人在中環 - CK

人在中環 - CK

我係一隻又笨又固執既豺狼。著有《人在中年》

2019/2/13 - 14:15

呢個世界,唔係每個戰場都必須參與

圖片來源:chuttersnap, Unsplash

圖片來源:chuttersnap, Unsplash

放咗個短假,出外走咗一轉,回來充滿活力和鬥志地工作了一天之後,轉眼間所有熱情就消耗殆盡了。一個假期,最後只帶來一日嘅工作鬥志。我呢個中年大叔,真夠唔掂。

假期嘅時候,跟個朋友碰了個面。朋友係個好認真嘅媽媽,有個女,同我家孩子年紀差不多。唔同嘅係,佢個女讀書好叻,喺間好勁嘅小學裡面仲要係全級考第一。個女讀書勁之外,音樂都好勁,人仔細細已經唔知考到幾多級了。總之就勁啦。

我個仔,以前兩三歲嗰陣,老婆有同佢去過啲唱遊班。課程最初主力係嘻嘻哈哈唱吓歌仔跑跑跳跳咁,阿仔好鍾意上架。到課程後期,開始加入咗啲彈鋼琴嘅element喺裡面,要返屋企練習先過到骨,阿仔就開始唔鍾意上堂了。我當時見阿仔冇咩興趣,我就同老婆講:「遲吓先算啦,音樂又唔係一定要學,個course完咗之後就暫時唔好再學住囉。」

廣告

同呢位朋友見面嘅時候,咁啱提起呢件N年前嘅事。估唔到朋友反應好大:「咁唔啱數喎CK,佢一唔鍾意就縱容佢放棄,唔得喎。如果佢聽日同你講,佢唔鍾意讀書,你係咪就同佢退學先?」

嘩頂,我隨口講吓遮,咁認真呀你?

「而且你都有學音樂啦,你冇理由唔明白,音樂要經過苦練先會學得成吖嘛。你都係咁學返嚟架啦,點解由得個仔放棄呢?」

errr。

跟朋友碰面時,老婆在身邊,佢就咁答:「其實咁嘅,我地就覺得,人生其實有好多戰場嘅,係咪每個戰場都必須要參與呢?我自己就覺得唔係嘅。CK佢細個玩音樂,又唔代表佢個仔一定要參與呢個遊戲嘅。唔係刻意鼓勵佢放棄,只係我哋覺得,其實人有好多嘢都唔一定係必須嘅。對於唔係必須嘅嘢,咪等阿仔大個啲,由佢自己去選擇囉。」

朋友皺皺眉,冇再反駁了。話題亦好快跳咗去第二啲風花說月嘅問題上面。

對於老婆嘅答案,我諗我冇乜太多補充了。

老婆話,你只要大病過一場之後,就明白呢個世界,唔係每個戰場都必須要參與的。

明就明,唔明嘅還是會繼續唔明的。

對於朋友講嘅「放棄」,我心諗,其實對個細路嚟講,根本都未開始過,咁何來放棄呢?真正在心裡「開始」咗嘅,其實只係啲家長之嘛。

對於學音樂,我自己都有啲體會嘅。我算係好細個就學音樂嘅人,我會講,我現在的確係鍾意音樂嘅,但真正鍾意音樂,其實係由唔洗再考琴,唔洗再去比賽開始。

當年屋企人算唔算逼得我好勁呢?其實都唔算,不過你自己知道你算係彈得幾勁,就唔會想「半途而廢」。當老師問同學,班裡面邊個音樂玩得勁嘅時候,同學都會話「米梓橋!」細個繼續挨住練琴嘅推動力,其實都係呢種虛榮心。但高處其實不聲寒,細路仔其實也怕自己會跌落嚟,唔再係同學仔心目中嘅「勁人」。於是,細路仔嘅時候,其實並冇真正享受過同喜歡個音樂。及後,喺音樂上嘅造藝,亦冇再有進步了。

我認識音樂玩得堅叻嘅人,大都唔係幾歲人仔就開始學樂器的。大部份,都係去到接近teenage嘅時間,先從最基本開始學。我發現呢班人,反而喺音樂上嘅成就先係最大嘅。大家都可以諗吓點解?teenage,喺今日嘅香港嘅標準,恐怕已經係「考完晒所有音樂試」嘅年紀了。呢班個個十級八級,自細學識N種樂器嘅音樂高手,又有幾多會喺音樂上有成就?甚至,當中又有幾多試過真心地享受音樂?

原文無題,題無編輯所擬

作者facebook