反面教材
Ms Yu2020/5/25 — 0:25
圖片來源：飛影、PSHK片段截圖
有一次，一位六歲男生，因為不問自取被隔離位同學投訴。
M：點解要拿走同學把間尺？
男：因為我需要用。
M：咁點解之後冇將間尺還返俾人他？
男：因為我唔記得咗。
M：嗱，你同我聽清楚。喺未經人地同意嘅情況下，攞走人 D 嘢係唔啱，係盜竊行為，好壞。可唔可以應承我下次提醒自己唔再咁樣做。
男：OK，Ms Yu！
M：好，有冇唔明白嘅地方？
男：有。其實乜係「盜竊」？
即係訓話完其實都未明白。
唔緊要，對住學生，老師絕對唔介意將同一樣嘢重複講四百次，直至佢明白、學識為止。
但係，最怕就係遇上反面教材。
小朋友黑白分明，冇灰色地帶。當佢地見到咁大個人可以咁自然上演一幕不問自取，真係好難唔將佢歸類為壞人。就算你之後搵人買起人地成間舖，嗰個行為錯咗就係錯咗。
當小朋友識得駁一句：「但係頭先嗰個叔叔就咁就攞支水冇俾錢喎。」
知唔知其實係浪費咗大家幾多心血？
順帶一提，呢啲大家以為一閃即過嘅濕碎時刻，先至係真正教育發生嘅時候。