立場新聞 Stand News

凡事哈:大犯錯家

2021/1/23 — 12:59

Frances Ha 劇照

Frances Ha 劇照

【文: 招文軒】

睇完凡事哈做功課,先發現大件事:乜我未睇過法國新浪潮戲就已經先睇過 refer to 個 trend 嘅戲。黑白色,大巧不工,自然灑脫嘅 jump cuts,生活化質地,神出鬼沒 diegetic 配樂,gin tonic 式清新爽利回甘,幾啱胃口,幾襯講呢個中女都市耍廢嘅故仔。話係故仔,其實又平淡近自然,刻畫嗰隻 lifestyle 本身先至係重頭戲。

戲中講嘅高低起伏,你係會 feel like 只係將主角成個流流長人生剪左某忽出嚟就比你睇,咁樣拍法,睇佢拍個零鐘同拍三粒鐘都 seems 係 okay。除左好睇,個 lifestyle 有乜好值得拍?當然係因為嗰隻都市耍廢嘅心境有佢嘅普遍性,睇怕大家都經歷緊,或者將有可能去經歷。

廣告

嗯嗯即刻想講我睇見條女喺紐約呢個白鴿眼之地唔多撈得掂但照嬉皮笑臉大癲大肺咁過,覺得簡直係照鏡望見第時嘅自己咁。相信將來大把機會要人前扮 okay 收埋啲眼淚嚟流,大把機會要馬死落地行,大把機會要同人比較要諗自己咩斤兩,等等。

Frances Ha 劇照

Frances Ha 劇照

廣告

太過投入睇到眼濕濕嘅同時,你眼見條女行為橫衝直撞又唔識睇眉頭眼額,會覺得睇到好似佢老母上身咁,心諗阿女呀我真係保你大。但又忍唔住會覺得,就係有嗰隻純嗰隻蠻力,佢先會廣結善緣花見花開,面對住社會壓力亦唔會走去異化成粒螺絲釘,保存得到自由自我天性。

我當然可以敦起個款同你講異化講 <單向道的人> but 諗落都係費事搞到我下下寫文,偏上加偏,再偏上加偏。講人話︰有時做人一場,迷茫失落呢就難免,唔係話揀第二條路就會一天都光晒,只係我信性格代表命運,你有咁樣嘅格就要食晒嗰隻格有嘅好同壞。

所我會話佢嘅挫折佢嘅徒勞失落 in some way 係整定嘅如同 7 仔啲燒賣。佢呢類人,就係要不撞南牆心不死,就係要衝動過癲過錯過先服氣,行為上撞完板,先真係消化到個新鮮滾熱辣結論,個衰女包完學得精。為左心服口服達到認知上嘅正確,行為上必須犯足夠多嘅錯誤。

咁先解釋到,齋望條友好似幾聰明靈動,心諗乜事唔多穩陣可靠嘅成個神經刀咁。點解我咁明,你估會唔會係因為我都係咁止下款吖嗱?咁樣睇俗眼嘅成敗,又真係市儈又無聊。個個千人一面方正穩陣時,總要有人出嚟,犯啲新嘅錯。

作者簡介: 躺著觀影,坐著打字,經營 ig 帳戶@weiredeyeforfilms。  

發表意見