到鬆軟程度啱啱好,脆口得嚟薯味又夠,仲要每次真係新鮮炸好就送上嚟,每次望到嗰陣香味都已經令到薯毛毛唔食返兩三 round 係唔會收手!

呀,唔可以唔提佢地嘅醬,每次都會有三款醬,除咗茄汁之外,另外兩款醬係隨機嘅!江湖傳聞話佢地剩係薯條嘅醬都已經有二十幾款,淨係呢點都已經夠令人期待下次再返嚟幫襯會係試到咩醬啦!

上主菜之前,另一位老闆 Pauline 其實係會一早同大家介紹今晚食嘅牛係會來自咩地方同部份,每次都會好詳細咁同大家介紹,今次四個人嚟可以食到三款唔同地方嘅牛,包括澳洲天然牛嘅肉眼心、澳洲和牛 chuck tender(牛肩柳),同埋英國牛嘅 hanger(橫隔膜部份),佢地提供牛都係市面少見嘅部份,每次嚟呢度食都會食到唔同嘅牛,味道都係好唔一樣,有時會覺得肉味重,有時會覺得口感強,甚至,有時係會食到帶有草味,甚至有次係食到牛乳味都有,相信大家睇到呢度都應該已經流哂口水啦!

話說諗起第一次嚟呢度食,薯毛毛係搵咗幾位呢個 page 嘅 fans 嚟呢度食,嗰次大家食完主菜都表示已經想投降。點知,原來係仲有甜品,本身諗住食一件已經夠,點知,大家一食完第一啖就已經知道返唔到轉頭,encore 多一件是常識吧?無論係佢地嘅 chesses cake、chocolate cake,定係其他款式嘅甜品,無一樣唔係高水平!上年第一次嚟食每位係 $480,之後加價到 $520,到宜家去到 $550,薯毛毛都仲係覺得物超所值,每次嚟食都有咁多驚喜,仲可以係免開瓶費,真係好難唔令人鍾意呢間拱房!

寫咗食評四年幾,今次應該係第一次非常完整咁寫咗成餐飯出嚟,亦都覺得只有係咁大家先會明白呢度嘅吸引力喺邊度。無論係三兩知己嚟呢度食,定係約埋成村朋友,甚至係包埋場,每次感覺都係好唔同,好多時食完都已經係差唔多夜晚十二點,但係,每次薯毛毛都會覺得係值得嘅!

雖則,要喺呢度 book 位真係好唔容易,不過,佢地搬咗新舖之後其實多咗好多位,希望疫情完咗之後大家都有機會嚟呢度試下,就算唔食牛嘅朋友,其實都可以話俾老闆聽,等佢地安排其他嘢食都可以㗎!

今次呢篇食評寫得好長,好多謝肯睇到呢度嘅朋友,下次再介紹其他地方,下星期見!

評分:
薯條 Size 🍟:粗薯條
價錢 💰:NA
賣相 📷:4/5(望落去唔太特別,薯條份量係啱啱好夠大家送牛扒嚟食)
薯條質素 🌟:5/5(用牛扒嘅油嚟炸薯條,炸出嚟真係好香,每次都係食到停唔到手)
醬汁 / 調味 🍯:5/5(醬汁創意滿分,唔夠嘅話可以 encore)
性價比 💸:5/5(呢間扒房嘅性價比好難唔俾五粒星)
總分 💯:19/20

選擇性質:三兩知己 / 成班人一齊食飯

餐廳:Pheromone Steak House
地址:天后蓮花宮西街 1-9 號中華大廈地下 E-G 號舖

想睇 MeWe 版?Click 呢度啦
想睇返之前嘅推介?Click 呢度啦

 

# Pheromone #PheromoneSteakHouse
#香港 #香港島 #天后 #蓮花宮西街 #中華大廈
#薯條 #Fries #FrenchFries
#薯毛毛 #薯條控
#我係薯條控 #今日薯條睇真D

作者 Facebook