立場新聞 Stand News

傳警總大堂翻新擺棋盤 有砲有士偏無帥?

2019/12/16 — 14:31

左圖:網絡圖片

左圖:網絡圖片

風水陣嘅嘢,心水清先睇得明!

警隊換咗口號,標榜「忠誠勇毅」之後,琴日就網傳張圖話,警總拿拿臨配合最新主旋律,翻新咗個?大堂,擺款!啊,唔係,係擺盤,棋盤,象棋盤!?口上高,大大隻棋,寫住「忠誠勇毅」同「心繫社會」,確係醒神!一出?門就「楚河漢界」,出更認真要提神!

警察日日出出入入,喺個棋盤上面行來行去,何其壯觀。散仔如卒仔,只得一味向前衝無得返轉頭,但弊又弊在你行先又死先喎。後排嘅車馬砲都唔駛失望,你可以彈出彈入好巴閉,其實都不過係人哋隻棋仔!

廣告

講起人哋隻棋,棋子背後邊個指揮?一睇,再睇,大鑊!成盤棋最震撼之處,在於有砲有士又有馬,但無帥也無將!係,我知你話棋盤上仲有幾粒棋又遠又矇睇唔清,但阿叔話你知,將帥係唔出底下中間嗰個米田框㗎。佢想點避走都唔可以出呢個框,每次最多只可以行一步。一個唔好彩,前面無遮無擋,直接向住對家將帥,同樣都係玩完!好鬼脆弱,好鬼易死,但廢還廢,係人都知無咗將帥成盤棋都唔駛捉落去啦!

所以話呢,呢幅象棋翻新貼紙,點只係裝飾咁簡單,根本就係擺風水!邪住警隊嘅將帥,得返馬砲士嘅一盤棋,呵!一哥你自己落嚟睇吓,唔知邊個根本唔放你在眼內啊!我係你就唔收貨啦,之但係你條?可能「袋住先」,目中無人又以下犯上,真係點忍得落?

廣告

就算亡羊補牢,畀你加返個阿頭落去。香港呢盤棋,阿叔我捉象棋捉咗幾十年都大嗌頭痕囉!

發表意見