立場新聞 Stand News

十分鐘理髮店係一次震撼教育

2020/6/9 — 9:29

資料圖片,來源:Freepik

資料圖片,來源:Freepik

回到香港的第一件事,二話不說,是去十分鐘理髮店。

英國其中一種名產,是理髮和修鬍。無論走到倫敦大街,或者屋村小店,甚至是商業區的理髮車,都總會都隱隱透著一種復古格調。諸位癲佬不妨現在開始留長頭髮,到疫情完結後去旅行試試。

但是,骨子裏作為一個講求效率嘅香港佬,幾年前第一次去十分鐘理髮店,絕對係一次震撼教育。震撼嘅地方唔係在於個結果,而係個過程。

廣告

首先佢地下有一個識吸頭髮嘅窿,用掃把三扒兩撥就可以輕鬆清理好地上面嘅髮碎。淨係呢點,我夠膽講係革命性。

而剪嗰個阿叔,紮起一頭血紅色嘅長髮,唔單只個外型似中華英雄,個內涵更加散發出郭富城扮步驚雲,目無表情但又充滿滄桑感嘅孤寂。

廣告

阿叔:「點剪?」

我:「呃,側邊短少少,然後……」

阿叔:「即係側邊短、後面鏟、上面修一修啦,吓嘩?」

喺我來得及反應之前,佢已經拎起咗個鏟,隻手好似打網球反手抽擊咁,大幅鏟咗一刀。

而佢對眼,由頭到尾都無喺我個頭度停留超過兩秒,一邊剪,一邊雙目散渙地望下出面,望下天花,望下隔籬個電視。

佢每一鏟,都係毫不經意;每一撥,都係順手一刀;佢嘅站姿,毫不掩飾嗰種「是 X 但啦」嘅態度。

男人老狗,髮型八九不離十,求其去搵間飛髮舖剪,其他人睇其實都不見得有大分別。就算比一千幾百去 IFC 剪,斷唔會剪完由劉江華變咗劉德華。

我一早已經睇透,外型嘅嘢,你係型就型,係醜就醜。你幾時有見過陳冠希個髮型醜㗎啫。

好快剪完之後,佢喺頭頂抽咗一條吸塵機管出嚟喺我頭上面掃咗兩下。拆埋件袍,然後一聲多謝,前後係五分鐘。

幾十蚊有咁嘅效率,I am not even mad, that’s amazing.

 

作者 Facebook

發表意見