立場新聞 Stand News

創作人抗疫心法!自救篇

2020/2/7 — 11:46

圖片設計:Gina @ Trial and Error Lab

圖片設計:Gina @ Trial and Error Lab

【文、圖:Gina @ Trial and Error Lab】

喺瘋狂嘅城市,點樣唔畀自己癲?小編呢幾日幾乎係人生最多 Trial and Error 嘅日子,不如一齊交流吓點樣過渡。

1. 抒發怒氣:

廣告

無論係畫圖、整手作工藝定出短片,試吓用你最多嘅創意整理記招同新聞,記錄荒唐嘅人與事,有幾嬲就將件事整到幾靚,用好嘅文宣團結大家,一齊嬲一齊鬧,無咁㷫呀嘛。

2. 畫技術圖些牙:

廣告

大家其實都好驚,但如果你有能力畫一張「無口罩點做好」呢類技術圖,可以令大家學到嘢之餘,個心都安落啲。

3. 放低手機:

每時每刻追確診數字及新聞,已經好耐無畀自己抖下。小編都好攰,亦有好多情緒。或者試吓放低手機幾個鐘,煲劇、運動、煮飯乜都好,享受一刻心靈平靜。拎翻起電話嗰陣,可能又多幾宗確診個案嘅 notification ,惟有再用啲力安靜內心,並為患者唸經禱告。

4. 繼續搵食:

仲有 job 嘅話,梗係要接,咁樣先有資本繼續做正確嘅事。對手作工藝師嚟講,無訂單時可以整定啲貨,等疫情退減後,齊齊去市集擺檔。

5. 閉關修煉:

不如做一啲一直想做,但又冇時間做嘅事?研究下新 product、點樣用自然光影靚靚 product shot,又或者做啲社會性嘅 art project……做做下先發現,自己嘅想像力同能力原來好闊。

 6. 圍爐取暖:

閉完關,搵同行傾偈,交換情報,講吓大家最近嘅心情,互相關心,甚至夾份買物料整抗疫手作。一齊行,點都好過一個人啊!

 7. 欣賞家人付出:

做足留家抗疫功夫其實唔容易㗎!不如嘗試做吓家居清潔,同時試吓開口多謝家人嘅付出;因為我哋終於知道,喺呢段艱難嘅日子,雖然同家人多咗頂撞,但其實有住家飯食、有廁紙用,真係好幸福

 

發表意見